ഇന്ത്യന്‍ റവന്യൂ സര്‍വീസ് ഉദ്യോഗസ്ഥന്‍ പ്രതിയായ അനധികൃത സ്വത്ത് സമ്പാദന കേസിൽ (Illegal acquisition case) എന്‍ഫോഴ്‌സ്‌മെന്‍റ് ഡയറക്‌ടറേറ്റ് (Enforcement Directorate) ചോദ്യം ചെയ്‌തതിന് പിന്നാലെ നടി നവ്യ നായർക്കെതിരെ വ്യാപകമായ സൈബർ അധിക്ഷേപങ്ങളാണ് സമൂഹമാധ്യമങ്ങളിലൂടെ തുടരുന്നത്. ഇപ്പോഴിതാ സംഭവത്തിൽ പ്രതികരിച്ചിരിക്കുകയാണ് നവ്യ. തനിക്ക് പിന്തുണ അറിയിച്ച് ആരാധകരില്‍ ഒരാള്‍ എഴുതിയ കുറിപ്പ് തന്‍റെ ഇൻസ്റ്റഗ്രാം സ്റ്റോറിയായി പങ്കുവയ്‌ക്കുകയായിരുന്നു താരം (Navya Nair's Post Against Media Terrorism).
നബീര്‍ ബേക്കര്‍ എന്ന ആൾ എഴുതിയ കുറിപ്പാണ് നവ്യ പങ്കുവച്ചത്. കുറിപ്പില്‍ നബീര്‍ ബേക്കര്‍ താരത്തെ ടാഗ് ചെയ്‌തിട്ടുമുണ്ട്. ജനാധിപത്യത്തിന്‍റെ നാലാം തൂണ്‍ പൗരന്മാരെ മാനസികമായി കൊല്ലുകയാണെന്നും പ്രത്യേകിച്ച് ഇര സ്‌ത്രീയാകുമ്പോള്‍ വാര്‍ത്തകള്‍ കാട്ടു തീ പോലെ പടരുമെന്നും കുറിപ്പിൽ പറയുന്നു. തിരുത്താന്‍ കഴിയാത്ത തെറ്റാണ് മാധ്യമ ഭീകരതയെന്നും കുറിപ്പ് വ്യക്തമാക്കുന്നു.
നവ്യ പങ്കുവച്ച കുറിപ്പിലെ വാക്കുകൾ ഇങ്ങനെ : ‘മാധ്യമങ്ങളില്‍ കഴിഞ്ഞ കുറച്ച് ദിവസമായി വ്യാജ വാര്‍ത്തകള്‍ പ്രചരിക്കുകയാണ്. എന്‍ഫോഴ്‌സ്‌മെന്‍റ് ഡയറക്‌ടറേറ്റ് ഉദ്യോഗസ്ഥര്‍ തന്നെ ആ വാര്‍ത്ത നിഷേധിച്ചിട്ടും മാധ്യമങ്ങള്‍ അത് പിന്തുടർന്നതോടെ അത് മുങ്ങിപ്പോവുകയും ചെയ്‌തു.
പൗരന്മാരെ മാനസികമായി കൊല്ലുകയാണ് ജനാധിപത്യത്തിന്‍റെ നാലാം തൂണ്‍. കടലിലേക്ക് ഒരു കല്ലെറിയുന്ന ലാഘവത്തോടെ വാർത്തകൾ കാട്ടുതീ പോലെ പടരുമ്പോൾ ആ കല്ല് എത്ര ആഴത്തിലേക്കാണ് പതിക്കുക എന്ന് തിരിച്ചറിയണം. വാര്‍ത്തകളിൽ ഇരയുടെ മാതാപിതാക്കളും പങ്കാളിയും കുട്ടികളുമൊക്കെ വേദനിപ്പിക്കപ്പെടുന്നതും സൈബറിടത്തില്‍ അവരെ അപമാനിക്കുന്നതും വളരെ ദയനീയവും സങ്കടകരവുമാണ്, പ്രത്യേകിച്ച് സ്‌ത്രീകൾ ഇരകളാവുമ്പോൾ.
