പലാമു : ജാർഖണ്ഡിൽ ഉഷ്‌ണതരംഗത്തെ തുടര്‍ന്ന് 24 മണിക്കൂറിനിടെ ആറുപേർ മരിച്ചു. മൃതദേഹങ്ങളുടെ പോസ്റ്റ്‌മോർട്ടം ഇന്ന് മേദിനി നഗര്‍ മെഡിക്കൽ കോളജ് ആശുപത്രിയിൽ നടത്തി. പലാമുവിലെ പങ്കി, പാടന്‍ (Patan), ഹുസൈനാബാദ്, മേദിനി നഗർ, ബിഷ്രാംപൂർ, ഛത്തർപൂർ എന്നീ പ്രദേശങ്ങളിലാണ് കൊടുംചൂട് മൂലം ആളുകളുടെ മരണം റിപ്പോര്‍ട്ട് ചെയ്‌തത്.
ഹുസൈനാബാദിലെ ദന്ദറിലാണ് ഉഷ്‌ണതരംഗത്തെ തുടര്‍ന്ന് ഒരു മരണം റിപ്പോര്‍ട്ട് ചെയ്‌തത്. സംസ്ഥാനത്ത് രേഖപ്പെടുത്തിയ ഉയര്‍ന്ന താപനില 45.9 ഡിഗ്രി സെൽഷ്യസാണ്. ജൂണ്‍ 18ന് പലാമുവിലാണ് ഈ താപനില റിപ്പോര്‍ട്ട് ചെയ്‌തത്. ഇവിടുത്തെ താപനില തുടർച്ചയായി 45 ഡിഗ്രി സെൽഷ്യസായി തുടരുന്ന സാഹചര്യമാണുള്ളത്. ഇന്ന് ഉച്ചതിരിഞ്ഞും താപനില 45 ഡിഗ്രി സെൽഷ്യസാണ് രേഖപ്പെടുത്തിയത്. കഴിഞ്ഞ ഒരാഴ്‌ചയ്ക്കിടെ ഉഷ്‌ണതരംഗത്തില്‍ 15ലധികം മൃതദേഹങ്ങളാണ് മേദിനി നഗര്‍ മെഡിക്കൽ കോളജ് ആശുപത്രിയിൽ പോസ്റ്റ്‌മോർട്ടം ചെയ്‌തത്.
മേദിനി നഗറില്‍ വീണ്ടും മരണം : റിപ്പോര്‍ട്ട് ചെയ്‌ത 15 മരണങ്ങളില്‍, ആറുപേരുടെ മരണകാരണം ഉഷ്‌ണതരംഗവും ഹൃദയാഘാതവുമാണെന്നാണ് വിവരം. മരിച്ചവരിൽ പ്രായമായവരും യുവാക്കളുമുണ്ട്. തിങ്കളാഴ്‌ച മേദിനി നഗറിലെ പലാമുവില്‍ അശോക് റാം എന്ന യുവാവാണ് മരിച്ചത്. പാടന്‍ പ്രദേശത്തെ ഭുദ്വയിൽ വിശ്വനാഥ് റാം എന്നയാളാണ് കൊടുംചൂടില്‍ മരിച്ചത്. മേദിനി നഗർ മുനിസിപ്പൽ കോർപറേഷൻ പരിധിയിലെ ഒരു സ്‌ത്രീയും കടുത്ത ചൂടിനെ തുടർന്ന് മരിച്ചു. മുൻകരുതൽ നടപടികൾ സ്വീകരിക്കാൻ ആരോഗ്യവകുപ്പ് നിർദേശം നൽകിയിട്ടുണ്ട്.
READ MORE | Bihar heat wave | ഉരുകിയൊലിച്ച് ബിഹാർ; ഉഷ്‌ണതരംഗത്തിൽ മരണം 70 കടന്നതായി അനൗദ്യോഗിക കണക്ക്
ഉത്തരേന്ത്യന്‍ സംസ്ഥാനങ്ങളിലെ സ്ഥിതി ഗുരുതരം : ജാര്‍ഖണ്ഡിന് പുറമെ ബിഹാര്‍, ഉത്തര്‍പ്രദേശ് അടക്കമുള്ള സംസ്ഥാനങ്ങളില്‍ ഉഷ്‌ണതരംഗത്തില്‍ നിരവധി മരണങ്ങളാണ് കഴിഞ്ഞ ദിവസങ്ങളില്‍ റിപ്പോര്‍ട്ട് ചെയ്‌തത്. ബിഹാറിലെ ഉഷ്‌ണതരംഗത്തിൽ 72 മണിക്കൂറിനിടെ 70 മരണങ്ങള്‍ റിപ്പോർട്ട് ചെയ്‌തെന്നാണ് അനൗദ്യോഗിക കണക്ക്. പല ജില്ലകളിലും മുൻകരുതൽ നടപടിയെന്നോണം ഭരണകൂടങ്ങള്‍ നിരോധനാജ്ഞ പ്രഖ്യാപിച്ചിട്ടുണ്ട്. ആളുകൾ വീടിനുപുറത്ത് ഇറങ്ങരുതെന്നും നിര്‍ദേശമുണ്ട്.
ALSO READ | Heat wave | ഉഷ്‌ണതരംഗത്തില്‍ യുപിയില്‍ 2 ദിവസത്തിനിടെ മരിച്ചത് 34 പേര്‍; ചൂടില്‍ വൈദ്യുതിയില്ലാതെ വലഞ്ഞ് ജനം
സ്‌കൂളുകൾ ഉൾപ്പടെ എല്ലാ വിദ്യാഭ്യാസ സ്ഥാപനങ്ങൾക്കും നിയന്ത്രണങ്ങൾ ഏർപ്പെടുത്തിയിട്ടുണ്ട്. താപനില ഉയരുന്ന സാഹചര്യത്തിൽ ഭോജ്‌പൂർ ജില്ലയിൽ റെഡ് അലർട്ട് പ്രഖ്യാപിച്ചു. ഇവിടെ രണ്ട് ദിവസത്തിനുള്ളിൽ 30 പേർക്ക് ജീവൻ നഷ്‌ടപ്പെട്ടെന്നാണ് വിവരം. ഉഷ്‌ണതരംഗത്തില്‍ ഉത്തര്‍പ്രദേശില്‍ ജൂണ്‍ 15, 16 തീയതികളിലായി 34 പേരാണ് മരിച്ചത്. മരിച്ചവര്‍ എല്ലാം 60 വയസിന് മുകളിലുള്ളവരാണെന്നാണ് റിപ്പോര്‍ട്ട്. ഇവര്‍ക്ക് നേരത്തേ മറ്റ് ആരോഗ്യപ്രശ്‌നങ്ങള്‍ ഉണ്ടായിരുന്നെന്നും ഡോക്‌ടര്‍മാര്‍ പറയുന്നു. ഇതേതുടര്‍ന്ന് പകല്‍ സമയങ്ങളില്‍ 60 വയസിന് മുകളിലുള്ളവര്‍ വീടിന് പുറത്ത് ഇറങ്ങരുതെന്നാണ് ഡോക്‌ടര്‍മാരുടെ നിര്‍ദേശം.
