മുംബൈ : ഏകദിന ക്രിക്കറ്റ് ലോകകപ്പ് (Cricket World Cup 2023) ഫൈനലിലെ ഇന്ത്യ ഓസ്‌ട്രേലിയ സൂപ്പര്‍ പോരാട്ടത്തിന് വേണ്ടിയുള്ള കാത്തിരിപ്പിലാണ് കളിയാസ്വാദകര്‍ (India vs Australia Final). നവംബര്‍ 19ന് അഹമ്മദാബാദിലെ നരേന്ദ്ര മോദി സ്റ്റേഡിയത്തിലാണ് കലാശപ്പോരാട്ടം. മൂന്നാം കിരീടം തേടി ഇന്ത്യയിറങ്ങുമ്പോള്‍ ലോകകപ്പിലെ ആറാം കിരീടമാണ് മൈറ്റി ഓസീസിന്‍റെ ലക്ഷ്യം.
റൗണ്ട് റോബിന്‍ ഫോര്‍മാറ്റില്‍ നടന്ന ടൂര്‍ണമെന്‍റില്‍ കളിച്ച മത്സരങ്ങളെല്ലാം ജയിച്ച ഏക ടീം ഇന്ത്യയാണ്. ഒന്‍പത് എതിരാളികള്‍ക്കെതിരെയും വ്യക്തമായ മേധാവിത്വത്തോടെ തന്നെ ജയം പിടിക്കാന്‍ ഇന്ത്യയ്‌ക്കായിരുന്നു. ഇതുവരെയുള്ള ഓരോ ജയങ്ങളിലും ഓരോ താരങ്ങള്‍ക്കും ടീമിനായി അവരുടേതായ സംഭാവന നല്‍കാന്‍ സാധിച്ചിട്ടുണ്ട്.
രോഹിത് ശര്‍മ, ശുഭ്‌മാന്‍ ഗില്‍ എന്നിവര്‍ ചേര്‍ന്നൊരുക്കുന്ന തുടക്കവും വിരാട് കോലിയുടെ ആങ്കര്‍മാന്‍ റോളും, ശ്രേയസ്, മുഹമ്മദ് ഷമി, ജസ്പ്രീത് ബുംറ എന്നിവരുടെ വിക്കറ്റ് വേട്ടയുമെല്ലാം ഇന്ത്യന്‍ ജയത്തില്‍ നിര്‍ണായക പങ്കാണ് വഹിച്ചത്. ഫൈനലില്‍ ഇന്ത്യയുടെ ഹീറോ ആരാകുമെന്നാണ് ആരാധകര്‍ ഇപ്പോള്‍ ഉറ്റുനോക്കുന്നത്. ഇതിനിടെയാണ് ഫൈനലില്‍ ടീം ഇന്ത്യയുടെ ഗെയിം ചേഞ്ചറെ പ്രവചിച്ച് മുന്‍ താരം ഗൗതം ഗംഭീര്‍ രംഗത്തെത്തിയിരിക്കുന്നത്.
അഹമ്മദാബാദില്‍ ഓസ്‌ട്രേലിയക്കെതിരായ ഫൈനലില്‍ ഇന്ത്യയുടെ ഗെയിംചേഞ്ചറായി മാറാന്‍ സാധ്യതയുള്ളത് ശ്രേയസ് അയ്യരാണെന്നാണ് ഗംഭീറിന്‍റെ അഭിപ്രായം. സ്റ്റാര്‍ സ്പോര്‍ട്‌സ് ചര്‍ച്ചയ്‌ക്കിടെയായിരുന്നു ഇന്ത്യന്‍ മുന്‍ താരം ഇത്തരത്തിലൊരു പ്രതികരണം നടത്തിയത്.
'എന്നെ സംബന്ധിച്ചിടത്തോളം ഈ ലോകകപ്പില്‍ ടീം ഇന്ത്യയുടെ ഏറ്റവും വലിയ ഗെയിം ചേഞ്ചര്‍ ശ്രേയസ് അയ്യരാണ്. ഏറെ നാള്‍ അവന്‍ പരിക്കേറ്റ് പുറത്തിരിക്കേണ്ടി വന്നു, പിന്നീട് തന്‍റെ സ്ഥാനത്തിനായി അവന്‍ പോരാടി. നോക്ക് ഔട്ട് മത്സരത്തില്‍ 70 പന്തില്‍ സെഞ്ച്വറി നേടുക എന്നത് അസാമാന്യമായ കാര്യമാണ്.
ഫൈനലില്‍ സാംപ, മാക്‌സ്‌വെല്‍ എന്നിവരെല്ലാം ഓസീസിനായി പന്തെറിയും. ഈ സാഹചര്യത്തില്‍ നാലാം നമ്പറില്‍ ക്രീസിലേക്ക് എത്തുന്ന ശ്രേയസ് അയ്യര്‍ ആയിരിക്കും ഇന്ത്യയുടെ വജ്രായുധം'- ഗൗതം ഗംഭീര്‍ അഭിപ്രായപ്പെട്ടു.
തുടക്കത്തില്‍ നിറം മങ്ങിയ പ്രകടനം കാഴ്‌ചവച്ചിരുന്നെങ്കിലും ലോകകപ്പില്‍ തകര്‍പ്പന്‍ ഫോമിലാണ് ശ്രേയസ് അയ്യരിപ്പോള്‍. സെമി ഫൈനല്‍ ഉള്‍പ്പടെ ഇന്ത്യ കളിച്ച 10 മത്സരങ്ങളിലും കളത്തിലിറങ്ങിയ ശ്രേയസ് 523 റണ്‍സ് ഇതുവരെ നേടി. രണ്ട് സെഞ്ച്വറികളും മൂന്ന് അര്‍ധസെഞ്ച്വറികളും അടിച്ചെടുക്കാനും ഇന്ത്യന്‍ മിഡില്‍ ഓര്‍ഡര്‍ ബാറ്റര്‍ക്ക് സാധിച്ചിട്ടുണ്ട്.
