ವಿಶಾಖಪಟ್ಟಣಂ (ಆಂಧ್ರಪ್ರದೇಶ): ಇಲ್ಲಿ ನಡೆಯುತ್ತಿರುವ ಇಂಗ್ಲೆಂಡ್ ಮತ್ತು ಭಾರತ ನಡುವಿನ 2ನೇ ಟೆಸ್ಟ್ ಪಂದ್ಯ ಕೊನೆಯ ಘಟ್ಟ ತಲುಪಿದೆ. ಭಾರತ 2ನೇ ಇನ್ನಿಂಗ್ಸ್ನಲ್ಲಿ 255 ರನ್ ಗಳಿಸಿ ಆಲೌಟ್ ಆಗಿದ್ದು, ಮೊದಲ ಇನ್ನಿಂಗ್ಸ್ನ 143 ರನ್ಗಳ ಲೀಡ್ ಸೇರಿ 399 ರನ್ಗಳ ಬೃಹತ್ ಗುರಿ ನೀಡಿದೆ. ಮೂರನೇ ದಿನದಂತ್ಯಕ್ಕೆ 2ನೇ ಇನಿಂಗ್ಸ್ ಆರಂಭಿಸಿದ ಆಂಗ್ಲ ಪಡೆ 1 ವಿಕೆಟ್ಗೆ 67 ರನ್ ಗಳಿಸಿದ್ದು, ಗೆಲುವಿಗೆ 332 ರನ್ ಬೇಕಿದೆ.
ಎಂದಿನಂತೆ ತಮ್ಮ ಬಾಜ್ಬಾಲ್ ಆಟದ ಮೂಲಕ ಬಿರುಸಿನ ಆರಂಭ ನೀಡಿದ ಜಾಕ್ ಕ್ರಾಲಿ ಮತ್ತು ಬೆನ್ ಡಕೆಟ್ ಮೊದಲ ವಿಕೆಟ್ಗೆ 50 ರನ್ ಸೇರಿಸಿದರು. ಮೂರನೇ ದಿನದ ಆಟ ಮುಗಿಯಲು ಮೂರು ಓವರ್ ಬಾಕಿ ಇರುವಾಗ ಆರ್.ಅಶ್ವಿನ್ ಎಸೆತದಲ್ಲಿ ಡಕೆಟ್ ವಿಕೆಟ್ ನೀಡಿದರು. ಪಂದ್ಯದ ಮೇಲೆ ಹಿಡಿತ ಸಾಧಿಸಿರುವ ಭಾರತದ ಗೆಲುವಿಗೆ 9 ವಿಕೆಟ್ ಬೇಕಿದೆ. ಇನ್ನೂ 2 ಪೂರ್ಣ ದಿನದ ಆಟ ಬಾಕಿ ಇದೆ. 29 ರನ್ ಗಳಿಸಿರುವ ಜಾಕ್ ಕ್ರಾಲಿ, ನೈಟ್ ವಾಚ್ಮನ್ ರೆಹಾನ್ ಅಹ್ಮದ್ ನಾಳೆಗೆ ಬ್ಯಾಟಿಂಗ್ ಕಾಯ್ದುಕೊಂಡಿದ್ದಾರೆ.
ಶತಕ ಗಳಿಸಿ ಲಯಕ್ಕೆ ಬಂದ ಗಿಲ್: 28 ರನ್ಗಳೊಂದಿಗೆ ಮೂರನೇ ದಿನದಾಟ ಆರಂಭಿಸಿದ ಭಾರತಕ್ಕೆ ಅನುಭವಿ ವೇಗಿ ಜೇಮ್ಸ್ ಆ್ಯಂಡರ್ಸನ್ ಶಾಕ್ ನೀಡಿದರು. ಮೊದಲ ಓವರ್ನಲ್ಲೇ ನಾಯಕ ರೋಹಿತ್ ಶರ್ಮಾರನ್ನು ಕ್ಲೀನ್ಬೌಲ್ಡ್ ಮಾಡಿದರು. ಬಳಿಕ 2 ರನ್ ಅಂತರದಲ್ಲಿ ದ್ವಿಶತಕ ವೀರ ಜೈಸ್ವಾಲ್ಗೆ ಪೆವಿಲಿಯನ್ ಹಾದಿ ತೋರಿಸಿದರು. ಇದು ತಂಡವನ್ನು ತುಸು ಒತ್ತಡಕ್ಕೆ ಸಿಲುಕಿಸಿತು.
