അബുജ (നൈജീരിയ) : വടക്കൻ നൈജീരിയയിൽ വിവാഹ ചടങ്ങിൽ പങ്കെടുത്ത് മടങ്ങുകയായിരുന്ന കുട്ടികളടക്കം 103 പേർ ബോട്ട് മറിഞ്ഞ് മരിച്ചു. തിങ്കളാഴ്‌ച പുലർച്ചെ ഇലോറിനിൽ നിന്ന് 160 കിലോമീറ്റർ അകലെ നൈജർ നദിയിലാണ് ബോട്ടപകടം ഉണ്ടായത്. ബോട്ടിൽ 300 ഓളം ആളുകൾ സഞ്ചരിച്ചിരുന്നതായാണ് വിവരം.
മരിച്ചവരിൽ ഭൂരിഭാഗവും ബന്ധുക്കൾ : ഇതിൽ 100 ഓളം പേരെ ഇതുവരെ രക്ഷപ്പെടുത്തിയതായും മറ്റുള്ളവർക്കായി തെരച്ചിൽ പുരോഗമിക്കുകയാണെന്നും പൊലീസ് ഉദ്യോഗസ്ഥൻ ഒകാസൻമി അജയ് അറിയിച്ചു. മുങ്ങിമരിച്ചവരിൽ ഭൂരിഭാഗവും ബന്ധുക്കളാണ്. എല്ലാവരും ഒന്നിച്ച് നൈജറിലെ എഗ്ബോട്ടി ഗ്രാമത്തിൽ നടന്ന വിവാഹ ചടങ്ങിൽ പങ്കെടുത്ത് മടങ്ങവെയാണ് അപകടം ഉണ്ടായത്.
മോട്ടോർ സൈക്കിളിലാണ് അതിഥികൾ വിവാഹ ചടങ്ങിനെത്തിയത്. എന്നാൽ മഴയെത്തുടർന്ന് റോഡിൽ വെള്ളം കയറിയതിനാൽ പ്രാദേശികമായി നിർമിച്ച ബോട്ടിൽ തിരികെ മടങ്ങുകയായിരുന്നു. നദിയിൽ വച്ച് ബോട്ട് വലിയ മരത്തടിയിൽ തട്ടി രണ്ടായി പിളർന്നതാണ് അപകടത്തിന് കാരണമായത്. പുലർച്ചെ മൂന്ന് മണിയോടെയാണ് അപകടമുണ്ടായത്.
അപകടമുണ്ടായപ്പോൾ സമീപത്തുള്ള ഗ്രാമാവാസികളാണ് ആദ്യം രക്ഷപ്രവർത്തനം നടത്തിയത്. നൈജീരിയയിലെ ഏറ്റവും വലിയ നദികളിലൊന്നാണ് നൈജർ. അതിനാൽ രക്ഷപ്രവർത്തനം ദുഷ്‌കരമായിരുന്നു. കാണാതായവർക്കായി ഇന്ന് രാത്രി വരെ തെരച്ചിൽ തുടരുമെന്നാണ് പൊലീസ് വൃത്തങ്ങൾ അറിയിച്ചത്.
പ്രാദേശിക ബോട്ടുകൾ അപകടത്തിന് കാരണം : ഇതുവരെ കണ്ടെടുത്ത മൃതദേഹങ്ങൾ പ്രാദേശിക ആചാരങ്ങൾക്കനുസൃതമായി നദിക്ക് സമീപം തന്നെ അടക്കം ചെയ്‌തു. നൈജീരിയയിലുടനീളമുള്ള പല വിദൂര കമ്മ്യൂണിറ്റികളിലും ബോട്ട് അപകടങ്ങൾ സാധാരണമാണ്. പ്രാദേശികമായി ഉപയോഗിക്കുന്ന ബോട്ടുകളാണ് ഗതാഗതത്തിനായി ഇവിടെ ഉപയോഗിക്കുന്നത്. അമിതഭാരവും അറ്റകുറ്റപ്പണികൾ നടത്താത്ത ബോട്ടുകളുടെ ഉപയോഗവുമാണ് മിക്ക അപകടങ്ങൾക്കും കാരണം.
ഓസ്‌ട്രേലിയയിൽ ബസ് അപകടം : കഴിഞ്ഞ മാസം ഓസ്‌ട്രേലിയയിൽ വിവാഹച്ചടങ്ങിൽ പങ്കെടുത്ത് മടങ്ങിയവർ സഞ്ചരിച്ച ബസ് മറിഞ്ഞ് 10 പേർ മരിച്ചിരുന്നു. സിഡ്‌നിക്ക് വടക്ക് ഭാഗത്ത് ന്യൂ സൗത്ത് വെയിൽസിലെ ഹണ്ടർ വാലി (hunter) മേഖലയിൽ മെയ് ആറിനാണ് അപകടം നടന്നത്. അപകടത്തിൽ 25 പേർക്ക് പരിക്കേറ്റിരുന്നു.
50ഓളം പേർ ബസിൽ ഉണ്ടായിരുന്നതായാണ് വിവരം. വാൻഡിൻ എസ്റ്റേറ്റ് വൈനറിയിൽ നടന്ന വിവാഹച്ചടങ്ങിൽ പങ്കെടുത്ത ശേഷം ഹണ്ടർ വാലി പട്ടണമായ സിംഗിൾടണിലെ താമസസ്ഥലത്തേക്ക് മടങ്ങുമ്പോഴായിരുന്നു അപകടം നടന്നത്. സംഭവത്തിൽ ബസ് ഡ്രൈവറായ 58 കാരനെ പൊലീസ് അറസ്റ്റ് ചെയ്‌തിരുന്നു.
