ബോട്ടാട് (ഗുജറാത്ത്): ഗുജറാത്തിലെ ബോട്ടാടില്‍ വ്യാജ മദ്യം കഴിച്ച് എട്ടുപേര്‍ മരിച്ചു. സംഭവത്തില്‍ ഗുരുതരാവസ്ഥയിലുള്ള പത്തുപേര്‍ ആശുപത്രിയില്‍ ചികിത്സയിലാണ്. മരിച്ച എട്ടുപേരില്‍ രണ്ടുപേര്‍ ആശുപത്രിയില്‍ ചികിത്സക്കിടെയാണ് മരിച്ചത്.
സംഭവവുമായി ബന്ധപ്പെട്ട് പൊലീസ് അന്വേഷണം ഊര്‍ജിതമാക്കിയിട്ടുണ്ട്. സര്‍ ടീ ആശുപത്രിയില്‍ നിന്ന് ഡോക്‌ടര്‍മാരുടെ സംഘം സംഭവ സ്ഥലത്തെത്തി. അനധികൃത മദ്യ വില്‍പനയുമായി ബന്ധപ്പെട്ട് സംസ്ഥാനത്ത് നിരവധി രാഷ്ട്രീയ തർക്കങ്ങൾ നിലനില്‍ക്കുന്ന സാഹചര്യത്തിലാണ് ബോട്ടാടിലെ മദ്യ ദുരന്തം.
