ന്യൂഡല്‍ഹി : ഇന്ത്യൻ പ്രീമിയർ ലീഗ് (ഐപിഎല്‍) ക്രിക്കറ്റിന്‍റെ 16ാം സീസണില്‍ നിലവിലെ ചാമ്പ്യന്മാരായ ഗുജറാത്ത് ടൈറ്റന്‍സിന് തുടര്‍ച്ചയായ രണ്ടാം വിജയം ഒരുക്കുന്നതില്‍ നിര്‍ണായകമായ പ്രകടനം നടത്തിയ താരമാണ് സായ് സുദര്‍ശന്‍. ഡല്‍ഹിക്കെതിരായ മത്സരത്തില്‍ 21കാരനായ സായ് സുദര്‍ശന്‍ നേടിയ അപരാജിത അര്‍ധ സെഞ്ചുറിയായിരുന്നു ഗുജറാത്തിന് വിജയം ഉറപ്പിച്ചത്. ഡല്‍ഹി നേടിയ 162 റൺസ് പിന്തുടർന്നിറങ്ങിയ ഗുജറാത്തിന്‍റെ മുന്‍നിര ബാറ്റര്‍മാര്‍ വേഗത്തില്‍ തിരിച്ച് കയറിയപ്പോള്‍ ഒരറ്റത്ത് നിലയുറപ്പിച്ചായിരുന്നു 21കാരന്‍ പൊരുതിയത്.
ഒടുവില്‍ 48 പന്തിൽ നാല് ഫോറുകളും രണ്ട് സിക്‌സും സഹിതം 62* റണ്‍സുമായി പുറത്താവാതെ നിന്നായിരുന്നു താരം ഗുജറാത്തിന്‍റെ വിജയം ഉറപ്പിച്ചത്. ഈ തകര്‍പ്പന്‍ പ്രകടനത്തിന് പിന്നാലെ സായ് സുദര്‍ശനെ അഭിനന്ദിച്ച് രംഗത്തെത്തിയിരിക്കുകയാണ് ഇന്ത്യയുടെ ഇതിഹാസ സ്‌പിന്നര്‍ അനില്‍ കുംബ്ലെ. സായ് സുദര്‍ശന്‍ മികച്ച താരമാണെന്നും പേസിനേയും സ്‌പിന്നിനേയും ഒരു പോലെ നേരിടാന്‍ താരത്തിന് കഴിയുന്നുണ്ടെന്നും ഇന്ത്യയുടെയും പഞ്ചാബ് കിങ്‌സിന്‍റെയും മുന്‍ പരിശീലകന്‍ കൂടിയായ കുംബ്ലെ പറഞ്ഞു.
"അവന്‍ വളരെ മികച്ച താരമാണ്. പേസര്‍മാര്‍ക്കെതിരെയും സ്‌പിന്നര്‍മാര്‍ക്കെതിരെയും നല്ല രീതിയിലാണ് കളിക്കുന്നത്. ആദ്യ മത്സരത്തില്‍ ഒരു ഇംപാക്ട് പ്ലെയറായാണ് അവന്‍ കളിച്ചത്. തീർച്ചയായും ഒരു ഇംപാക്ട് സൃഷ്ടിച്ചു. അവന്‍ ഒരു കാമിയോ റോളാണ് കളിച്ചത്" - അനിൽ കുംബ്ലെ പറഞ്ഞു.
ഗുജറാത്തിനെ മത്സരത്തിലേക്ക് തിരിച്ചെത്തിച്ചത് സായ് സുദര്‍ശനും വിജയ് ശങ്കറും ചേര്‍ന്നാണെന്നും അനില്‍ കുംബ്ലെ കൂട്ടിച്ചേര്‍ത്തു. "ഡല്‍ഹിക്കെതിരെ തുടക്കത്തില്‍ തന്നെ ഗുജറാത്തിന് മൂന്ന് വിക്കറ്റുകള്‍ നഷ്‌ടമായിരുന്നു. പ്രധാന താരങ്ങളാണ് തിരിച്ച് കയറിയത്. ആദ്യം വൃദ്ധിമാന്‍ സാഹയും പിന്നാലെ ശുഭ്‌മാന്‍ ഗില്ലും ക്യാപ്റ്റന്‍ ഹാര്‍ദിക് പാണ്ഡ്യയും പുറത്തായി. തുടര്‍ന്നൊന്നിച്ച തമിഴ്‌നാട് താരങ്ങളാണ് (സായ് സുദര്‍ശന്‍-വിജയ് ശങ്കര്‍) ഗുജറാത്തിനെ മത്സരത്തിലേക്ക് തിരികെ എത്തിച്ചത്" - അനിൽ കുംബ്ലെ വ്യക്തമാക്കി.
