വിരാട് കോലി, രോഹിത് ശർമ, ചേതേശ്വർ പുജാര, അജിങ്ക്യ രഹാനെ, കെഎല്‍ രാഹുല്‍, റിഷഭ് പന്ത്, ജസ്‌പ്രീത് ബുംറ, ഇശാന്ത് ശർമ, മുഹമ്മദ് ഷമി, രവി അശ്വിൻ, രവി ജഡേജ.. ഇനിയുമുണ്ട് താരപ്പേരുകൾ... ഇന്ത്യ ഇംഗ്ലണ്ടിലേക്ക് അയയ്ക്കുന്നത് മേല്‍പറഞ്ഞ ഒന്നാം നമ്പർ താരങ്ങൾ അടങ്ങിയ ടീമിനെ... ഇംഗ്ലണ്ടില്‍ കളിക്കാനുള്ളത് ലോക ടെസ്റ്റ് ചാമ്പ്യൻഷിപ്പ് ഫൈനല്‍.. അതിനു ശേഷം ഇംഗ്ലണ്ടുമായി ടെസ്റ്റ് പരമ്പര. ടീം ഇന്ത്യ ഇംഗ്ളണ്ടിലേക്ക് പോകുമ്പോൾ ഒരു പിടി യുവതാരങ്ങൾ നാട്ടില്‍ വെറുതെ ഇരിക്കുകയാണെന്ന് വിചാരിക്കരുത്. അവർക്ക് വലിയ അവസരം നല്‍കാൻ തന്നെയാണ് ബിസിസിഐ തീരുമാനം. ശ്രീലങ്കയില്‍ മൂന്ന് ഏകദിനങ്ങളും മൂന്ന് ടി20യും അടങ്ങുന്ന പരമ്പരയ്ക്കായി വമ്പൻമാരില്ലാത്ത ടീമിനെ ഇന്ത്യ അയയ്ക്കുകയാണ്. വമ്പൻമാരില്ലെങ്കിലും ശ്രീലങ്കയിലേക്ക് പോകുന്ന ടീമില്‍ പലരും ഒന്നാം നമ്പർ ടീമിനൊപ്പം കളിച്ച് തഴക്കം വന്നവർ. ലിമിറ്റഡ് ഓവർ ക്രിക്കറ്റില്‍ ലോകോത്തര താരങ്ങളാണ് അവരില്‍ പലരും.
ശിഖർ ധവാൻ, പൃഥ്വി ഷാ, സഞ്ജു സാംസൺ, സൂര്യ കുമാർ യാദവ്, മനീഷ് പാണ്ഡെ, ഹാർദിക് പാണ്ഡ്യ, വിജയ് ശങ്കർ, ഭുവനേശ്വർ കുമാർ, നവദീപ് സെയ്‌നി, ഖലീല്‍ അഹമ്മദ്, യുസ്‌വേന്ദ്ര ചാഹല്‍, കുല്‍ദീപ് യാദവ് അടക്കം പ്രമുഖരും ഇതുവരെ ഇന്ത്യയ്ക്കായി കളിച്ചിട്ടില്ലാത്ത യുവതാരങ്ങളും അടങ്ങിയതാണ് ശ്രീലങ്കയിലേക്ക് പോകുന്ന ഇന്ത്യയുടെ ബി ടീം.
ആരാകും നായകൻ
ശിഖർ ധവാൻ
ശിഖർ ധവാൻ എന്ന പേരിന് തന്നെയാണ് നായക സ്ഥാനത്തേക്ക് മുൻഗണന. ഐപിഎല്ലിലും ആഭ്യന്തര ടൂർണമെന്‍റുകളിലും ഡല്‍ഹി അടക്കമുള്ള ടീമുകളെ നയിച്ച് മുൻപരിചയം. ഇപ്പോൾ നടക്കുന്ന ഐപിഎല്ലിലെ മികച്ച ഫോം എല്ലാം ധവാന് അനുകൂല ഘടകമാണ്. മികച്ച ഫോം പുറത്തെടുത്താല്‍ വരാനിരിക്കുന്ന ടി 20 ലോകകപ്പില്‍ ഇന്ത്യൻ ടീമിലെത്തനുള്ള അവസരവുമുണ്ട്.
പൃഥ്വി ഷാ
ഇന്ത്യൻ ടെസ്റ്റ് ടീമിന്‍റെ ഭാഗമായിരുന്ന യുവതാരം മുൻ ഇന്ത്യൻ അണ്ടർ 19 നായകൻ കൂടിയാണ്. ഫോം നഷ്ടമായതിന്‍റെ പേരില്‍ ടീമില്‍ നിന്ന് പുറത്തായ ഷായ്ക്ക് ഇന്ത്യൻ സീനിയർ ടീമിലേക്ക് തിരിച്ചെത്താനുള്ള സുവർണാവരമാണിത്
സഞ്ജു സാംസൺ
ഇന്ത്യൻ ടീമിലേക്ക് വരും.. പക്ഷേ അന്തർദേശീയ മത്സരങ്ങളില്‍ തിളങ്ങാതെ പുറത്തുപോകും.. നിലവില്‍ രാജസ്ഥാൻ റോയല്‍സിന്‍റെ നായകനായ സഞ്ജുവിനെയും ബി ടീമിന്‍റെ നായകനായി പരിഗണിക്കാൻ സാധ്യതയുണ്ട്.
