സാന്‍ഫ്രാന്‍സിസ്‌കോ: പ്രതിമാസ വരിക്കാര്‍ക്കായി പുതിയ ഫീച്ചറുകള്‍ അവതരിപ്പിച്ച് ട്വിറ്റര്‍. ബ്ലൂ സബ്‌സ്‌ക്രൈബർമാരുടെ ട്വീറ്റുകൾക്ക് മുൻഗണന, ഒരു മണിക്കൂർ വരെ ദൈർഘ്യമുള്ള വീഡിയോകൾ അപ്‌ലോഡ് ചെയ്യാനുള്ള സൗകര്യം തുടങ്ങിയവയാണ് ഫീച്ചറുകള്‍. സെര്‍ച്ചിങ്, റിപ്ലൈ, മെന്‍ഷന്‍ എന്നിവയില്‍ സബ്‌സ്‌ക്രൈബര്‍മാര്‍ക്ക് മുന്‍ഗണന തുടങ്ങിയവ ഉറപ്പുവരുത്തുമെന്ന് ഇലോണ്‍ മസ്‌ക് നേരത്തെ വ്യക്തമാക്കിയിരുന്നു.
ഇതിന് പിന്നാലെ ഈ മാസം ആദ്യം സ്‌പാം, ബോട്ടുകള്‍ എന്നിവയുട സാന്നിധ്യം കുറയ്‌ക്കുന്നതിനായി വരിക്കാര്‍ക്ക് മുന്‍ഗണന റാങ്കിങ് ഉള്‍പ്പടെയുള്ള മാറ്റങ്ങള്‍ കൊണ്ട് വരുമെന്ന് ട്വിറ്റര്‍ അറിയിച്ചിരുന്നു. ഇതിന് പിന്നാലെയാണ് മൈക്രോ ബ്ലോഗിങ് സൈറ്റില്‍ പുതിയ ഫീച്ചറുകള്‍ അവതരിപ്പിച്ചിരിക്കുന്നത്.
പുതിയ മാറ്റങ്ങള്‍ വരുന്നതോട് കൂടി ദൈര്‍ഘ്യമേറിയ വീഡിയോ ഫയലുകളും ഉപയോക്താക്കള്‍ക്ക് ട്വിറ്റര്‍ വെബിലൂടെ അപ്‌ലോഡ് ചെയ്യാന്‍ സാധിക്കും. 1080p റെസല്യൂഷനില്‍ 60 മിനിട്ടോളം ദൈര്‍ഘ്യമുള്ള 2GB ഫയലുകള്‍ അപ്‌ലോഡ് ചെയ്യാനുള്ള സൗകര്യമാണ് ട്വിറ്റര്‍ ഒരുക്കുക. നേരത്തെ 512MB സൈസില്‍ 10 മിനിട്ട് മാത്രം ദൈര്‍ഘ്യമുള്ള വീഡിയോകള്‍ മാത്രമായിരുന്നു അപ്‌ലോഡ് ചെയ്യാന്‍ കഴിഞ്ഞിരുന്നത്.
അതേസമയം വെബില്‍ മാത്രമാണ് പുതിയ ഫീച്ചര്‍ ലഭ്യമാകുക. ആന്‍ഡ്രോയിഡിലും, ഐഒഎസിലും പഴയ പരിധി ഇപ്പോഴും ബാധകമാണ്.
