ലണ്ടന്‍ : കൗണ്ടി ക്രിക്കറ്റ് ചാമ്പ്യന്‍ഷിപ്പില്‍ അരങ്ങേറ്റത്തിനൊരുങ്ങി ശ്രീലങ്കന്‍ ടെസ്റ്റ് ടീം ക്യാപ്റ്റന്‍ ദിമുത് കരുണരത്‌നെ. യോര്‍ക്‌ഷെര്‍ കൗണ്ടി ക്രിക്കറ്റ് ക്ലബ്ബിനായാണ് താരം കളത്തിലിറങ്ങുക. ക്ലബുമായി ദിമുത് കരുണരത്‌നെ ഹ്രസ്വകാല കരാറിൽ ഒപ്പുവച്ചു.
ക്ലബ്ബിന്‍റെ മൂന്ന് മത്സരങ്ങള്‍ക്കായാണ് താരം കരാറിലേര്‍പ്പെട്ടിരിക്കുന്നത്. ഈ ആഴ്‌ച നോർത്താംപ്ടൺഷെയറിനെതിരെയാണ് ലങ്കയുടെ ടോപ്‌ ഓര്‍ഡര്‍ ബാറ്റര്‍ അരങ്ങേറ്റം നടത്തുക. തുടര്‍ന്ന് മെയില്‍ ഹെഡിംഗ്‌ലിയിൽ കെന്‍റിനെതിരെയും, തുടര്‍ന്ന് എസെക്‌സിനെതിരെയുമാണ് താരം കളിക്കുക.
അടുത്ത മൂന്ന് ചാമ്പ്യൻഷിപ്പ് മത്സരങ്ങളിൽ ലങ്കന്‍ താരം തങ്ങളോടൊപ്പം ചേരുന്നതിൽ സന്തോഷമുണ്ടെന്ന് യോര്‍ക്‌ഷെര്‍ ഇടക്കാല മാനേജിങ് ഡയറക്ടർ ഡാരൻ ഗോഫ് പ്രസ്താവനയിൽ പറഞ്ഞു. ടെസ്റ്റില്‍ ലങ്കയ്‌ക്കായി 14 സെഞ്ച്വറികൾ ഉൾപ്പടെ നിലവില്‍ 39.57 ശരാശരിയിൽ 5,620 റണ്‍സ് നേടാന്‍ ഇടംകയ്യൻ ബാറ്റര്‍ക്ക് കഴിഞ്ഞിട്ടുണ്ട്.
