കേപ്‌ടൗണ്‍: സെഞ്ചൂറിയനിലെ മുറിവുണക്കാന്‍ കേപ്‌ടൗണിലിറങ്ങിയ ഇന്ത്യയ്‌ക്ക് മുന്നില്‍ ദക്ഷിണാഫ്രിക്ക തകര്‍ന്നടിഞ്ഞിരുന്നു. ടോസ് നേടി ആദ്യം ബാറ്റ് ചെയ്യാനിറങ്ങിയ ആതിഥേയര്‍ 23.2 ഓവറില്‍ വെറും 55 റണ്‍സിനായാണ് ഓള്‍ഔട്ടായത്. (India vs South Africa) വര്‍ണവിവേചനവുമായി ബന്ധപ്പെട്ട വിലക്കിന് ശേഷം തിരിച്ചെത്തിയ ദക്ഷിണാഫ്രിക്കയുടെ ഏറ്റവും കുറഞ്ഞ സ്‌കോറാണിത്. (South Africa lowest total In test)
2018-ല്‍ ശ്രീലങ്കക്കെതിരെ ഗാലെയില്‍ 73 റണ്‍സിന് പുറത്തായതായിരുന്നു ഇതിന് മുന്നത്തെ ചെറിയ ടോട്ടല്‍. 2015-ല്‍ ഇന്ത്യയ്‌ക്ക് എതിരെ നാഗ്പൂരില്‍ 79 റണ്‍സിന് ടീം പുറത്തായിട്ടുണ്ട്. 2016-ല്‍ ജോഹന്നാസ്‌ബെര്‍ഗില്‍ ഇംഗ്ലണ്ടിനെതിരെ 83 റണ്‍സിനും 2006-ല്‍ ഇന്ത്യക്കെതിരെ ഇതേപിച്ചില്‍ 84 റണ്‍സിനും ദക്ഷിണാഫ്രിക്ക ഓള്‍ ഔട്ടായിട്ടുണ്ട്. വിലക്ക് ലഭിക്കും മുമ്പ് 1932-ല്‍ ഓസ്‌ട്രേലിയയ്‌ക്ക് എതിരെ 36 റണ്‍സിന് ദക്ഷിണാഫ്രിക്ക പുറത്തായിട്ടുണ്ട്.
അതേസമയം ടെസ്റ്റില്‍ ഇന്ത്യയ്‌ക്ക് എതിരെ ഒരു ടീം നേടുന്ന ഏറ്റവും കുറഞ്ഞ സ്‌കോര്‍ കൂടിയാണിത്. 2021-ല്‍ മുംബൈ ടെസ്റ്റില്‍ ന്യൂസിലന്‍ഡിനെ 61 റണ്‍സിന് ഓള്‍ ഔട്ടക്കിയതായിരുന്നു മുമ്പത്തെ റെക്കോഡ്. 2015-ല്‍ നാഗ്പൂരില്‍ ദക്ഷിണാഫ്രിക്കയെ 79 റണ്‍സിന് പുറത്താക്കിയതാണ് മൂന്നാം സ്ഥാനത്ത്. (South Africa registers lowest total by a team against India in Tests).
അതേസമയം ആറ് വിക്കറ്റ് വീഴ്‌ത്തിയ മുഹമ്മദ് സിറാജാണ് പ്രോട്ടീസിനെ എറിഞ്ഞിട്ടത്. ഒമ്പത് ഓവറില്‍ 15 റണ്‍സ് മാത്രം വഴങ്ങിയാണ് സിറാജിന്‍റെ തകര്‍പ്പന്‍ പ്രകടനം. 30 പന്തില്‍ 15 റണ്‍സ് നേടിയ കെയ്‌ല്‍ വെരെയ്‌ന, 17 പന്തില്‍ 12 റണ്‍സെടുത്ത ഡേവിഡ് ബെഡിങ്ഹാം എന്നിവര്‍ മാത്രമാണ് പ്രോട്ടീസ് നിരയില്‍ രണ്ടക്കം തൊട്ടത്. സെഞ്ചൂറിയനില്‍ നടന്ന ആദ്യ മത്സരത്തില്‍ ഇന്നിങ്‌സിനും 32 റണ്‍സിനുമായിരുന്നു ആതിഥേയര്‍ ഇന്ത്യയെ തോല്‍പ്പിച്ചത്. ഇതോടെ രണ്ട് മത്സര പരമ്പര സമനിലയിലാക്കണമെങ്കില്‍ കേപ്‌ടൗണില്‍ ഇന്ത്യയ്‌ക്ക് ജയം അനിവാര്യമാണ്.
ALSO READ: കേപ്‌ടൗണില്‍ കൊടുങ്കാറ്റായി സിറാജ് ; ദക്ഷിണാഫ്രിക്ക 55 റണ്‍സിന് പുറത്ത്
ഇന്ത്യ (പ്ലെയിംഗ് ഇലവൻ): രോഹിത് ശർമ (ക്യാപ്റ്റന്‍), യശസ്വി ജയ്‌സ്വാൾ, ശുഭ്‌മാൻ ഗിൽ, വിരാട് കോലി, ശ്രേയസ് അയ്യർ, കെഎൽ രാഹുൽ (വിക്കറ്റ് കീപ്പര്‍), രവീന്ദ്ര ജഡേജ, ജസ്പ്രീത് ബുംറ, മുഹമ്മദ് സിറാജ്, പ്രസിദ്ധ് കൃഷ്ണ, മുകേഷ് കുമാർ. (India Playing XI for 2nd Test Against South Africa).
ദക്ഷിണാഫ്രിക്ക (പ്ലെയിംഗ് ഇലവൻ): ഡീൻ എൽഗാർ(സി), എയ്ഡൻ മാർക്രം, ടോണി ഡി സോർസി, ട്രിസ്റ്റൻ സ്റ്റബ്സ്, ഡേവിഡ് ബെഡിംഗ്ഹാം, കെയ്ൽ വെറെയ്നെ(വിക്കറ്റ് കീപ്പര്‍), മാർക്കോ ജാൻസെൻ, കേശവ് മഹാരാജ്, കാഗിസോ റബാഡ, നാന്ദ്രെ ബർഗർ, ലുങ്കി എൻഗിഡി. (South Africa Playing XI for 2nd Test Against India).
