ಚೆನ್ನೈ (ತಮಿಳುನಾಡು): ಮೊದಲ ಪ್ರಯತ್ನದಲ್ಲಿ ಸೋಲು ಅನುಭವಿಸಿದರೂ ಸಿಕ್ಕ ಇನ್ನೊಂದು ಅವಕಾಶವನ್ನು ಸಮರ್ಥವಾಗಿ ಬಳಸಿಕೊಂಡ ಸನ್ರೈಸರ್ಸ್ ಹೈದರಾಬಾದ್ ತಂಡ ಇಂಡಿಯನ್ ಪ್ರೀಮಿಯರ್ ಲೀಗ್(ಐಪಿಎಲ್)ನ ಫೈನಲ್ ಪ್ರವೇಶಿಸಿತು. ಎರಡನೇ ಕ್ವಾಲಿಫೈಯರ್ನಲ್ಲಿ ಮಾಜಿ ಚಾಂಪಿಯನ್ ರಾಜಸ್ಥಾನ ರಾಯಲ್ಸ್ ತಂಡವನ್ನು 36 ರನ್ಗಳಿಂದ ಸೋಲಿಸಿ, ಪ್ರಶಸ್ತಿ ಸುತ್ತಿಗೆ ಪ್ರವೇಶ ಪಡೆಯಿತು.
ಇಲ್ಲಿನ ಪಿ.ಚಿದಂಬರಂ(ಚೆಪಾಕ್) ಕ್ರೀಡಾಂಗಣದಲ್ಲಿ ಶುಕ್ರವಾರ ರಾತ್ರಿ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಸನ್ರೈಸರ್ಸ್ ಪಡೆ 9 ವಿಕೆಟ್ಗೆ 175 ರನ್ಗಳ ಸಾಧಾರಣ ಮೊತ್ತ ಗಳಿಸಿತು. ಈಗಿನ ಟಿ20 ಕ್ರಿಕೆಟ್ನಲ್ಲಿ 200 ರನ್ ಕೂಡ ಸುಲಭದ ತುತ್ತಾಗಿರುವಾಗ ರಾಜಸ್ಥಾನ ರಾಯಲ್ಸ್ ಬ್ಯಾಟಿಂಗ್ ವೈಫಲ್ಯ ಅನುಭವಿಸಿ 139 ರನ್ ಮಾತ್ರ ಗಳಿಸಿ ಸೋಲೊಪ್ಪಿಕೊಂಡು ಟೂರ್ನಿಯಿಂದ ಹೊರಬಿದ್ದಿತು.
ಚೆನ್ನೈನ ಸ್ಪಿನ್ ಪಿಚ್ನಲ್ಲಿ ಹೈದರಾಬಾದ್ನ ಶಹಬಾಜ್ ಅಹ್ಮದ್, ಅಭಿಷೇಕ್ ಶರ್ಮಾ ಜಾದೂ ಮಾಡುವ ಮೂಲಕ ರಾಯಲ್ಸ್ ಬ್ಯಾಟರ್ಗಳು ರನ್ ಗಳಿಸದಂತೆ ತಡೆಯುವುದಲ್ಲದೇ ವಿಕೆಟ್ ಉದುರಿಸುತ್ತಾ ಸಾಗಿದರು. ಇದರಿಂದ ಸಂಜು ಸ್ಯಾಮ್ಸನ್ ಪಡೆ ಯಾವುದೇ ಹಂತದಲ್ಲಿ ಪ್ರತಿರೋಧ ಒಡ್ಡಲು ಸಾಧ್ಯವಾಗಲಿಲ್ಲ.
ಟೂರ್ನಿಯ ಆರಂಭದಲ್ಲಿ ಅಬ್ಬರಿಸಿದ್ದ ರಾಜಸ್ಥಾನ ಬಳಿಕ ಮಂಕಾಗಿತ್ತು. ಪ್ಲೇಆಫ್ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವನ್ನು ಸೋಲಿಸಿ ಎರಡನೇ ಕ್ವಾಲಿಫೈಯರ್ಗೆ ಬಂದಿತ್ತು. ಟಾಸ್ ಗೆದ್ದು ಬೌಲಿಂಗ್ ಆಯ್ಕೆ ಮಾಡಿಕೊಂಡರೂ, ಬ್ಯಾಟಿಂಗ್ನಲ್ಲಿ ಎಡವಿದರು. ಯಶಸ್ವಿ ಜೈಸ್ವಾಲ್ 42, ಧ್ರುವ್ ಜುರೆಲ್ 56 ಅರ್ಧಶತಕ ಗಳಿಸಿದ್ದು ಬಿಟ್ಟರೆ ಯಾವೊಬ್ಬ ಬ್ಯಾಟರ್ ಕೂಡ ರನ್ ಗಳಿಸಲಿಲ್ಲ. ಟಾಮ್ ಕಾಡ್ಮೋರ್ 10, ನಾಯಕ ಸಂಜು ಸ್ಯಾಮ್ಸನ್ 10, ರಿಯಾನ್ ಪರಾಗ್ 6, ಶಿಮ್ರಾನ್ ಹೆಟ್ಮಾಯರ್ 4, ಪೊವೆಲ್ 6 ರನ್ಗೆ ವಿಕೆಟ್ ನೀಡಿದ್ದು ದುಬಾರಿಯಾಯಿತು.
