ഇന്ത്യയിൽ 65 ശതമാനത്തിലധികവും 35 വയസിൽ താഴെയുള്ളവരാണ്. സാമ്പത്തിക കാര്യങ്ങളിൽ പൊതുവെ ഉഴപ്പ് കാണിക്കുന്നവരാണ് ചെറുപ്പക്കാർ. ഭാവി കാര്യങ്ങളെക്കുറിച്ച് കൃത്യമായ പ്ലാനിങ്ങോ, പണത്തിന്‍റെ വിനിയോഗത്തെപ്പറ്റിയുള്ള ധാരണക്കുറവോ ഒക്കെയാകാം ഈ ഉഴപ്പിന് പ്രധാന കാരണം. കയ്യിൽ വരുന്ന പണം അപ്പപ്പോൾ ചെലവാക്കി കളയുന്ന ശീലം നാം ഓരോരുത്തർക്കും ഉള്ളതാണ്.
എന്നാൽ നാം പാലിക്കേണ്ട ശീലങ്ങളിൽ പ്രധാനമായ ഒന്നാണ് മണി മാനേജ്‌മെന്‍റ്. പഠന കാലത്ത് പണത്തിന്‍റെ വരവ് പോക്കുകൾ നാം ശ്രദ്ധിക്കാറില്ല. കാരണം ആ സമയങ്ങളിൽ നാം മാതാപിതാക്കളെ ആശ്രയിച്ചാണ് ജീവിക്കാറ്. എന്നാൽ സ്വന്തമായി സമ്പാദിക്കാൻ തുടങ്ങുമ്പോൾ ആദ്യ ശമ്പളം മുതൽ നിങ്ങൾ സമ്പാദിക്കുന്ന ഓരോ രൂപയും ചെലവഴിക്കുന്നത് ശ്രദ്ധാപൂർവം ചിന്തിച്ച് മാത്രമായിരിക്കണം.
ആദ്യ ശമ്പളം 50:50 എന്ന അനുപാതത്തിൽ പങ്കുവയ്‌ക്കൂ. നിങ്ങളുടെ വരുമാനത്തിന്‍റെ 50 ശതമാനം ചെലവുകൾക്കും ബാക്കി സേവിങ്‌സുകളായും സൂക്ഷിക്കുക. മാറ്റി വച്ച മറ്റേ 50 ശതമാനം റിസ്‌ക് ഫ്രീ സ്‌കീമുകളിൽ നിക്ഷേപിക്കുക. ഇത് അടിസ്ഥാനപരമായി നിങ്ങളിൽ ഒരു സേവിങ്സ് നിലനിർത്താൻ സഹായിക്കും. നിങ്ങളുടെ സാമ്പത്തിക ലക്ഷ്യങ്ങളെക്കുറിച്ചും നിക്ഷേപത്തിലെ അപകടങ്ങളെക്കുറിച്ചും ധാരണയുണ്ടായാൽ ഉയർന്ന റിട്ടേണ്‍ സ്‌കീമുകളിൽ നിങ്ങൾക്ക് നിക്ഷേപം നടത്താവുന്നതാണ്.
സുരക്ഷിതമായി നിക്ഷേപിക്കാം: നിങ്ങളുടെ സാമ്പത്തിക ലക്ഷ്യങ്ങൾ വ്യക്തമായി നിർവചിക്കാൻ ശ്രമിക്കുക. ഒരു നിശ്ചിത ലക്ഷ്യവുമായി ബന്ധിപ്പിച്ചാൽ മാത്രമേ നിക്ഷേപം ദീർഘകാലം നിലനിൽക്കുകയുള്ളു. അല്ലാത്തപക്ഷം അവ തുടങ്ങുന്നതും പാതിവഴിയിൽ നിർത്തുന്നതും ഒരു ശീലമായി മാറും.
അതിനാൽ ഹ്രസ്വവും ദീർഘകാലവുമുള്ള ലക്ഷ്യങ്ങൾ തെരഞ്ഞെടുക്കുക. അവയ്‌ക്ക് അനുയോജ്യമായ നിക്ഷേപ മാർഗങ്ങൾ തെരഞ്ഞെടുത്ത് നിക്ഷേപം ആരംഭിക്കുക. ആവശ്യമുള്ളപ്പോൾ പിൻവലിക്കാൻ കഴിയുന്ന സ്‌കീമുകളാണ് പലരും തെരഞ്ഞെടുക്കുന്നത്. ഹ്രസ്വകാല ലക്ഷ്യങ്ങൾക്ക് ഇത്തരം സ്‌കീമുകളാണ് അനുയോജ്യം.
