ಪುಣೆ : ಬಿಸಿಲಿನ ತಾಪ ಹೆಚ್ಚಳದಿಂದಾಗಿ ವಯಸ್ಕರಲ್ಲಿ ಮೂತ್ರನಾಳದ ಸೋಂಕು ಮತ್ತು ಮೂತ್ರಪಿಂಡದ ಕಲ್ಲುಗಳ (ಕಿಡ್ನಿ ಸ್ಟೋನ್) ಸಮಸ್ಯೆಯಲ್ಲಿ ಗಮನಾರ್ಹ ಏರಿಕೆ ಕಂಡುಬಂದಿದೆ ಎಂದು ವೈದ್ಯರು ಸೋಮವಾರ ವರದಿ ಮಾಡಿದ್ದಾರೆ. ಕಿಡ್ನಿ ಸ್ಟೋನ್ ಇವು ಖನಿಜ ಮತ್ತು ಆಮ್ಲ ಲವಣಗಳ ಸಣ್ಣ, ಗಟ್ಟಿಯಾದ ನಿಕ್ಷೇಪಗಳಾಗಿವೆ. ಮೂತ್ರವು ಸಾಂದ್ರೀಕೃತವಾದಾಗ ಈ ಕಲ್ಲುಗಳು ರೂಪುಗೊಳ್ಳುತ್ತವೆ. ಕಿಡ್ನಿ ಸ್ಟೋನ್ ಅಪಾಯ ಕಡಿಮೆ ಮಾಡಲು ಸಾಕಷ್ಟು ನೀರು ಕುಡಿಯುವ ಮೂಲಕ ಹೈಡ್ರೇಟೆಡ್ ಆಗಿರುವುದು ಮುಖ್ಯವಾಗಿದೆ ಎಂದು ವೈದ್ಯರು ಸಲಹೆ ನೀಡಿದ್ದಾರೆ.
"ಬೇಸಿಗೆಯಲ್ಲಿ ಕಿಡ್ನಿ ಸ್ಟೋನ್ ಸಮಸ್ಯೆಗಳು ಹೆಚ್ಚಾಗುವ ಸಾಧ್ಯತೆಯಿದೆ. ಶಾಖದಿಂದಾಗಿ ದೇಹದಲ್ಲಿ ನೀರಿನ ಪ್ರಮಾಣ ಕಡಿಮೆಯಾದಾಗ ಈ ಸಮಸ್ಯೆ ಉಂಟಾಗುತ್ತದೆ. ಪ್ರತಿದಿನ 2 ರಿಂದ 3 ರೋಗಿಗಳು ಹೊಟ್ಟೆ ನೋವಿನ ಕಾರಣದಿಂದ ಚಿಕಿತ್ಸೆಗಾಗಿ ಬರುತ್ತಿದ್ದಾರೆ" ಎಂದು ಪುಣೆಯ ಅಪೊಲೊ ಸ್ಪೆಕ್ಟ್ರಾ ಮೂತ್ರಶಾಸ್ತ್ರಜ್ಞ ಡಾ. ಪವನ್ ರಂಗದಾಳೆ ಐಎಎನ್ಎಸ್ಗೆ ತಿಳಿಸಿದರು.
"ಬಿಸಿ ವಾತಾವರಣದಲ್ಲಿ ನಿಯಮಿತವಾಗಿ ನೀರು ಕುಡಿಯಬೇಕು ಮತ್ತು ಮೂತ್ರದ ಬಣ್ಣವು ಶುದ್ಧ ನೀರಿನಂತೆ ಇರಬೇಕು. ಹಳದಿ ಮೂತ್ರವು ನಿರ್ಜಲೀಕರಣವನ್ನು ಸೂಚಿಸುತ್ತದೆ" ಎಂದು ವೈದ್ಯರು ಹೇಳಿದರು. ನಿರಂತರ ಬೆವರುವಿಕೆಯಿಂದ ಉಂಟಾಗುವ ದ್ರವ ನಷ್ಟವನ್ನು ಸಾಕಷ್ಟು ಜಲಸಂಚಯನದಿಂದ ಸರಿದೂಗಿಸಬೇಕು. ಇಲ್ಲದಿದ್ದರೆ ಮೂತ್ರಪಿಂಡದಲ್ಲಿ ಮೂತ್ರದ ಸಾಂದ್ರೀಕರಣವಾಗುತ್ತದೆ ಮತ್ತು ಇದರಿಂದ ಕಿಡ್ನಿ ಸ್ಟೋನ್ ಉಂಟಾಗುತ್ತವೆ ಎಂದು ಅವರು ಸಲಹೆ ನೀಡಿದರು.
