മുംബൈ: വിരാട്‌ കോലിയുടെ നേതൃത്വത്തിലുള്ള ഇന്ത്യന്‍ ടീമില്‍ താന്‍ കളിച്ചിരുന്നെങ്കില്‍ തങ്ങള്‍ ലോകകപ്പ് നേടുമായിരുന്നുവെന്ന് മുന്‍ പേസര്‍ എസ്‌.ശ്രീശാന്ത്. സഞ്ജു സാംസണും സച്ചിൻ ബേബിയും ഉൾപ്പെടെ താൻ വഴികാട്ടിയവരെല്ലാം കായികരംഗത്ത് മികച്ച പ്രകടനം കാഴ്ചവെക്കുന്നുണ്ടെന്നും ശ്രീശാന്ത് പറഞ്ഞു. ഷെയർചാറ്റിന്‍റെ ഓഡിയോ ചാറ്റ്റൂമിലാണ് ശ്രീശാന്തിന്‍റെ പ്രതികരണം.
2011ലെ ഏകദിന ലോകകപ്പ് തങ്ങള്‍ സച്ചിൻ ടെണ്ടുൽക്കറിന് വേണ്ടിയാണ് നേടിയതെന്നും ശ്രീശാന്ത് കൂട്ടിച്ചേര്‍ത്തു. 2005 ഒക്ടോബറില്‍ ഇന്ത്യന്‍ കുപ്പായത്തില്‍ അരങ്ങേറ്റം നടത്തിയ മലയാളി താരം ടീമിന്‍റെ രണ്ട് ലോകകപ്പ് നേട്ടങ്ങളില്‍ പ്രധാനിയാണ്. 2007ലെ പ്രഥമ ടി20 ലോകകപ്പും, 2011ലെ ഏകദിന ലോകകപ്പും നേടിയ ഇന്ത്യന്‍ ടീമുകളിലായിരുന്നു ശ്രീശാന്ത് ഭാഗമായിരുന്നത്.
2013ലെ ഐപിഎല്ലുമായി ബന്ധപ്പെട്ട ഒത്തുകളി വിവാദമാണ് ശ്രീശാന്തിന്‍റെ കരിയര്‍ മാറ്റിമറിക്കുന്നത്. തുടര്‍ന്ന് ഐസിസി വിലക്കിയ താരം കാലാവധി അവസാനിച്ചതോടെ 2020 സെപ്റ്റംബറിന് ശേഷം കേരള ടീമിലൂടെ ക്രിക്കറ്റിലേക്ക് മടങ്ങിയെത്തിയിരുന്നു. എന്നാല്‍ ഈ വര്‍ഷം മാര്‍ച്ചില്‍ ആഭ്യന്തര ക്രിക്കറ്റില്‍ നിന്നും വിരമിക്കുന്നതായ്‌ ശ്രീശാന്ത് പ്രഖ്യാപിച്ചിരുന്നു.
അതേസമയം 2019 ഏകദിന ലോകകപ്പ്, 2021 ടി20 ലോകകപ്പ് എന്നിവയിലാണ് കോലി ഇന്ത്യയെ നയിച്ചത്. ഏകദിന ലോകകപ്പില്‍ സെമിയിലും, ടി20 ലോകകപ്പില്‍ ഗ്രൂപ്പ് ഘട്ടത്തിലും ഇന്ത്യ പുറത്തായിരുന്നു.
also read: ജൂലൻ ഗോസ്വാമിയെ നെറ്റ്സിൽ നേരിട്ട് രാഹുല്‍ ; വീഡിയോ