ರನ್ ಬರದಿಂದ ತೀವ್ರ ಟೀಕೆಗೆ ಗುರಿಯಾಗಿರುವ ಡ್ಯಾಶಿಂಗ್ ಬ್ಯಾಟರ್ ಶುಭ್ಮನ್ ಗಿಲ್ ಭರ್ಜರಿ ಬ್ಯಾಟ್ ಬೀಸಿ ಶತಕ ಸಾಧನೆ ಮಾಡಿದರು. ಒಂದೆಡೆ ವಿಕೆಟ್ ಬೀಳುತ್ತಿದ್ದರೂ ದೃಢವಾಗಿ ನಿಂತ ಯುವ ಬ್ಯಾಟರ್ 104 ರನ್ ಗಳಿಸಿ ತಂಡವನ್ನು ಆಧರಿಸಿದರು. ಈ ಮೂಲಕ ಮೂರನೇ ಕ್ರಮಾಂಕದಲ್ಲಿ ತವರಿನಲ್ಲಿ 7 ವರ್ಷಗಳಿಂದ ದಾಖಲಾಗದ ಶತಕದ ಬರವನ್ನೂ ನೀಗಿಸಿದರು. ಜೊತೆಗೆ ತಮ್ಮೆಲ್ಲಾ ಟೀಕಾಕಾರರಿಗೆ ಬ್ಯಾಟ್ ಮೂಲಕ ಉತ್ತರಿಸಿದರು.
ಶ್ರೇಯಸ್ ಅಯ್ಯರ್ 29, ರಜತ್ ಪಾಟೀದಾರ್ 9, ಶ್ರೀಕರ್ ಭರತ್ 6 ಮತ್ತೆ ನಿರಾಸೆ ಮೂಡಿಸಿದರು. ಕೊನೆಯಲ್ಲಿ ಅಕ್ಷರ್ ಪಟೇಲ್ 45, ಆರ್.ಅಶ್ವಿನ್ 29 ರನ್ ಗಳಿಸಿ ತಂಡ 250 ರ ಗಡಿ ದಾಟುವಂತೆ ಮಾಡಿದರು. ಮೂರನೇ ಅವಧಿಯ ಕೊನೆಯಲ್ಲಿ ಅಶ್ವಿನ್ ಔಟಾಗುವ ಮೂಲಕ ಭಾರತದ ಇನ್ನಿಂಗ್ಸ್ಗೆ ತೆರೆ ಬಿತ್ತು. ಭಾರತ ಒಟ್ಟಾರೆ 399 ರನ್ಗಳ ಬೃಹತ್ ಗುರಿಯನ್ನು ಇಂಗ್ಲೆಂಡ್ಗೆ ನೀಡಿದೆ. ಇಂಗ್ಲೆಂಡ್ ಪರವಾಗಿ ಟಾಮ್ ಹಾರ್ಟ್ಲಿ 4, ರೆಹಾನ್ ಅಹ್ಮದ್, ಜೇಮ್ಸ್ ತಲಾ 2 ವಿಕೆಟ್ ಪಡೆದರು.
ಇದನ್ನೂ ಓದಿ: 2ನೇ ಮಗುವಿನ ನಿರೀಕ್ಷೆಯಲ್ಲಿ 'ವಿರುಷ್ಕಾ' ದಂಪತಿ: ಮಾಹಿತಿ ಖಚಿತಪಡಿಸಿದ ಎಬಿ ಡಿ
