ആലപ്പുഴ: തലവടി പഞ്ചായത്തിൽ ജലനിരപ്പ് ക്രമാതീതമായി ഉയർന്നതോടെ വീട്ടമ്മയുടെ മൃതദേഹം മുട്ടോളം വെള്ളത്തിൽ ചുമന്ന് വീട്ടിലെത്തിച്ച് സംസ്‌കരിച്ചു. തലവടി പഞ്ചായത്ത് നാലാം വാർഡിൽ വെള്ളക്കിണർ വാലയിൽ പരേതനായ ഗോപിയുടെ ഭാര്യ ലളിതയുടെ (65) മൃതദേഹമാണ് മുട്ടോളം വെള്ളത്തിൽ ചുമന്ന് വീട്ടിലെത്തിച്ച് സംസ്‌കരിച്ചത്. കഴിഞ്ഞ വെള്ളിയാഴ്‌ചയാണ് ലളിത മരിച്ചത്.
ശ്വാസതടസം നേരിട്ടതിനെ തുടർന്ന് വെള്ളക്കെട്ടുള്ള സ്ഥലത്ത് നിന്ന് ആശുപത്രിയിൽ എത്തിക്കാൻ വൈകിയതാണ് മരണത്തിന് ഇടയാക്കിയത്. വീടിന് ചുറ്റുമുള്ള വെള്ളക്കെട്ട്‌ മൂലം സംസ്‌കാര ചടങ്ങുകൾ സഹോദരൻ സുരേഷിന്‍റെ വീട്ടിൽ വെച്ചാണ് നടത്തിയത്. ചടങ്ങുകൾക്ക് ശേഷം മൃതദേഹം വീട്ടിൽ എത്തിച്ച്‌ ദഹിപ്പിക്കുകയായിരുന്നു.
വീടിന് ചുറ്റും വെള്ളം കെട്ടിനിൽക്കുന്നതിനാൽ ഇഷ്‌ടിക ഉപയോഗിച്ച്‌ ഉയർത്തിയാണ് മ്യതദേഹം ദഹിപ്പിച്ചത്. രണ്ടു ദിവസമായി അതിശക്തമായ മഴ ലഭിച്ചതോടെ സംസ്‌കാര ചടങ്ങുകൾ മാറ്റിവെക്കണോ എന്ന് ബന്ധുക്കൾ ആശങ്കപ്പെട്ടിരുന്നെങ്കിലും വൈകുന്നേരം മഴ അൽപസമയം കുറഞ്ഞതോടെ ശനിയാഴ്‌ച വൈകുന്നേരം ആറ് മണിക്ക് സംസ്‌കാര ചടങ്ങുകൾ ആരംഭിക്കുകയായിരുന്നു.
ALSO READ: ചാക്കോയുടെ മകൻ പറയുന്നു, "സുകുമാര കുറുപ്പിനെ കുറിച്ച് കൂടുതല്‍ അറിഞ്ഞു!"
