ധന്‍ബാദ്(ജാര്‍ഖണ്ഡ്) : ഡിജെ, നൃത്തം കരിമരുന്ന് പ്രയോഗങ്ങള്‍ തുടങ്ങിയവ മുസ്ലിം വിവാഹച്ചടങ്ങില്‍ പാടില്ലെന്ന് ധൻബാദിലെ ശിവ്‌ലിബാരി ജമാ മസ്‌ജിദിലെ ഇമാം മൗലാന മസൂദ് അക്‌തര്‍ ഖാദ്രി. ഇന്നലെ നിർസയിലെ ശിവ്‌ലിബാരി ജമാ മസ്‌ജിദിൽ ചേർന്ന യോഗത്തിലാണ് മൗലാന ഇക്കാര്യം വ്യക്തമാക്കിയത്.
ഇസ്ലാമിക നിയമങ്ങള്‍ പ്രകാരം വിവാഹത്തില്‍ വാദ്യഘോഷങ്ങളും കരിമരുന്ന് പ്രയോഗങ്ങളും നിരോധിച്ചിരിക്കുകയാണ്. കൂടാതെ, വിവാഹം രാത്രി 11 മണിയ്‌ക്ക് നടത്തണമെന്ന് നിയമം അനുശാസിക്കുന്നുവെന്നും അദ്ദേഹം പറഞ്ഞു. വിവാഹം രാത്രിയില്‍ നടത്താന്‍ എന്തെങ്കിലും തടസം നേരിട്ടാല്‍ പിറ്റേ ദിവസത്തെ ഫജ്‌റ് നമസ്‌കാരത്തിന്(സൂര്യോദയത്തിന് മുമ്പുള്ള പ്രാര്‍ഥന) ശേഷം വിവാഹം നടത്തേണ്ടതാണെന്നാണ് ഇസ്ലാമിക നിയമമെന്നും യോഗം വിലയിരുത്തി.
ആരെങ്കിലും ഇത് ലംഘിച്ചാല്‍ യോഗത്തില്‍ അവര്‍ മാപ്പപേക്ഷിക്കണം. കൂടാതെ, 5100 രൂപ പിഴയും നല്‍കണമെന്ന് മൗലാന പറഞ്ഞു. എന്തിനാണ് പുതിയ നിയമം എന്നതിനെക്കുറിച്ചുള്ള ഇടിവി ഭാരത് പ്രതിനിധിയുടെ ചോദ്യത്തിന് മൗലാന മസൂദ് അക്‌തര്‍ ഖാദ്രിയുടെ മറുപടി ഇങ്ങനെയായിരുന്നു.
ഇന്നത്തെ ഫാഷന്‍ ലോകത്തില്‍ ആളുകള്‍ അവരുടെ വിവാഹത്തിനായി ധാരാളം പണം ചെലവഴിക്കുന്നു. എന്നാല്‍, വിവാഹത്തിന് വാദ്യഘോഷങ്ങളും കരിമരുന്ന് പ്രയോഗങ്ങളും ഉപയോഗിക്കണമെന്ന് ഇസ്ലാമിന്‍റെ നിയമങ്ങളില്‍ പറയുന്നില്ല. എല്ലാവരുടെയും താല്‍പര്യപ്രകാരം ചര്‍ച്ചകള്‍ നടത്തിയ ശേഷമാണ് തീരുമാനമെടുത്തതെന്നും ഡിസംബര്‍ 2 വെള്ളിയാഴ്‌ച മുതല്‍ ഇത് പ്രാബല്യത്തില്‍ വരുമെന്നും അദ്ദേഹം പ്രതികരിച്ചു.