കുടുംബത്തിനും കവചമൊരുക്കാം: കുടുംബ ഉത്തരവാദിത്തങ്ങൾ പൊതുവേ യുവാക്കളിൽ ഉണ്ടാകണമെന്നില്ല. എന്നാല്‍ ചില അവസരങ്ങളിൽ കുടുംബം നിങ്ങളുടെ ചുമലിൽ ഏറിയാകും മുന്നോട്ട് പോകുന്നത്. പ്രായമായ മാതാപിതാക്കളോ, വിദ്യാർഥിയായ സഹോദരങ്ങളോ നിങ്ങളെ ആശ്രയിച്ചേക്കാം.
അത്തരം സന്ദർഭങ്ങളിൽ അവരെ സാമ്പത്തികമായി പിന്തുണയ്‌ക്കാൻ ഒരു ഇൻഷുറൻസ് പോളിസി എടുക്കുന്നത് ഉത്തമമായിരിക്കും. അത് കുടുംബത്തിന് ഒന്നാകെ സംരക്ഷണ കവചമൊരുക്കും. ചെറുപ്പത്തിൽ തന്നെ ഇൻഷുറൻസ് പോളിസി എടുത്താൽ പ്രീമിയം കുറവായിരിക്കും. അതിനാൽ തന്നെ ഉയർന്ന മൂല്യമുള്ള പോളിസികൾ തെരഞ്ഞെടുക്കാം.
ദീർഘ വീക്ഷണത്തോടെ മുന്നേറാം: സാമ്പത്തിക ആസൂത്രണം ഒരു ദിവസം കൊണ്ട് നടക്കുന്നതല്ല. പണം എങ്ങനെ കാര്യക്ഷമമായി ഉപയോഗിക്കുന്നു എന്നതിനെ ആശ്രയിച്ചാണ് ഇത് നിലനിൽക്കുന്നത്. നിങ്ങളുടെ വിവാഹം, കുട്ടികൾ, അവരുടെ പഠനം, മറ്റ് ആവശ്യങ്ങൾ, റിട്ടയർമെന്‍റ് എന്നിവയെക്കുറിച്ച് ദീർഘകാല വീക്ഷണമുണ്ടായിരിക്കണം. ആവശ്യമെങ്കിൽ സാമ്പത്തിക വിദഗ്‌ധരുടെ ഉപദേശവും തേടാവുന്നതാണ്.
വൈവിധ്യവത്കരണം പ്രധാനം: നിക്ഷേപത്തിനായി തെരഞ്ഞെടുക്കുന്ന പദ്ധതികൾ വൈവിധ്യവത്കരിക്കണം. വളരെ സുരക്ഷിതമായതോ അപകട സാധ്യതയില്ലാത്തതോ ആയ സ്‌കീമുകൾ തെരഞ്ഞെടുക്കുന്നത് നിങ്ങളുടെ പോർട്ട്ഫോളിയോ ബാലൻസ് തകരാറിലാക്കും. നിക്ഷേപം വൈവിധ്യവത്കരിക്കപ്പെടുമ്പോൾ അവയുടെ നഷ്‌ട സാധ്യതകൾ കുറവാണ്.
മാറുന്ന സാമ്പത്തിക സാഹചര്യങ്ങൾ, ഉത്തരവാദിത്തങ്ങൾ, മറ്റ് ഘടകങ്ങൾ എന്നിവയെ അടിസ്ഥാനമാക്കി നിങ്ങളുടെ സാമ്പത്തിക കാര്യങ്ങൾ നിരീക്ഷിക്കണം. മാർക്കറ്റ് പ്രകടനത്തെ അടിസ്ഥാനമാക്കി നിങ്ങളുടെ നിക്ഷേപങ്ങൾ അവലോകനം ചെയ്യുക. പതിവായി പോർട്ട്ഫോളിയോ പരിഷ്‌കരിക്കുക.
ALSO READ: ആഗോള സമ്പന്നരുടെ പട്ടികയുമായി ഫോബ്‌സ് ; മുകേഷ് അംബാനി ഒമ്പതാമത്, 169 ഇന്ത്യക്കാർ
