അഹമ്മദാബാദ് : ഏകദിന ക്രിക്കറ്റ് ലോകകപ്പില്‍ (Cricket World Cup 2023) ഇന്ത്യയോട് തോല്‍വി വഴങ്ങിയതിന് പിന്നാലെ രൂക്ഷ വിമര്‍ശനവുമായി പാകിസ്ഥാന് ക്രിക്കറ്റ് ടീം ഡയറക്‌ടര്‍ മിക്കി ആര്‍തര്‍ (Micky Arthur). അഹമ്മദാബാദിലെ നരേന്ദ്ര മോദി സ്റ്റേഡിയത്തില്‍ ഒരുലക്ഷത്തില്‍പ്പരം കാണികള്‍ക്ക് മുന്നില്‍ നടന്ന മത്സരത്തില്‍ പാകിസ്ഥാന് ഒരു പിന്തുണയും ലഭിച്ചില്ലെന്ന് ആര്‍തര്‍ പറഞ്ഞു. ഇന്നലെ (ഒക്‌ടോബര്‍ 14) നടന്ന മത്സരത്തില്‍ ഇന്ത്യയോട് ഏഴ് വിക്കറ്റിനായിരുന്നു പാക് ടീം പരാജയപ്പെട്ടത് (India vs Pakistan Match Result).
'ഇന്ത്യ പാകിസ്ഥാന് മത്സരത്തിനിടെ ഐസിസി ടൂര്‍ണമെന്‍റാണ് നടക്കുന്നതെന്ന ഒരു തോന്നലും എനിക്ക് ഉണ്ടായിരുന്നില്ല. ഇത് ഇപ്പോള്‍ പറയുകയാണ് വേണ്ടതെന്ന് മാത്രം എനിക്കറിയാം. മത്സരം നടക്കുന്ന സമയങ്ങളിലെല്ലാം സ്റ്റേഡിയത്തിലെ മുഴുവന്‍ പിന്തുണയും ലഭിച്ചത് ഇന്ത്യയ്‌ക്കായിരുന്നു.
ആരാധകര്‍ പാകിസ്ഥാനെ പിന്തുണയ്‌ക്കുന്ന വാചകം പോലും പറയാന്‍ മൈക്കിലൂടെ ഒരു അനൗണ്‍സ്‌മെന്‍റ് പോലും ഉണ്ടായിരുന്നില്ല. ഇതെല്ലാം കണ്ടപ്പോള്‍ നടന്നുകൊണ്ടിരിക്കുന്നത് ഒരു ദ്വിരാഷ്‌ട്ര പരമ്പര മാത്രമാണ് എന്നാണ് എനിക്ക് തോന്നിയത്. പാകിസ്ഥാന്‍റെ തോല്‍വിയുടെ പ്രധാന കാരണം അതാണെന്ന് ഒരിക്കലും പറയാന്‍ കഴിയില്ല, എന്നാല്‍ ഈ തോല്‍വിയില്‍ അതും ഒരു പ്രധാന പങ്ക് വഹിച്ചിട്ടുണ്ടെന്ന് പറയാന്‍ സാധിക്കും' മിക്കി ആര്‍തര്‍ പറഞ്ഞു (Micky Arthur About India vs Pakistan Match Ambience at Ahmedabad).
ഈ വിഷയത്തില്‍ ടീം ഡയറക്‌ടര്‍ മിക്കി ആര്‍തറുടെ അതേ നിലപാടാണ് തനിക്കുമുള്ളതെന്ന് പാകിസ്ഥാന് പരിശീലകന്‍ ഗ്രാന്‍റ് ബ്രാഡ്ബേണും (Grant Bradburn) അഭിപ്രായപ്പെട്ടിരുന്നു. നരേന്ദ്ര മോദി സ്റ്റേഡിയത്തില്‍ നടന്ന മത്സരത്തിന് പാകിസ്ഥാനെ പിന്തുണയ്‌ക്കുന്ന ആരും ഉണ്ടായിരുന്നില്ല. സ്റ്റേഡിയത്തിലേക്ക് പാക് ആരാധകര്‍ എത്തിയില്ല എന്നത് ഏറെ നിര്‍ഭാഗ്യകരമായ സംഭവമാണെന്നും അദ്ദേഹം കൂട്ടിച്ചേര്‍ത്തു.
ടോസിനിടെ ഇന്നലെ സ്റ്റേഡിയത്തിലേക്ക് പാകിസ്ഥാന് നായകനെ ക്ഷണിച്ചപ്പോള്‍ ആരാധക കൂട്ടം കൂവലോടെയായിരുന്നു ബാബറിനെ വരവേറ്റത്. ഇതിന് പിന്നാലെ ഇന്ത്യയുടെ ബാറ്റിങ്ങിനിടെ പാക് പേസര്‍ ഹാരിസ് റൗഫ് പന്ത് എറിഞ്ഞപ്പോഴും ഗാലറിയില്‍ നിന്നും കൂവലുകള്‍ ഉയര്‍ന്നിരുന്നു.
ഏകദിന ലോകകപ്പിലെ ഇന്ത്യ പാകിസ്ഥാന് പോരാട്ടം വന്‍ ജനപങ്കാളിത്തത്തോടെയായിരുന്നു അഹമ്മദാബാദില്‍ നടന്നത്. മത്സരത്തിന്‍റെ ടിക്കറ്റുകള്‍ വില്‍പ്പന തുടങ്ങി അല്‍പ നേരത്തിനുള്ളില്‍ തന്നെ വിറ്റുതീര്‍ന്നിരുന്നു. തുടര്‍ന്ന് 10,000-ല്‍ അധികം ടിക്കറ്റുകള്‍ ബിസിസിഐ അധികമായി വീണ്ടും പുറത്തിറക്കിയിരുന്നു.