"ಬೇಗನೆ ಚಿಕಿತ್ಸೆ ಪಡೆಯದಿದ್ದರೆ ಕಿಡ್ನಿ ಸ್ಟೋನ್ಗಳಿಂದ ಮೂತ್ರಪಿಂಡಕ್ಕೆ ಸೋಂಕು ತಗುಲಬಹುದು ಅಥವಾ ಕೆಲವೊಮ್ಮೆ ಮೂತ್ರಪಿಂಡ ವಿಫಲವಾಗಬಹುದು" ಎಂದು ಅವರು ಹೇಳಿದರು.
ಬೆನ್ನು ಅಥವಾ ಹೊಟ್ಟೆಯಲ್ಲಿ ತೀವ್ರ ನೋವು, ವಾಕರಿಕೆ ಮತ್ತು ಮೂತ್ರದಲ್ಲಿ ರಕ್ತ, ಮೂತ್ರ ವಿಸರ್ಜನೆಯ ತುರ್ತು ಇವು ಕಿಡ್ನಿ ಸ್ಟೋನ್ನ ಕೆಲ ಸಾಮಾನ್ಯ ಲಕ್ಷಣಗಳಾಗಿವೆ ಎಂದು ವೈದ್ಯರು ಮಾಹಿತಿ ನೀಡಿದರು.
ಈ ಬಗ್ಗೆ ಐಎಎನ್ಎಸ್ನೊಂದಿಗೆ ಮಾತನಾಡಿದ ಝೈನೋವಾ ಶಾಲ್ಬಿ ಆಸ್ಪತ್ರೆಯ ಮೂತ್ರಶಾಸ್ತ್ರಜ್ಞ ಡಾ. ರವೀಂದರ್ ಹೋಡರ್ಕರ್, "ಕೆಲ ಕಲ್ಲುಗಳು ಯಾವುದೇ ಚಿಕಿತ್ಸೆಯಿಲ್ಲದೆ ತಾವಾಗಿಯೇ ಕರಗುತ್ತವೆ. ಆದರೆ ದೊಡ್ಡದಕ್ಕೆ ಶಸ್ತ್ರಚಿಕಿತ್ಸೆ ಅಗತ್ಯವಾಗಬಹುದು. ಬೇಸಿಗೆ ಕಾಲದಲ್ಲಿ ಕಿಡ್ನಿ ಸ್ಟೋನ್ ಸಮಸ್ಯೆ ಕಾಣಿಸಿಕೊಳ್ಳುವುದು ಅತ್ಯಧಿಕ" ಎಂದು ಹೇಳಿದರು. ಕಿಡ್ನಿ ಸ್ಟೋನ್ ರಚನೆಯ ಸಾಧ್ಯತೆಗಳನ್ನು ಕಡಿಮೆ ಮಾಡಲು ಪಾಲಕ್, ಸಿಹಿ ಆಲೂಗಡ್ಡೆ, ಬೀಟ್ರೂಟ್ ಮತ್ತು ಬಾದಾಮಿಯಂತಹ ಆಹಾರಗಳನ್ನು ಅನುಸರಿಸಲು ತಜ್ಞರು ಶಿಫಾರಸು ಮಾಡಿದ್ದಾರೆ.
ಇದನ್ನೂ ಓದಿ : ಲಸಿಕೆಗಳು ಮತ್ತು ಪುನರಾವರ್ತಿತ ಕೋವಿಡ್ ಸೋಂಕುಗಳಿಂದ ರೋಗ ನಿರೋಧಕ ಶಕ್ತಿ ಹೆಚ್ಚಳ: ಅಧ್ಯಯನ ವರದಿ - Covid 19 Vaccines And Immunity