മാധ്യമ ഭീകരത എന്നത് തിരുത്താന്‍ കഴിയാത്ത തെറ്റാണ്. നെല്ലും പതിരും വേർതിരിക്കാതെ വാര്‍ത്ത വരുന്ന നിമിഷത്തില്‍ സുഹൃത്തുക്കളുടെയും ബന്ധുക്കളുടെയും ഇടയിൽ ഇര ഒറ്റപ്പെടും, അവരുടെ മനസാന്നിധ്യവും നഷ്‌ടമാകും. ഒരു വാര്‍ത്തയിലൂടെ ഇരയെ കീറിമുറിക്കുമ്പോള്‍ അത് അവരുടെ ചുറ്റിലുമുള്ളവരെ കൂടിയാണ് ബാധിക്കുന്നത് എന്ന് മറന്നുകൂടാ'.
നേരത്തെ ഈ വിഷയവുമായി ബന്ധപ്പെട്ട മറ്റൊരു പോസ്റ്റും സോഷ്യൽ മീഡിയയിൽ നടി നവ്യ നായർ പങ്കുവച്ചിരുന്നു. ഒരു നൃത്ത വീഡിയോയോടൊപ്പം ‘നിങ്ങളിൽ പാപം ചെയ്യാത്തവർ കല്ലെറിയട്ടെ’ എന്ന ടാഗ്‌ലൈനോട് കൂടിയായിരുന്നു പോസ്റ്റ്. നിങ്ങൾ തകർന്നിരിക്കുമ്പോഴും നൃത്തം ചെയ്യണം എന്നും നവ്യ നായർ കുറിച്ചിരുന്നു.
'നിങ്ങൾ തകർന്നിരിക്കുമ്പോൾ നൃത്തം ചെയ്യുക. കടുത്ത പോരാട്ടങ്ങളുടെ മധ്യത്തിലും നൃത്തം ചെയ്യുക. മുറിവിൽ കെട്ടിയ ബാൻഡേജ് നനഞ്ഞു കുതിർന്ന് രക്തം വാർന്നൊഴുകുമ്പോഴും ചോരയിൽ ചവിട്ടി നിന്ന് നൃത്തം തുടർന്നുകൊണ്ടിരിക്കുക'- എന്നാണ് ഇൻസ്റ്റഗ്രാമിൽ നവ്യ നായർ കുറിച്ചത്.
അനധികൃത സ്വത്ത് സമ്പാദന കേസില്‍ അറസ്റ്റിലായ ഐആര്‍എസ് ഉദ്യോഗസ്ഥന്‍ സച്ചിന്‍ സാവന്തുമായി (IRS Officer Sachin Sawant) നവ്യ നായര്‍ക്ക് അടുത്ത സൗഹൃദമുണ്ടെന്ന കണ്ടെത്തലിന് പിന്നാലെയാണ് ഇഡി നവ്യ നായരെ ചോദ്യം ചെയ്‌തത്. സച്ചിൻ സാവന്തിൽ നിന്നും നവ്യ സമ്മാനങ്ങൾ കൈപറ്റിയെന്ന വെളിപ്പെടുത്തൽ വലിയ വിവാദങ്ങൾക്കാണ് വഴി വച്ചത്.
സമൂഹമാധ്യമങ്ങളിൽ ഇതുമായി ബന്ധപ്പെട്ട് നടിക്കെതിരെ രൂക്ഷമായ സൈബർ ആക്രമണവുമുണ്ടായി. ഇതിനിടെ മുംബൈയിൽ അയൽക്കാരായിരുന്ന പരിചയം മാത്രമാണ് സച്ചിൻ സാവന്തുമായി ഉളളതെന്ന് വിശദീകരിച്ച് നവ്യ നായരുടെ കുടുംബം രംഗത്തെത്തിയിരുന്നു.