ചെന്നൈ സൂപ്പര്‍ കിങ്‌സിനെതിരായ ആദ്യ മത്സരത്തില്‍ ഇംപാക്ട് പ്ലെയറായെത്തിയ സായ് സുദര്‍ശന്‍ 17 പന്തില്‍ 22 റണ്‍സാണ് നേടിയിരുന്നത്. മത്സരത്തില്‍ ഗുജറാത്ത് അഞ്ച് വിക്കറ്റിന്‍റെ വിജയമായിരുന്നു നേടിയത്.
അതേസമയം സ്വന്തം തട്ടകമായ അരുണ്‍ ജയ്‌റ്റ്‌ലി സ്റ്റേഡിയത്തില്‍ നടന്ന മത്സരത്തില്‍ ടോസ് നഷ്‌ടപ്പെട്ട് ബാറ്റ് ചെയ്യാനിറങ്ങിയ ഡല്‍ഹി ക്യാപിറ്റല്‍സ് നിശ്ചിത ഓവറില്‍ എട്ട് വിക്കറ്റ് നഷ്‌ടത്തിലായിരുന്നു 162 റണ്‍സ് നേടിയത്. 32 പന്തില്‍ ഏഴ്‌ ഫോറുകള്‍ സഹിതം 37 റണ്‍സെടുത്ത ക്യാപ്റ്റന്‍ ഡേവിഡ് വാര്‍ണറായിരുന്നു ടോപ് സ്‌കോറര്‍. സര്‍ഫറാസ് ഖാന്‍ (34 പന്തില്‍ 30 റണ്‍സ്), അക്‌സര്‍ പട്ടേല്‍ (22 പന്തില്‍ 36) എന്നിവരും നിര്‍ണായകമായി.
മറുപടിക്കിറങ്ങിയ ഗുജറാത്തിന് പവര്‍പ്ലേയില്‍ തന്നെ മൂന്ന് വിക്കറ്റുകള്‍ നഷ്‌ടമായിരുന്നു. വൃദ്ധിമാന്‍ സാഹ (7 പന്തില്‍ 14), ശുഭ്‌മാന്‍ ഗില്‍ (13 പന്തില്‍ 14), ക്യാപ്റ്റന്‍ ഹാര്‍ദിക് പാണ്ഡ്യ (4 പന്തില്‍ 5) എന്നിവരാണ് വന്നപാടെ മടങ്ങിയത്. സാഹയേയും ഗില്ലിനേയും ആൻറിച്ച് നോർട്ട്ജെ കുറ്റി തെറിപ്പിച്ച് പുറത്താക്കിയപ്പോള്‍ ഹാര്‍ദിക്കിനെ ഖലീല്‍ അഹമ്മദിന്‍റെ പന്തില്‍ വിക്കറ്റ് കീപ്പര്‍ അഭിഷേക് പോറല്‍ പിടികൂടുകയായിരുന്നു.
ALSO READ: 'ശുഭ്‌മാൻ ഗില്ലിനെ കണ്ട് പഠിക്കൂ'; പൃഥ്വി ഷായ്‌ക്ക് ഉപദേശവുമായി വിരേന്ദ്ര സെവാഗ്
തുടര്‍ന്ന് ഒന്നിച്ച സായ് സുദര്‍ശനും വിജയ് ശങ്കറും ഗുജറാത്തിനെ മത്സരത്തിലേക്ക് തിരിച്ച് എത്തിക്കുകയായിരുന്നു. വിജയ് ശങ്കറിനെ (23 പന്തില്‍ 29) പുറത്താക്കി മിച്ചൽ മാർഷ് ഈ കൂട്ടുകെട്ട് പൊളിച്ചെങ്കിലും പിന്നീടെത്തിയ ഡേവിഡ് മില്ലറും (16 പന്തില്‍ 31*) സായ് സുദര്‍ശനും ചേര്‍ന്ന് ഗുജറാത്തിന് രണ്ടാം വിജയം ഉറപ്പിക്കുകയായിരുന്നു.
