അഹമ്മദാബാദ്: ഐപിഎല്‍ പതിനാറാം പതിപ്പിലെ രണ്ടാം ക്വാളിഫയറില്‍ മുംബൈ ഇന്ത്യന്‍സിന് കാര്യങ്ങള്‍ എളുപ്പമാകില്ലെന്ന് മുന്‍ താരവും കമന്‍റേററ്ററുമായ ആകാശ് ചോപ്ര. ഗുജറാത്ത് ടൈറ്റന്‍സിനെ മുംബൈ നിസാരക്കാരായി കാണരുതെന്നും ചോപ്ര അഭിപ്രായപ്പെട്ടു. ഗുജറാത്ത് ടൈറ്റന്‍സ് -മുംബൈ ഇന്ത്യന്‍സ് രണ്ടാം ക്വാളിഫയര്‍ പോരാട്ടത്തിന് മുന്‍പ് തന്‍റെ യൂട്യൂബ് ചാനലിലൂടെ പുറത്തുവിട്ട വീഡിയോയിലാണ് ചോപ്രയുടെ പ്രതികരണം.
നിലവിലെ ചാമ്പ്യന്‍മാരായ ഗുജറാത്ത് ടൈറ്റന്‍സ് പോയിന്‍റ് പട്ടികയിലെ ഒന്നാം സ്ഥാനക്കാരായിട്ടായിരുന്നു പ്ലേഓഫില്‍ ഇടം പിടിച്ചത്. ആദ്യ ക്വാളിഫയറില്‍ ചെന്നൈ സൂപ്പര്‍ കിങ്‌സിനോട് തോല്‍വി വഴങ്ങേണ്ടി വന്നതോടെയാണ് രണ്ടാം ക്വാളിഫയറില്‍ ഹാര്‍ദിക്കിനും സംഘത്തിനും കളിക്കാന്‍ അവസരം ഒരുങ്ങിയത്. മറുവശത്ത് പോയിന്‍റ് പട്ടികയിലെ മൂന്നാം സ്ഥാനക്കാരായ ലഖ്‌നൗവിനെ എലിമിനേറ്ററില്‍ 81 റണ്‍സിന് തോല്‍പ്പിച്ചായിരുന്നു രണ്ടാം ക്വാളിഫയര്‍ കളിക്കാന്‍ മുംബൈ ഇന്ത്യന്‍സ് യോഗ്യത നേടിയത്.
'ഗുജറാത്ത് ടൈറ്റന്‍സിനെ മുംബൈ ഇന്ത്യന്‍സ് ഒരിക്കലും നിസാരക്കാരായി കാണരുത്. ടൂര്‍ണമെന്‍റിലുടനീളം പോയിന്‍റ് പട്ടികയില്‍ ഒന്നാം സ്ഥാനത്തിരിക്കാന്‍ ഹാര്‍ദിക്കിനും കൂട്ടര്‍ക്കുമായി. ഒന്നാം സ്ഥാനം പിടിച്ച ശേഷം പിന്നീട് അവര്‍ താഴേക്ക് പോയിട്ടില്ല. എളുപ്പത്തിലാണ് അവര്‍ പ്ലേഓഫ് യോഗ്യതയും നേടിയത്' ആകാശ് ചോപ്ര പറഞ്ഞു.
'അവസാന മത്സരം ജയിക്കാന്‍ ഗുജറാത്തിന് മേല്‍ അധികം സമ്മര്‍ദം ഒന്നുമുണ്ടായിരുന്നില്ല. ഇന്ന് ആവേശകരമായൊരു മത്സരം നടക്കുമെന്നാണ് ഞാന്‍ പ്രതീക്ഷിക്കുന്നത്. രണ്ട് ടീമുകള്‍ക്കും 50-50 ചാന്‍സാണ് ഇന്നുള്ളത്. നന്നായി കളിക്കുന്നവര്‍ ജയം പിടിക്കും' ചോപ്ര കൂട്ടിച്ചേര്‍ത്തു.
മുംബൈ ഓപ്പണര്‍മാരായ ഇഷാന്‍ കിഷനും രോഹിത് ശര്‍മ്മയ്‌ക്കും വെല്ലുവിളി ഉയര്‍ത്താന്‍ ഗുജറാത്ത് പേസര്‍ മുഹമ്മദ് ഷമിക്ക് സാധിക്കുമെന്നും ആകാശ് ചോപ്ര പറഞ്ഞു. ഈ സീസണില്‍ വിക്കറ്റ് വേട്ടയില്‍ മുന്നിലുള്ള താരമാണ് ഷമി. 15 മത്സരങ്ങളില്‍ നിന്നും 26 വിക്കറ്റുകളാണ് ഗുജറാത്തിന്‍റെ വലംകയ്യന്‍ പേസര്‍ ഇതുവരെ സ്വന്തമാക്കിയിട്ടുള്ളത്.
'മുംബൈയുടെ ഓപ്പണര്‍മാര്‍ക്കെതിരെ മുഹമ്മദ് ഷമി എങ്ങനെ പന്തെറിയും എന്നത് കാണാന്‍ വേണ്ടിയാണ് ഞാന്‍ കാത്തിരിക്കുന്നത്. ഇരു ടീമും തമ്മിലേറ്റുമുട്ടിയ അവസാന മത്സരത്തില്‍ ഒരു വിക്കറ്റ് പോലും സ്വന്തമാക്കാന്‍ ഷമിക്കായിരുന്നില്ല. എന്നാല്‍ ആ മത്സരത്തില്‍ മുംബൈ ബാറ്റര്‍മാരെ വെള്ളം കുടിപ്പിക്കാന്‍ ഷമിക്കായിരുന്നു.
അന്നത്തെ പ്രകടനം നോക്കിയാല്‍ അവന് രണ്ട് മൂന്ന് വിക്കറ്റുകള്‍ നേടാന്‍ സാധിക്കുമായിരുന്നു. ഷമിയുടെ പന്തുകളില്‍ ബാറ്റ് കൊള്ളിക്കാന്‍ മുംബൈ ബാറ്റര്‍മാര്‍ നന്നേ പാടുപെട്ടു. നിര്‍ഭാഗ്യവശാല്‍ അത് അയാളുടെ ദിവസമായിരുന്നില്ല. അതുകൊണ്ട് മാത്രമാണ് അന്ന് ഷമിക്ക് വിക്കറ്റുകള്‍ നേടാന്‍ കഴിയാതിരുന്നത്' ആകാശ് ചോപ്ര അഭിപ്രായപ്പെട്ടു.