ಸನ್ ಸ್ಪಿನ್ ಜಾದು: ಹೈದರಾಬಾದ್ ತಂಡದ ಬಲ ವೇಗಿಗಳು. ಆದರೆ, ಪಂದ್ಯದಲ್ಲಿ ಸ್ಪಿನ್ನರ್ಗಳು ಜಾದು ಮಾಡಿದರು. ಸ್ಪಿನ್ಸ್ನೇಹಿ ಪಿಚ್ ಅನ್ನು ಬಳಸಿಕೊಂಡ ಕಮಿನ್ಸ್ ಶಹಬಾಜ್ ಅಹ್ಮದ್ರನ್ನು ಇಂಪ್ಯಾಕ್ಟ್ ಪ್ಲೇಯರ್ ಆಗಿ ಕಣಕ್ಕಿಳಿಸಿ ಲಾಭ ಮಾಡಿಕೊಂಡರು. ಶಹಾಬಾಜ್ 4 ಓವರ್ಗಳಲ್ಲಿ 23 ರನ್ ನೀಡಿ 3 ವಿಕೆಟ್ ಕಿತ್ತರೆ, ಅಭಿಷೇಕ್ ಶರ್ಮಾ 4 ಓವರ್ಗಳಲ್ಲಿ 24 ರನ್ 2 ವಿಕೆಟ್ ಪಡೆದರು.
ಇದಕ್ಕೂ ಮೊದಲು ಹೈದರಾಬಾದ್ ಬ್ಯಾಟಿಂಗ್ನಲ್ಲಿ ಅಷ್ಟೇನೂ ಮಿಂಚಲಿಲ್ಲ. ಟ್ರಾವಿಸ್ ಹೆಡ್ 34, ಹೆನ್ರಿಚ್ ಕ್ಲಾಸಿನ್ 50, ರಾಹುಲ್ ತ್ರಿಪಾಠಿ 37, ಶಹಬಾಜ್ ಅಹ್ಮದ್ 18, ಅಭಿಷೇಕ್ ಶರ್ಮಾ 12 ರನ್ ಗಳಿಸಿದ್ದರು. ರಾಯಲ್ಸ್ ವೇಗಿಗಳ ದಾಳಿಗೆ ಸಿಲುಕಿದ ತಂಡ 175 ರನ್ ಗಳಿಸಿತ್ತು. ಟ್ರೆಂಟ್ ಬೌಲ್ಟ್, ಆವೇಶ್ ಖಾನ್ ತಲಾ 3, ಸಂದೀಪ್ ಶರ್ಮಾ 2 ವಿಕೆಟ್ ಉದುರಿಸಿದರು.
ಭಾನುವಾರ ಫೈನಲ್ ಕದನ: ಈ ಆವೃತ್ತಿಯ ಫೈನಲ್ ಕದನ ಮೇ 26 ರಂದು ಚೆನ್ನೈನ ಚೆಪಾಕ್ ಕ್ರೀಡಾಂಗಣದಲ್ಲಿ ನಡೆಯಲಿದೆ. ಮೊದಲ ತಂಡವಾಗಿ ಫೈನಲ್ ಪ್ರವೇಶಿಸಿರುವ ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧ ಸನ್ರೈಸರ್ಸ್ ಹೈದರಾಬಾದ್ ಪ್ರಶಸ್ತಿಗಾಗಿ ಸೆಣಸಾಡಲಿದೆ.
ಇದನ್ನೂ ಓದಿ: T20 ವಿಶ್ವಕಪ್ಗಾಗಿ ವೀಕ್ಷಕ ವಿವರಣೆಗಾರರ ಪಟ್ಟಿ ಬಿಡುಗಡೆ ಮಾಡಿದ ಐಸಿಸಿ - T20 World Cup 2024
