ഹൈദരാബാദ്: നടി രാഖി സാവന്തിന്‍റെ പരാതിയില്‍ ഭര്‍ത്താവ് ആദില്‍ ദുരാനി ഖാന്‍ അറസ്‌റ്റില്‍. ആദില്‍ തന്‍റെ കയ്യില്‍ നിന്നും പണവും സ്വര്‍ണവും മോഷ്‌ടിച്ചുവെന്ന് ആരോപിച്ചായിരുന്നു രാഖി പരാതി നല്‍കിയത്. ഐപിസിയിലെ 406, 420 തുടങ്ങിയ വകുപ്പുകള്‍ പ്രകാരം ആദിലിനെതിരെ എഫ്‌ഐആര്‍ രജിസ്‌റ്റര്‍ ചെയ്‌തിട്ടുണ്ടെന്ന് പൊലീസ് അറിയിച്ചു.
'രാഖിയുടെ പരാതിയെ തുടര്‍ന്ന് കഴിഞ്ഞ രണ്ട് ദിവസമായി ആദിലിനെ തിരഞ്ഞുകൊണ്ടിരിക്കുകയായിരുന്നു. ഇന്ന് രാവിലെയാണ് ഇയാളെ അറസ്‌റ്റ് ചെയ്‌തത്. നിലവില്‍ ആദിലിനെ ചോദ്യം ചെയ്‌തുകൊണ്ടിരിക്കുകയാണെന്നും അന്വേഷണത്തിന് ശേഷമെ എന്തെങ്കിലും പറയാനാകുവെന്നും' പൊലീസ് വ്യക്തമാക്കി.
വിവാഹ വാര്‍ത്തകളെ ചൊല്ലി കഴിഞ്ഞ ഏതാനും ദിവസങ്ങളായി സമൂഹമാധ്യമങ്ങളില്‍ ഇടം പിടിച്ച വ്യക്തികളായിരുന്നു ആദില്‍ ഖാനും രാഖി സാവന്തും. എന്നാല്‍, ആദില്‍ തന്നെ മര്‍ദിച്ചു എന്നാരോപിച്ചായിരുന്നു രാഖി അടുത്തിടെയായി വീഡിയോയില്‍ പ്രത്യക്ഷപ്പെട്ടത്. പുലര്‍ച്ചെ ആദില്‍ തന്നെ കാണാന്‍ വന്നിരുന്നുവെന്നും ഒരു വാക്കുപോലും പറയാതെ തന്നെ മര്‍ദിക്കുകയായിരുന്നുവെന്നും രാഖി ആരോപിച്ചു.
നേരത്തെ രണ്ട് തവണ ആദിലിനെതിരെ താന്‍ പരാതി നല്‍കിയിട്ടുണ്ടെന്നും എന്നാല്‍, മാധ്യമങ്ങള്‍ക്ക് മുമ്പില്‍ വിവരം മറച്ചുവച്ചിരിക്കുകയായിരുന്നുവെന്നും രാഖി പറഞ്ഞു. 'പൊലീസില്‍ പരാതിപ്പെട്ടപ്പോള്‍ ആദിലിനെതിരെ നോൺ കോഗ്നിസബിൾ ഒഫന്‍സ് പ്രകാരമായിരുന്നു കേസ് എടുത്തിരുന്നത്. എന്നാല്‍, കഴിഞ്ഞ ദിവസം അത് എഫ്‌ഐആര്‍ ആക്കി മാറ്റുകയായിരുന്നുവെന്നും' രാഖി പറഞ്ഞു.
2022 മെയ്‌ 29നാണ് ഇരുവരുടെയും വിവാഹം നടക്കുന്നത്. പരസ്‌പര ധാരണയില്‍ ഇരുവരും വിവാഹ വാര്‍ത്ത പുറത്ത് വിട്ടിരുന്നില്ല. എന്നാല്‍, മറ്റൊരു സ്‌ത്രീയുമായി ആദിലിന് ബന്ധമുണ്ടെന്ന് ആരോപിച്ച് രംഗത്തെത്തിയ രാഖി ഈ വര്‍ഷം ജനുവരിയിലായിരുന്നു മാധ്യമങ്ങള്‍ക്ക് മുമ്പില്‍ തങ്ങളുടെ വിവാഹ വാര്‍ത്ത പുറത്തുവിട്ടത്. തുടര്‍ന്ന് ഇസ്‌ലാം സമുദായത്തില്‍പെട്ട ആദിലിന്‍റെ നിര്‍ദേശ പ്രകാരം നിക്കാഹിനായി രാഖി, ഇസ്‌ലാം മതം സ്വീകരിക്കുകയായിരുന്നു.
റിതേഷ് രാജയായിരുന്നു രാഖിയുടെ മുന്‍ ഭര്‍ത്താവ്. ഇരുവരും ബിഗ്‌ബോസ് സീസണ്‍ 15ലെ മത്സരാര്‍ഥികളായിരുന്നു.
