ലഖ്‌നൗ : ഉത്തർപ്രദേശിൽ കാർ താഴ്‌ചയിലേയ്‌ക്ക് മറിഞ്ഞ് രണ്ട് കുട്ടികളടക്കം ആറ് പേർ മരിച്ചു. ശ്രാവസ്‌തി ജില്ലയിലെ ഇക്കൗന പ്രദേശത്താണ് അപകടം നടന്നത്. ബൽറാംപൂരിൽ നിന്ന് നേപ്പാൾഗഞ്ചിലേയ്‌ക്ക് പോകുകയായിരുന്ന വാഹനമാണ് അപകടത്തിൽപ്പെട്ടത്. കാറിന് മുന്നിൽപ്പെട്ട കന്നുകാലികളെ രക്ഷിക്കാൻ ശ്രമിക്കുന്നതിനിടെ ഡ്രൈവർക്ക് വാഹനത്തിന്‍റെ നിയന്ത്രണം നഷ്‌ടപ്പെടുകയായിരുന്നു.
തുടർന്ന് ബഹ്‌റൈച്ച് ബൽറാംപൂർ ദേശീയ പാതയിലെ താഴ്‌ചയിലേയ്‌ക്ക് വാഹനം മറിഞ്ഞു. അപകടത്തിൽ, യാത്രക്കാരായ ആറ് പേർ മരിക്കുകയും ഡ്രൈവർക്ക് പരിക്കേൽക്കുകയും ചെയ്‌തു. നേപ്പാൾ സ്വദേശികളായ നീതി (18), നിലാൻഷ് (30), വൈഭവ് ഗുപ്‌ത എന്നിവരാണ് മരിച്ചത്. മറ്റുള്ളവരെ തിരിച്ചറിഞ്ഞിട്ടില്ല. അതേസമയം കാർ ഡ്രൈവറുടെ നില ഗുരുതരമാണെന്നാണ് പൊലീസ് നൽകുന്ന വിവരം.
വാഹനം വൈദ്യുതലൈനിൽ തട്ടി അഞ്ച് മരണം : കഴിഞ്ഞ മാസമാണ് ഉത്തർപ്രദേശിലെ മീററ്റില്‍ തീർഥാടകർ സഞ്ചരിച്ച വാഹനം വൈദ്യുതി ലൈനിൽ തട്ടി അഞ്ച് പേർ മരിച്ചത്. മീററ്റിലെ ഒരു ഗ്രാമത്തിന് സമീപം ജൂലൈ 15 നാണ് അപകടം നടന്നത്. അപകടത്തിൽ വൈദ്യുതാഘാതമേറ്റ് 16 പേർക്ക് പരിക്കേറ്റിരുന്നു.
മീററ്റ് ജില്ലയിലെ ഭവൻപൂരിലുള്ള റാലി ചൗഹാൻ ഗ്രാമത്തിൽ താഴ്‌ന്നുകിടന്ന 11 കെവി (ഹൈടെൻഷൻ) വൈദ്യുതി ലൈനിൽ തീർഥാടകർ സഞ്ചരിച്ച വാഹനം തട്ടുകയായിരുന്നു. തുടർന്ന് നാട്ടുകാർ സ്ഥലത്തെത്തി അപകടത്തില്‍പ്പെട്ടവരെ അടുത്തുള്ള ആശുപത്രിയിൽ എത്തിച്ചെങ്കിലും അഞ്ച് പേർ മരിച്ചതായി സ്ഥിരീകരിച്ചു. 35 പേരാണ് വാഹനത്തില്‍ ഉണ്ടായിരുന്നത്. മരിച്ചവരിൽ രണ്ട് സഹോദരന്മാരും ഉൾപ്പെടുന്നതായാണ് വിവരം.
സ്‌കൂള്‍ ബസും കാറും കൂട്ടിയിടിച്ചു : ജൂലൈ 11 നാണ് ഗാസിയാബാദിൽ സ്‌കൂള്‍ ബസും കാറും കൂട്ടിയിടിച്ചുണ്ടായ അപകടത്തില്‍ സ്‌ത്രീകളടക്കം ആറ് പേര്‍ മരിച്ചത്. ഡല്‍ഹി- മീററ്റ് എക്‌സ്‌പ്രസ് ഹൈവേയിലായിരുന്നു സംഭവം. അപകട സമയത്ത് ബസില്‍ കുട്ടികള്‍ ഉണ്ടായിരുന്നില്ല. ഗാസിപൂരിനടുത്തുള്ള പമ്പില്‍ നിന്നും ഇന്ധനം നിറച്ച ശേഷം സ്‌കൂള്‍ ബസ് തെറ്റായ ദിശയില്‍ സഞ്ചരിക്കവെ മീററ്റില്‍ നിന്നും വന്ന കാറുമായി കൂട്ടിയിടിക്കുകയായിരുന്നു.
Read More : Uttar pradesh accident| സ്‌കൂള്‍ ബസും കാറും കൂട്ടിയിടിച്ച് അപകടം; 6 മരണം, 2 പേര്‍ക്ക് പരിക്ക്
ബസ് നദിയിൽ വീണ് മൂന്ന് മരണം : ഇന്നലെ രാത്രിയാണ് ജാർഖണ്ഡിലെ ഗിരിദിഹ് - ദുമ്രി ദേശീയ പാതയിൽ 30 യാത്രക്കാരുമായി പോയിരുന്ന ബസ് നദിയിലേയ്‌ക്ക് മറിഞ്ഞ് അപകടം ഉണ്ടായത്. അപകടത്തിൽ മൂന്ന് പേർ മരിക്കുകയും 20 ഓളം പേർക്ക് പരിക്കേൽക്കുകയും ചെയ്‌തിരുന്നു. രാത്രി 8.40 ഓടെ ബരാകിർ നദിയിലേയ്‌ക്കാണ് ബസ് മറിഞ്ഞത്.
