ന്യൂഡൽഹി : ഐ‌പി‌എൽ ലേലത്തിൽ ഇഷാൻ കിഷനായി 15 കോടിയിലധികം ചെലവഴിച്ചതിന് മുംബൈ ഇന്ത്യൻസിനെ വിമർശിച്ച് മുൻ ഓസ്‌ട്രേലിയൻ ഓൾറൗണ്ടറും നിലവില്‍ ഡൽഹി ക്യാപിറ്റൽസ് അസിസ്റ്റന്‍റ് കോച്ചുമായ ഷെയ്ൻ വാട്‌സൺ. താരം പ്രതിഭാധനനാണെങ്കിലും ഇത്രയറെ ശമ്പളത്തിനായി അര്‍ഹനല്ലെന്ന് വാട്‌സണ്‍ പറഞ്ഞു. പരിക്കേറ്റ ഇംഗ്ലീഷ്‌ പേസര്‍ ജോഫ്ര ആർച്ചറെ വലിയ തുകയ്ക്ക് വാങ്ങിയതിനേയും വാട്‌സൺ വിമർശിച്ചു.
'ഇഷാൻ കിഷനുവേണ്ടി ഇത്രയധികം പണം ചിലവാക്കുന്നു. അവൻ വളരെ കഴിവുള്ളതും പ്രതിഭാധനനുമായ ഒരു കളിക്കാരനാണ്. എന്നാൽ ഇത്രയേറെ ശമ്പളം ലഭിക്കാന്‍ അർഹനല്ല. 'പിന്നെ, ജോഫ്ര ആർച്ചറിനായി പോകുന്നു. അവൻ തിരികെ വരുമോയെന്നറിയാതെ. കുറച്ചുകാലമായി അവൻ ക്രിക്കറ്റ് കളിച്ചിട്ടില്ല. അവർക്ക് ടീമിൽ കുറച്ച് പോരായ്‌മകളുണ്ട്' - വാട്‌സണ്‍ പറഞ്ഞു.
രോഹിത് ശർമ, ജസ്പ്രീത് ബുംറ, സൂര്യകുമാർ യാദവ്, കീറോൺ പൊള്ളാർഡ് എന്നിവരെ നിലനിര്‍ത്തിയപ്പോള്‍ 15.25 കോടി രൂപയ്‌ക്കാണ് മുംബൈ ഇഷാനെ ലേലത്തില്‍ പിടിച്ചത്. കൈമുട്ട് ശസ്ത്രക്രിയയിൽ നിന്ന് ഇപ്പോഴും സുഖം പ്രാപിക്കുന്ന ജോഫ്ര ആർച്ചര്‍ക്കായി എട്ട് കോടി രൂപയും സംഘം മുടക്കി.
എന്നാല്‍ അഞ്ച് തവണ ചാമ്പ്യൻമാരായ മുംബൈക്ക് സീസണില്‍ അഞ്ച് മത്സരങ്ങള്‍ കഴിഞ്ഞപ്പോള്‍ ഒരു ജയം പോലും നേടാനായിട്ടില്ല. വലിയ തുക മുടക്കി ടീമിലെത്തിച്ച ഇഷാന് ഒരു മത്സരത്തില്‍ പോലും കാര്യമായ നേട്ടമുണ്ടാക്കാനും സാധിച്ചിട്ടില്ല. മുംബൈ ഇന്ത്യൻസ് പോയിന്‍റ് പട്ടികയിൽ ഏറ്റവും താഴെയുള്ളത് തന്നെ അത്ഭുതപ്പെടുത്തിയിട്ടില്ലെന്നും വാട്‌സണ്‍ പറഞ്ഞു.
also read: രാജ്യസഭയിൽ നിന്ന് ലഭിക്കുന്ന ശമ്പളം കർഷകരുടെ പെണ്‍മക്കളുടെ വിദ്യാഭ്യാസത്തിന് നൽകും : ഹർഭജൻ സിങ്
അതേസമയം ചെന്നൈ ടീമിന്‍റെ പോരായ്‌മകളും മുന്‍ താരം കൂടിയായ വാട്‌സണ്‍ ചൂണ്ടിക്കാട്ടി. കഴിഞ്ഞ അഞ്ച് മത്സരങ്ങള്‍ കണ്ടപ്പോഴും ടീമിന്‍റെ പേസ് ബൗളിങ് യൂണിറ്റില്‍ പോരായ്‌മയുണ്ടെന്നാണ് തനിക്ക് തോന്നിയതെന്നും വാട്‌സണ്‍ വ്യക്തമാക്കി.