മനീഷ് പാണ്ഡെ
പല തവണ ഇന്ത്യൻ എ ടീമിനെ നയിച്ച് നിരവധി വിജയങ്ങൾ സ്വന്തമാക്കിയ താരം. ആഭ്യന്തര ക്രിക്കറ്റില്‍ മികച്ച പ്രകടനം നടത്തി ദേശീയ ടീമിന്‍റെ ഭാഗമായിട്ടും സ്ഥിരത പുലർത്തിയിട്ടില്ല. ശ്രീലങ്കൻ പര്യടനത്തില്‍ നായകനായി പരിഗണിക്കാൻ സാധ്യതയുള്ളവരില്‍ പ്രധാനി.
ഹാർദിക് പാണ്ഡ്യ
ഓൾറൗണ്ടർ എന്ന നിലയില്‍ ലിമിറ്റഡ് ഓവർ ക്രിക്കറ്റിലും ടെസ്റ്റ് ടീമിലും ഇന്ത്യയുടെ അവിഭാജ്യതാരം. പരിക്കും ജോലി ഭാരവുമാണ് ഹാർദികിനെ നിലവിലെ സീനിയർ ടീമില്‍ നിന്ന് ഒഴിവാക്കാൻ കാരണം. ഹാർദികിന്‍റെ പരിചയ സമ്പത്ത് ശ്രീലങ്കൻ പര്യടനത്തില്‍ ഇന്ത്യക്ക് ഗുണകരമാകും. നായകനാകാനും യോഗ്യൻ.
ഭുവനേശ്വർ കുമാർ
ഇന്ത്യൻ സീനിയർ ടീമിലെ സ്ഥിരാംഗമായിരുന്ന ഭുവനേശ്വർ പരിക്കിനെ തുടർന്ന് ടീമില്‍ നിന്ന് പുറത്തായി. തിരിച്ചുവരവിനായി ശ്രീലങ്കൻ പര്യടനത്തിലെ പ്രകടനം നിർണായകമാകും. പരിചയ സമ്പത്ത് നായക ശേഷിയിലും ഉപയോഗിക്കാം.
അവസരം കാത്ത് ഇവർ
ഹർഷല്‍ പട്ടേല്‍, ചേതൻ സകാരിയ, വരുൺ ചക്രവർത്തി, രാഹുല്‍ തെവാത്തിയ, ദേവ്‌ദത്ത് പടിക്കല്‍, റിതുരാജ് ഗെയ്‌ക്‌വാദ്.. ഈ പേരുകൾ ഐപിഎല്‍ മത്സരങ്ങൾ വഴി ഇന്ത്യയിലെ ക്രിക്കറ് ആരാധകർക്ക് സുപരിചിതമാണ്. ദേശീയ ടീമിലേക്ക് അവസരത്തിനായി കാത്തിരിക്കുന്നവർ. ഐപിഎല്ലില്‍ മികച്ച പ്രകടനം കൊണ്ട് ആരാധകരെ സൃഷ്ടിച്ചവർ. ഇവർക്ക് ഏകദിനത്തിലും ടി20യിലും അവസരം ലഭിച്ചാല്‍ ടീം ഇന്ത്യയ്ക്കായി മികച്ച പ്രകടനം പ്രതീക്ഷിക്കാം.
സീനിയർ ടീമിന്‍റെ പടിക്കല്‍
ജയദേവ് ഉനദ്കട്, ഖലീല്‍ അഹമ്മദ്, ദീപക് ചാഹർ, നവദീപ് സെയിനി, യുസ്‌വേന്ദ്ര ചാഹല്‍, കുല്‍ദീപ് യാദവ്, രാഹുല്‍ ചാഹർ, ശിവം ദുബെ, വിജയ് ശങ്കർ, ക്രുണാല്‍ പാണ്ഡ്യ, ഇഷാൻ കിഷൻ... ടി20യിലും ഏകദിനത്തിലും ഒരു മത്സരത്തിലെങ്കിലും ഇന്ത്യയ്ക്കായി കളിച്ചവരാണ് ഇവരെല്ലാം.. മുൻനിര താരങ്ങൾക്ക് പരിക്കേല്‍ക്കുമ്പോൾ മാത്രം അവസരം ലഭിച്ചവർ.. ശ്രീലങ്കൻ പര്യടനം ഇവർക്ക് അവസരവും അനുഗ്രഹവുമാകും. വരാനിരിക്കുന്ന ടി20 ലോകകപ്പിനുള്ള ദേശീയ സീനിയർ ടീമിലേക്ക് താരങ്ങളെ കണ്ടെത്താനുള്ള പരീക്ഷണ വേദിയായാണ് ബിസിസിഐ ഈ ജൂലായ് മാസത്തില്‍ നടക്കുന്ന ശ്രീലങ്കൻ പര്യടനത്തെ കാണുന്നത്. വരാനിരിക്കുന്നത് ഇന്ത്യൻ ക്രിക്കറ്റിന്‍റെ വസന്തകാലമാകുമെന്ന് പ്രതീക്ഷിക്കാം.
