മുംബൈ : അഫ്‌ഗാനിസ്ഥാനെതിരായ ടി20 പരമ്പരയ്ക്കുള്ള ഇന്ത്യന്‍ സ്‌ക്വാഡ് കഴിഞ്ഞ ദിവസം ബിസിസിഐ സെലക്‌ടര്‍മാര്‍ പ്രഖ്യാപിച്ചിരുന്നു (India vs Afghanistan T20Is). നീണ്ട ഇടവേളയ്‌ക്ക് ശേഷം രോഹിത് ശര്‍മയും വിരാട് കോലിയും ഫോര്‍മാറ്റിലേക്ക് തിരികെ എത്തിയപ്പോള്‍ ടീമിലെ പ്രധാന അസാന്നിധ്യങ്ങളിലൊന്ന് വിക്കറ്റ് കീപ്പര്‍ ബാറ്റര്‍ കെഎല്‍ രാഹുലിന്‍റേതായിരുന്നു. ടി20 ലോകകപ്പിന് (T20 World Cup 2023) മുന്നേ ഇന്ത്യ കളിക്കുന്ന അവസാന ടി20 പരമ്പരയാണ് അഫ്‌ഗാനിസ്ഥാനെതിരായത്.
ഇക്കാരണത്താല്‍ തന്നെ രാഹുലിനെ ടീമിലെടുക്കാത്തതെന്തെന്ന് നിരവധി ആരാധകര്‍ ആരാഞ്ഞിരുന്നു. ഇപ്പോഴിതാ ഇതിന്‍റെ കാരണം പുറത്ത് വന്നിരിക്കുകയാണ്(Why KL Rahul not Picked For Afghanistan T20Is). ടീമിലെ ഓപ്പണിങ്, മിഡിൽ ഓർഡർ സ്ഥാനങ്ങൾക്കായി സെലക്‌ടർമാർ മറ്റ് ഒപ്ഷനുകൾ പരിഗണിച്ചതിനാലാണ് രാഹുലിന് പുറത്തിരിക്കേണ്ടി വന്നതെന്നാണ് ഒരു ദേശീയ മാധ്യമം റിപ്പോര്‍ട്ട് ചെയ്‌തിരിക്കുന്നത്.
തന്‍റെ അന്താരാഷ്‌ട്ര ടി20 കരിയറില്‍ ഭൂരിഭാഗം മത്സരങ്ങളും ഓപ്പണറുടെ റോളിലാണ് രാഹുല്‍ കളിച്ചിട്ടുള്ളത്. എന്നാൽ രോഹിത്തിനൊപ്പം നിലവിലെ സ്‌ക്വാഡില്‍ ശുഭ്‌മാൻ ഗില്ലും യശസ്വി ജയ്‌സ്വാളും ഓപ്പണിങ് റോളിലുണ്ട്. കോലിയും മടങ്ങിയെത്തിയതോടെ ടോപ്‌ ഓര്‍ഡറിലും രാഹുലിന് സ്ഥാനമില്ലാതായി.
മധ്യനിരയിലേക്ക് എത്തുമ്പോഴും കാര്യങ്ങള്‍ സമാനമാണ്. വിക്കറ്റ് കീപ്പര്‍മാരായും ഫിനിഷര്‍മാരായും സഞ്ജു സാംസണ്‍, ജിതേഷ് ശര്‍മ എന്നിവരെയാണ് സെലക്‌ടര്‍മാര്‍ തെരഞ്ഞെടുത്തിരിക്കുന്നത്. അന്താരാഷ്‌ട്ര ടി20യില്‍ ഇതേവരെ ഫിനിഷറുടെ റോളില്‍ രാഹുല്‍ കളിച്ചിട്ടുമില്ല.
ഇനി, വരാനിരിക്കുന്ന ഐപിഎല്ലില്‍ വിക്കറ്റ് കീപ്പ് ചെയ്യുന്ന ഒരു സ്പെഷ്യലിസ്റ്റ് ഫിനിഷർ എന്ന നിലയിൽ മികവ് കാട്ടാന്‍ കഴിഞ്ഞാല്‍ മാത്രമേ ഇന്ത്യയുടെ ടി20 ടീമിലേക്ക് താരത്തിന് ഒരു തിരിച്ചുവരവുണ്ടാവൂവെന്നാണ് പൊതുവെ വിലയിരുത്തല്‍. എന്നാല്‍ ഐപിഎല്ലില്‍ തന്‍റെ ഫ്രാഞ്ചൈസിയായ ലഖ്‌നൗ സൂപ്പർ ജയന്‍റ്‌സിൽ ഓപ്പണറുടെ റോളാണ് രാഹുല്‍ കൈകാര്യം ചെയ്യുന്നത്.
അതേസമയം മറ്റൊരു വിക്കറ്റ് കീപ്പര്‍ ബാറ്റര്‍ ഇഷാന്‍ കിഷനെ ഒഴിവാക്കിയതിന് പിന്നിലെ കാരണം വ്യക്തമല്ല. ദക്ഷിണാഫ്രിക്കയ്‌ക്കെതിരായ ടെസ്റ്റ് പരമ്പരയിൽ നിന്ന് വ്യക്തിപരമായ കാരണങ്ങളാല്‍ ഇഷാന്‍ കിഷന്‍ പിന്മാറിയിരുന്നു. പിന്മാറ്റത്തിന്‍റെ യഥാര്‍ഥ കാരണം ഇതുവരെ വെളിവായിട്ടില്ല.
എന്നാല്‍ മാനസികാരോഗ്യവുമായി ബന്ധപ്പെട്ട കാരണത്താലായിരുന്നു ഇഷാന്‍ ക്രിക്കറ്റില്‍ നിന്നും അവധിയെടുത്തതെന്ന് റിപ്പോര്‍ട്ടുണ്ടായിരുന്നു. ഇതോടെ ഇന്ത്യയുടെ ടി20 ടീമിലേക്ക് തിരികെ എത്തിയ സഞ്‌ജുവിന് (Sanju Samson) അഫ്‌ഗാനിസ്ഥാനെതിരെയും പിന്നീട് ഐപിഎല്ലിലും തിളങ്ങിയാല്‍ ടി20 സ്‌ക്വാഡിലേക്ക് ഇടം ഉറപ്പിക്കാനായേക്കും.
ALSO READ: ഒരു കളി തോറ്റാൽ മുഴുവന്‍ ടീമും മോശമാകുന്നതെങ്ങിനെ?; ഇന്ത്യയ്‌ക്കെതിരായ വിമര്‍ശനങ്ങളില്‍ ഗാംഗുലി
അഫ്‌ഗാനെതിരായ ടി20 പരമ്പരയ്ക്കുള്ള ഇന്ത്യന്‍ ടീം: രോഹിത് ശർമ (ക്യാപ്റ്റൻ), ശുഭ്‌മാൻ ഗിൽ, യശസ്വി ജയ്‌സ്വാൾ, വിരാട് കോലി, തിലക് വർമ, റിങ്കു സിങ്, ജിതേഷ് ശർമ (വിക്കറ്റ് കീപ്പർ), സഞ്ജു സാംസൺ (വിക്കറ്റ് കീപ്പർ), ശിവം ദുബെ, വാഷിങ്ടൻ സുന്ദർ, അക്‌സർ പട്ടേൽ, രവി ബിഷ്ണോയ്, കുൽദീപ് യാദവ്, അർഷ്‌ദീപ് സിങ്, ആവേശ് ഖാൻ, മുകേഷ് കുമാർ(India Squad for T20I).
