Alia pregnancy: 'ഞാന്‍ ഒരു സ്‌ത്രീയാണ്, പാര്‍സല്‍ അല്ല' -ആലിയ ഭട്ടിന്‍റെ ഈ വാക്കുകളാണ് ഇപ്പോള്‍ സോഷ്യല്‍ മീഡിയയില്‍ തരംഗമാവുന്നത്‌. തങ്ങള്‍ മാതാപിതാക്കള്‍ ആകാനൊരുങ്ങുന്ന വാര്‍ത്ത തിങ്കളാഴ്‌ചയാണ് ആലിയയും രണ്‍ബീറും സോഷ്യല്‍ മീഡിയയിലൂടെ അറിയിച്ചത്‌. ഇതിന് പിന്നാലെ സഹപ്രവര്‍ത്തകരടക്കം നിരവധി പേര്‍ താര ദമ്പതികള്‍ക്ക് അഭിനന്ദനം അറിയിച്ച് രംഗത്തെത്തിയിരുന്നു.
Alia Ranbir waiting for first child: ഗര്‍ഭിണിയായതിനാല്‍ നിലവില്‍ കരാറിലേര്‍പ്പെട്ട ചിത്രങ്ങള്‍ പൂര്‍ത്തിയാക്കിയ ശേഷം ആലിയ വിശ്രമത്തിലേക്ക് കടക്കുമെന്ന്‌ ചില മാധ്യമങ്ങളില്‍ വാര്‍ത്ത വന്നിരുന്നു. വിവാഹ ശേഷം തന്‍റെ ഹോളിവുഡ്‌ അരങ്ങേറ്റ ചിത്രം 'ഹാര്‍ട്ട് ഓഫ്‌ സ്‌റ്റോണി'ന്‍റെ ചിത്രീകരണത്തിനായി ആലിയ ലണ്ടനിലേക്ക് പോയിരുന്നു. ഇതിനിടെയാണ് അമ്മയാകാന്‍ പോകുന്ന വിവരം ആലിയ സോഷ്യല്‍ മീഡിയയില്‍ പങ്കുവച്ചത്‌.
Ranbir bring back Alia after Hollywood shoot: തുടര്‍ന്ന് ഇതുമായി ബന്ധപ്പെട്ട് പല വാര്‍ത്തകളും പ്രചരിക്കാന്‍ തുടങ്ങി. 'ഹാര്‍ട്ട് ഓഫ്‌ സ്‌റ്റോണി'ന്‍റെ ചിത്രീകരണം പൂര്‍ത്തിയാക്കിയ ശേഷം രണ്‍ബീര്‍ ആലിയയെ ലണ്ടനില്‍ നിന്നും കൂട്ടിക്കൊണ്ട് വരുമെന്ന തരത്തില്‍ വാര്‍ത്തകള്‍ പ്രചരിച്ചിരുന്നു. എന്നാലിപ്പോള്‍ ഈ വാര്‍ത്തയില്‍ പ്രതികരിച്ച് ആലിയ രംഗത്തെത്തിയിരിക്കുകയാണ്. ഇന്സ്റ്റഗ്രാം സ്‌റ്റോറിയിലൂടെയാണ് ആലിയ ഇതിന് ചുട്ട മറുപടി നല്‍കിയിരിക്കുന്നത്.
Alia slams reports of pregnancy: ഇത് 2022 ആണെന്നും ഈ പുരാതന ചിന്താഗതിയില്‍ നിന്ന് പുറത്തു കടക്കാമോ എന്നുമാണ് ആലിയ പറയുന്നത്‌. തന്‍റെ ജോലിയെ ബാധിക്കാത്ത തരത്തിലാണ് താന്‍ ഗര്‍ഭം ആസൂത്രണം ചെയ്‌തതെന്ന്‌ റിപ്പോര്‍ട്ട് ചെയ്‌ത ന്യൂസ്‌ പോര്‍ട്ടലിന്‍റെ ഇന്സ്റ്റഗ്രാം പോസ്റ്റിന്‍റെ സ്‌ക്രീന്‍ ഷോട്ട് സഹിതമാണ് താരം കുറിപ്പ് പങ്കുവച്ചത്‌. ഭര്‍ത്താവ് തന്നെ പിക്കപ്പ് ചെയ്യേണ്ടതുണ്ടെന്ന വാര്‍ത്തയിലെ വാക്കാണ് ആലിയയെ ചൊടിപ്പിച്ചത്‌.
