ചെന്നൈ: സിനിമ ചിത്രീകരണത്തിന്‍റെ മറവില്‍ യുവതികളുടെ അശ്ലീല വീഡിയോകളും ചിത്രങ്ങളും പകര്‍ത്തിയ കേസില്‍ അറസ്റ്റിലായ തമിഴ്‌ സിനിമ സംവിധായകന്‍ വേല്‍സത്തിരന്‍ നിരവധി യുവതികളെ ചൂഷണം ചെയ്‌തതായി പൊലീസ്. മുന്നൂറിലധികം യുവതികളാണ് വേല്‍സത്തിരന്‍റെ അതിക്രമത്തിന് ഇരയായത് എന്നാണ് പൊലീസ് കണ്ടെത്തല്‍. ഇവരുടെ അശ്ലീല വീഡിയോകളും ചിത്രങ്ങളും ഇയാള്‍ പകര്‍ത്തിയിട്ടുണ്ടെന്നും പൊലീസ് പറഞ്ഞു.
അതിക്രമത്തിന് ഇരയായ പെണ്‍കുട്ടിയുടെ പരാതിയിന്‍മേല്‍ കഴിഞ്ഞ ദിവസമാണ് വേല്‍സത്തിരനെയും ഇയാളുടെ സഹായിയായ ജയജ്യോതിയെയും സേലം സൂരമംഗലം പൊലീസ് അറസ്റ്റ് ചെയ്‌തത്. സൂരമംഗലം എസ്ബിഐ ഓഫീസേഴ്‌സ് കോളനിയില്‍ ഗ്ലോബല്‍ ക്രിയേഷന്‍സ് എന്ന പേരില്‍ സിനിമ കമ്പനി നടത്തുകയാണ് വേല്‍സത്തിരന്‍. നോ എന്ന പേരില്‍ താന്‍ സിനിമ നിര്‍മിക്കുന്നുണ്ടെന്നും ചിത്രത്തിലേക്ക് നടിമാരെ ആവശ്യമുണ്ടെന്നും പരസ്യപ്പെടുത്തിയാണ് ഇയാള്‍ യുവതികളെ ആകര്‍ഷിച്ചത്.
ഓഡിഷനെത്തിയ യുവതികളോട് ഇയാള്‍ക്കൊപ്പം അടുത്തിടപഴകുന്ന രംഗങ്ങളും അശ്ലീല രംഗങ്ങളും അഭിനയിക്കാന്‍ ആവശ്യപ്പെട്ടു. ഇതിനെ എതിര്‍ത്ത യുവതികളോട് ദേശീയ പുരസ്‌കാരം ലക്ഷ്യമിട്ടു കൊണ്ട് നിര്‍മിക്കുന്ന ചിത്രം ആയതിനാലാണ് ഇത്തരം രംഗങ്ങള്‍ ഉള്‍പ്പെടുത്തിയത് എന്നാണ് ഇയാള്‍ പറഞ്ഞത്. എന്നാല്‍ പിന്നീട് ഈ ദൃശ്യങ്ങള്‍ ഉപയോഗിച്ച് യുവതികളെ ഭീഷണി പെടുത്തുകയും ലൈംഗികമായി ചൂഷണം ചെയ്യുകയുമായിരുന്നു.
യുവതികളില്‍ ഒരാള്‍ പരാതിപ്പെട്ടതിനെ തുടര്‍ന്നാണ് സംവിധായകനെയും സഹായിയെയും പൊലീസ് അറസ്റ്റ് ചെയ്‌തത്.
