ന്യൂഡല്‍ഹി: പ്രണയത്തിനായി രാജ്യം വിട്ട് ഇന്ത്യയിലെത്തിയ പാകിസ്ഥാനി വനിത സീമ ഗുലാം ഹൈദറിന് ഉഷ്‌ണാഘാതം (heat stroke). ഉയര്‍ന്ന താപനിലയെ തുടര്‍ന്നാണ് ഉഷ്‌ണാഘാതം പിടിപെടാന്‍ കാരണം. രണ്ട് ദിവസമായി ഉത്തര്‍പ്രദേശിലെ തീവ്രവാദ വിരുദ്ധ സേന സീമയെ ചോദ്യം ചെയ്യുകയായിരുന്നു.
സീമ ഗുലാമിന്‍റെ ഭര്‍ത്താവ് സച്ചിന്‍ മീണയുടെ കുടുംബാംഗങ്ങള്‍ ഉഷ്‌ണാഘാതമാണെന്ന് അറിയിച്ച് വീടിനുള്ളില്‍ മാധ്യമങ്ങള്‍ പ്രവേശിക്കുന്നത് തടഞ്ഞിരുന്നു. എന്ത് വില തന്നാലും താന്‍ ഇന്ത്യ വിട്ട് പാകിസ്ഥാനിലേയ്‌ക്ക് തിരികെ പോകില്ലെന്ന് സീമ മാധ്യമങ്ങളോട് പറഞ്ഞു. തന്നെ കാത്ത് പാകിസ്ഥാനില്‍ മരണം ഇരിപ്പുണ്ടെന്ന് ചോദ്യം ചെയ്യലില്‍ സീമ തീവ്രവാദ വിരുദ്ധ സേനയോട് പറഞ്ഞിരുന്നു.
നേപ്പാളിലെ ക്ഷേത്രത്തില്‍ വച്ച് നടന്ന തന്‍റെ വിവാഹ ചിത്രങ്ങള്‍ മാധ്യമങ്ങളെ കാണിച്ചു. ഇന്ത്യന്‍ പൗരത്വം നല്‍കണമെന്നാവശ്യപ്പെട്ട് തന്‍റെ അഭിഭാഷകന്‍ വഴി സീമ രാഷ്‌ട്രപതിക്ക് ദയാഹര്‍ജി നല്‍കിയെന്നാണ് റിപ്പോര്‍ട്ട്. ഇന്‍റര്‍നെറ്റില്‍ പബ്‌ജി കളിയിലൂടെയാണ് താന്‍ സച്ചിനുമായി അടുപ്പത്തിലായതെന്ന് പാകിസ്ഥാനിലെ കറാച്ചി സ്വദേശിയായ സീമ പറഞ്ഞു. ഇരുവരും നേപ്പാളിലെ ഒരു ക്ഷേത്രത്തില്‍ വച്ച് വിവാഹിതരായ ശേഷം സ്വന്തം രാജ്യങ്ങളിലേയ്‌ക്ക് മടങ്ങിയിരുന്നു.
എന്നാല്‍, അടുത്തിടെ സീമ ആദ്യ ഭര്‍ത്താവില്‍ നിന്നുള്ള തന്‍റെ മക്കളോടൊപ്പം രാബ്‌പുരയിലെ സച്ചിന്‍റെ വീട്ടില്‍ എത്തിയതിനെ തുടര്‍ന്ന് പൊലീസ് അറസ്‌റ്റ് ചെയ്യുകയായിരുന്നു. ശേഷം, സീമക്ക് കോടതി ജാമ്യം അനുവദിച്ചതിനെ തുടര്‍ന്ന് സച്ചിന്‍റെ വീട്ടിലേയ്‌ക്ക് സ്ഥിരതാമസമാക്കുകയായിരുന്നു.
രാജ്യം വിട്ടത് എങ്ങനെയെന്ന് സീമ: പാകിസ്ഥാനിൽ നിന്ന് നേപ്പാളിലേക്ക് നേരിട്ട് വിമാനങ്ങളില്ല. നേപ്പാളിലേക്ക് തിരിക്കാന്‍ ആദ്യം ദുബായില്‍ പോകണം. അതുകൊണ്ടാണ് താന്‍ വിമാന മാര്‍ഗം പാകിസ്ഥാനിൽ നിന്ന് ദുബായിലേക്കും അവിടെ നിന്ന് നേപ്പാളിലേക്കുമെത്തിയത്. നേപ്പാളിൽ എത്തിയത് ശരിയായ രേഖകളുമായാണെങ്കിലും ഇന്ത്യയിലേക്ക് വരാനുള്ളവ കൈവശമില്ലായിരുന്നു. അതുകൊണ്ടാണ് നിയമവിരുദ്ധമായി ഇന്ത്യയുടെ അതിർത്തിയിൽ പ്രവേശിച്ച് ഗ്രേറ്റർ നോയിഡയിലെ റബുപുരയിലെത്തിയത്.
നിലവില്‍ ഇന്ത്യന്‍ പൗരത്വം ലഭിക്കാനായി ശ്രമിച്ചുവരികയാണ്. എന്നാല്‍ പൊലീസും സുരക്ഷ ഏജൻസികളും കേസ് അന്വേഷിക്കുന്നതിനാൽ ഇന്ത്യൻ പൗരത്വം ലഭിക്കാൻ തടസമുണ്ട്. പൊലീസിൽ നിന്ന് ക്ലീൻ ചിറ്റ് ലഭിച്ചാല്‍ മാത്രമേ തുടർനടപടി സ്വീകരിക്കാനാവുകയുള്ളൂ. എനിക്ക് ഇവിടെ ഭർത്താവിനൊപ്പം ജീവിക്കാൻ കഴിയുന്ന തരത്തിൽ ഇന്ത്യൻ പൗരത്വം നൽകണമെന്ന് ഗവൺമെന്‍റിനോട് അഭ്യർഥിച്ചിട്ടുണ്ടെന്നും സീമ പറഞ്ഞു.
സച്ചിനോടുള്ള ഇഷ്‌ടം കൊണ്ടാണ് ഇന്ത്യയിലെത്തുന്നത്. ഇപ്പോള്‍ എനിക്ക് ഇന്ത്യയിൽ ജീവിക്കാൻ ഇഷ്‌ടമാണ്. ഇവിടം വളരെ നന്നായി തോന്നുന്നു. അതുകൊണ്ട് ഇവിടെ താമസിക്കാൻ ആഗ്രഹിക്കുന്നു. ഇനി അതിനായി ജയിലിൽ പോകേണ്ടി വന്നാലും ഒളിച്ചോടാൻ പോകുന്നില്ലെന്നും സീമ ഗുലാം ഹൈദര്‍ പറയുന്നു. എല്ലാം ശരിയായി നടന്നാല്‍ വിവാഹം ഒരിക്കല്‍ കൂടി ഗംഭീരമായി നടത്താന്‍ ആഗ്രഹിക്കുന്നതായും അവര്‍ മനസുതുറന്നു.