Alia Bhat about pregnancy and committed works:'ചിലരുടെ തലയില്‍ നമ്മള്‍ ഇപ്പോഴും പുരുഷാധിപത്യ ലോകത്ത് ജീവിക്കുന്നു എന്നാണ്. ഒന്നും വൈകിയിട്ടില്ല!! ആരും ആരെയും 'എടുക്കേണ്ട' ആവശ്യമില്ല ഞാന്‍ ഒരു സ്‌ത്രീയാണ്, പാര്‍സല്‍ അല്ല!! എനിക്ക് വിശ്രമിക്കേണ്ട ആവശ്യമില്ല, അതിന് ഡോക്‌ടറുടെ സര്‍ട്ടിഫിക്കറ്റും ഉണ്ടെന്ന് നിങ്ങള്‍ അറിയുന്നത്‌ നല്ലതാണ്. ഇത് 2022 ആണ്. ഈ പുരാതന ചിന്താഗതിയില്‍ നിന്ന് പുറത്തു കടക്കാമോ! എങ്കില്‍ ഞാന്‍ പോട്ടെ, എന്‍റെ ഷോട്ട് റെഡിയാണ്', ആലിയ കുറിച്ചു.
Alia Bhat Ranbir Kapoor wedding: 2022 ഏപ്രില്‍ 14ന് ആയിരുന്നു ആലിയയുടെയും രണ്‍ബീറിന്‍റെയും വിവാഹം. മുംബൈയില്‍ വച്ചായിരുന്നു ഈ താരവിവാഹം. വിവാഹം കഴിഞ്ഞ്‌ ആ ആഴ്‌ച തന്നെ ഇരുവരും കമ്മിറ്റ്‌ ചെയ്‌ത സിനിമകള്‍ പൂര്‍ത്തിയാക്കുന്നതിനായി ഷൂട്ടിങ്‌ ലൊക്കേഷനുകളിലേക്ക് മടങ്ങിയിരുന്നു.
Alia Bhat upcoming movies: രണ്‍ബീറിനൊപ്പമുള്ള 'ബ്രഹ്മാസ്‌ത്ര: ഭാഗം ഒന്ന് ശിവ' ആണ് ആലിയയുടെ റിലീസിനൊരുങ്ങുന്ന ഏറ്റവും പുതിയ ചിത്രം. രണ്‍ബീറും ആലിയയും ആദ്യമായി ഒന്നിച്ചഭിനയിച്ച സിനിമ കൂടിയാണിത്. 'ബ്രഹ്മാസ്‌ത്ര'യുടെ ചിത്രീകരണത്തിനിടെയായിരുന്നു ഇരുവരും പ്രണയത്തിലായത്‌. സെപ്‌റ്റംബര്‍ ഒമ്പതിനാണ് 'ബ്രഹ്മാസ്‌ത്ര'യുടെ റിലീസ്‌. അമിതാഭ്‌ ബച്ചന്‍, മൗനി റോയ്‌, നാഗാര്‍ജുന തുടങ്ങിയവരും ചിത്രത്തില്‍ സുപ്രധാന വേഷത്തിലുണ്ട്. കരണ്‍ ജോഹറിന്‍റെ ആദ്യ സംവിധാന സംരംഭമായ 'റോക്കി ഓര്‍ റാണി കി പ്രേം കഹാനി', 'ഡാര്‍ലിങ്‌സ്‌' എന്നിവയാണ് ആലിയയുടെ റിലീസിനൊരുങ്ങുന്ന മറ്റു ചിത്രങ്ങള്‍.
Also Read: 'ജീവിതത്തിലേക്ക് പുതിയൊരു അതിഥി': സന്തോഷ വാർത്ത പങ്കുവെച്ച് ആലിയയും രൺബീറും
