അബുജ (നൈജീരിയ): നൈജീരിയയിലെ അനധികൃത എണ്ണ ശുദ്ധീകരണശാലയിലുണ്ടായ സ്‌ഫോടനത്തിൽ നൂറിലധികം പേർ കൊല്ലപ്പെട്ടു. തെക്കൻ സംസ്ഥാനമായ ഇമോയ്ക്കും നദികൾക്കും ഇടയിലുള്ള അതിർത്തി പ്രദേശമായ എഗ്ബെമ ലോക്കൽ ഗവൺമെന്‍റ് ഏരിയയിലെ എണ്ണ ശുദ്ധീകരണശാലയിലാണ് സ്‌ഫോടനമുണ്ടായത്.
ബങ്കറിങ് സൈറ്റിലുണ്ടായ തീപിടിത്തമാണ് സ്‌ഫോടനത്തിന് കാരണമായത്. എണ്ണ ശുദ്ധീകരണശാലയുടെ നടത്തിപ്പുകാരനെതിരെ ലുക്ക്ഔട്ട് നോട്ടീസ് പുറപ്പെടുവിച്ചിട്ടുണ്ടെന്ന് ഇമോയിലെ പെട്രോളിയം വിഭവങ്ങളുടെ കമ്മിഷണറായ ഗുഡ്‌ലക്ക് ഒപിയ പറഞ്ഞു. ഇതുവരെ 108 മൃതദേഹങ്ങളാണ് കണ്ടെടുത്തത്. വലിയ ശബ്‌ദത്തോടെയുണ്ടായ സ്‌ഫോടനത്തെ തുടർന്ന് പ്രദേശമാകെ കറുത്ത പുക പടർന്നു.
എണ്ണക്കമ്പനികളുടെ ഉടമസ്ഥതയിലുള്ള പൈപ്പ്‌ലൈനുകളിൽ നിന്ന് ക്രൂഡ് ഓയിൽ ചോർത്തിയെടുത്ത് മറ്റ് ടാങ്കുകളിലേക്ക് മാറ്റിയാണ് ഇത്തരം അനധികൃത എണ്ണ ശുദ്ധീകരണശാലകൾ പ്രവർത്തിക്കുന്നത്. നൈജീരിയയിൽ തുടർച്ചയായി റിപ്പോർട്ട് ചെയ്യപ്പെടുന്ന ഇത്തരം എണ്ണ മോഷണം വലിയ തരത്തിലുള്ള സാമ്പത്തിക നഷ്‌ടമാണ് ഉണ്ടാക്കുന്നത്.
