ജൽപായ്‌ഗുരി (പശ്ചിമ ബംഗാൾ): പശ്ചിമ ബംഗാളിലെ ജൽപായ്‌ഗുരിയിലുണ്ടായ മിന്നൽ പ്രളയത്തിൽ നാല് സ്‌ത്രീകൾ ഉൾപ്പെടെ എട്ട് പേർ മരിച്ചു. ജൽപായ്‌ഗുരിയിലെ മാൽ നദിക്ക് സമീപം ഇന്നലെ (ഒക്‌ടോബർ 05) വൈകുന്നേരമാണ് മിന്നൽ പ്രളയം ഉണ്ടായത്. നദിയുടെ സമീപത്ത് നിന്നവർ പ്രളയത്തിൽ ഒഴുകിപ്പോകുകയായിരുന്നു. വിജയദശമി ദിനത്തിൽ ദുർഗ വിഗ്രഹങ്ങൾ നിമജ്ജനം ചെയ്യാനെത്തിയവരായിരുന്നു അപകടത്തിൽപ്പെട്ടവർ.
50ഓളം പേരെ രക്ഷപ്പെടുത്തി. 13 പേർക്ക് പരിക്ക് ഉള്ളതിനാൽ ചികിത്സക്കായി സമീപത്തെ ആശുപത്രിയിൽ പ്രവേശിപ്പിച്ചു. എസ്‌ഡിആർഎഫും പൊലീസും സ്ഥലത്ത് രക്ഷാപ്രവർത്തനം നടത്തുകയാണ്. അതേസമയം, മരണസംഖ്യ ഉയർന്നേക്കുമെന്ന് സംസ്ഥാന പിന്നാക്ക വിഭാഗ ക്ഷേമ മന്ത്രിയും മാൽ എംഎൽഎയുമായ ബുലു ചിക് ബറൈക് പറഞ്ഞു.
സംഭവം നടക്കുമ്പോൾ താനും സ്ഥലത്ത് ഉണ്ടായിരുന്നു. പെട്ടെന്നാണ് പ്രളയം ഉണ്ടായത്. വെള്ളത്തിന്‍റെ ഒഴുക്ക് ശക്തമായിരുന്നതിനാൽ നിരവധി പേരെ ഒഴുക്കിൽപ്പെട്ട് കാണാതായെന്നും എംഎൽഎ കൂട്ടിച്ചേർത്തു. പശ്ചിമബംഗാൾ നിയമസഭയിലെ പ്രതിപക്ഷനേതാവ് സുവേന്ദു അധികാരി രക്ഷാപ്രവർത്തനം വേഗത്തിൽ ആക്കണമെന്ന് ആവശ്യപ്പെട്ടു.
