ആലപ്പുഴ : നെഹ്റു ട്രോഫി ജലമാമാങ്കത്തിന് ആലപ്പുഴ പുന്നമടക്കായലിൽ പരിസമാപ്തിയായപ്പോൾ ചരിത്രത്തിലേക്കാണ് കേരള പൊലീസ് വനിതാ വിഭാഗം തുഴയെറിഞ്ഞത്. നെഹ്റു ട്രോഫി വള്ളംകളിയിൽ തെക്കനോടി വിഭാഗത്തിൽ സിവിൽ പൊലീസ് ഓഫീസർ ശ്രീദേവി നയിച്ച കേരള പൊലീസിന്റെ വനിതാ ടീമാണ് ഒന്നാംസ്ഥാനം നേടിയത്. പങ്കെടുത്ത ആദ്യ മത്സരത്തിൽ തന്നെ ഒന്നാം സ്ഥാനം കരസ്ഥമാക്കാൻ കഴിഞ്ഞതിൽ അഭിമാനമുണ്ടെന്നും ജലമേളയിൽ പങ്കെടുത്ത് ചരിത്രത്തിന്റെ ഭാഗമാകാൻ സാധിച്ചതിൽ ഏറെ സന്തോഷമുണ്ടെന്നും ടീമംഗങ്ങൾ പ്രതികരിച്ചു.
35 പേരടങ്ങിയ ടീമാണ് കാക്കിക്കരുത്തുമായി ഓളപ്പരപ്പിൽ തുഴയെറിഞ്ഞത്. 12 പേർ ആലപ്പുഴ ജില്ലക്കാരാണ്. മല്സരത്തില് പങ്കെടുക്കാന് താല്പര്യം പ്രകടിപ്പിച്ചവരിൽ കായികശേഷിയും തുഴയാൻ കഴിവുമുള്ളവരെയാണ് ടീമിൽ ഉൾപ്പെടുത്തിയത്. 36 വർഷമായി മത്സര വള്ളംകളികളിൽ പങ്കെടുക്കാറുള്ള കൈനകരി സ്വദേശിയും സിവിൽ പൊലീസ് ഓഫീസറുമായ സുനിൽകുമാറാണ് പരിശീലകൻ.
എന്നാൽ കേരള പൊലീസിന്റെ പുരുഷവിഭാഗത്തിന് മൂന്നാം സ്ഥാനം കൊണ്ട് തൃപ്തിപ്പെടേണ്ടി വന്നു. കഴിഞ്ഞവർഷം ടീം രണ്ടാം സ്ഥാനത്തെത്തിയിരുന്നു. സി.ബി.എൽ മത്സരങ്ങളില് പങ്കെടുക്കുന്ന കേരള പൊലീസ് കാരിച്ചാൽ ചുണ്ടനിലാണ് തുഴയെറിഞ്ഞത്.