ಬಾಲಿವುಡ್ ನಟ ಸಲ್ಮಾನ್ ಖಾನ್ ತಮ್ಮ ಮುಂಬರುವ ಆ್ಯಕ್ಷನ್-ಡ್ರಾಮಾ 'ಸಿಖಂದರ್' ಸಲುವಾಗಿ ಸುದ್ದಿಯಲ್ಲಿದ್ದಾರೆ. ಸೌತ್ ಸ್ಟಾರ್ ನಟಿ ರಶ್ಮಿಕಾ ಮಂದಣ್ಣ ಈ ಚಿತ್ರದಲ್ಲಿ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಸಿನಿಮಾ ಶೂಟಿಂಗ್ ಮುಂದಿನ ತಿಂಗಳು ಜೂನ್ನಲ್ಲಿ ಆರಂಭವಾಗಲಿದೆ. ಸಿಖಂದರ್ ಭಾಯ್ಜಾನ್ ಅಭಿಮಾನಿಗಳಿಗೆ ಈದ್ ಉಡುಗೊರೆ ಅಂತಲೇ ಹೇಳಬಹುದು. ಹೌದು, ಚಿತ್ರ 2025ರ ಈದ್ ಸಂದರ್ಭದಲ್ಲಿ ಚಿತ್ರಮಂದಿರ ಪ್ರವೇಶಿಸಲಿದೆ. ಅಮೀರ್ ಖಾನ್ ಜೊತೆ ಗಜಿನಿ ಸಿನಿಮಾ ಮಾಡಿದ್ದ ನಿರ್ದೇಶಕ ಎ.ಆರ್.ಮುರುಗದಾಸ್ ಈ ಸಿನಿಮಾ ನಿರ್ದೇಶಿಸಲಿದ್ದಾರೆ. ಸದ್ಯ ವಿಲನ್ ಹುಡುಕಾಟ ನಡೆಯುತ್ತಿದೆ. ಚಿತ್ರಕ್ಕಾಗಿ ಮೂವರು ಸೌತ್ ಸ್ಟಾರ್ಗಳ ಹೆಸರುಗಳು ಕೇಳಿ ಬರುತ್ತಿದೆ.
ಸಾಜಿದ್ ನಾಡಿಯಾಡ್ವಾಲಾ ಅವರ ಪ್ರೊಡಕ್ಷನ್ ಹೌಸ್‌ನಲ್ಲಿ ತಯಾರಾಗುತ್ತಿರುವ ಸಿಖಂದರ್‌ಗಾಗಿ ಸೌತ್ ಸ್ಟಾರ್ಗಳ ಹೆಸರುಗಳು ಮುಂಚೂಣಿಯಲ್ಲಿವೆ. ದಕ್ಷಿಣ ಪ್ರೇಕ್ಷಕರನ್ನು ಆಕರ್ಷಿಸಲು ಇದೊಂದು ಪ್ರಯತ್ನ ಎನ್ನಲಾಗುತ್ತಿದೆ. ಮೊದಲನೆಯದಾಗಿ, ವಾಂಟೆಡ್ ಚಿತ್ರದಲ್ಲಿ ಸಲ್ಮಾನ್ ಖಾನ್ ಜೊತೆ ಕೆಲಸ ಮಾಡಿರುವ ಪ್ರಕಾಶ್ ರಾಜ್ ಹಾಗು ರೋಜಾ, ಬಾಂಬೆ ನಟ ಅರವಿಂದ್ ಸ್ವಾಮಿ ಹೆಸರೂ ಕೇಳಿಬಂದಿದೆ. ಸಿಖಂದರ್ನ ವಿಲನ್ ಆಗಿ ಅರವಿಂದ್ ಸ್ವಾಮಿ ಆಯ್ಕೆಯಾದರೆ, ಇವರಿಬ್ಬರ ಕಾಂಬಿನೇಶನ್ನ ಚೊಚ್ಚಲ ಚಿತ್ರವಾಗಲಿದೆ. ಇವರೊಟ್ಟಿಗೆ, ದಕ್ಷಿಣ ಚಿತ್ರರಂಗದ ಯಂಗ್ ಸ್ಟಾರ್ ಕಾರ್ತಿಕೇಯ ಗುಮ್ಮಕೊಂಡ ಅವರ ಹೆಸರು ಮುಂಚೂಣಿಗೆ ಬಂದಿದೆ. 31ರ ಹರೆಯದ ಗುಮ್ಮಕೊಂಡ 2017 ರಿಂದ ತೆಲುಗು ಚಿತ್ರರಂಗದಲ್ಲಿ ಸಕ್ರಿಯರಾಗಿದ್ದಾರೆ. ಪ್ರೇಮಥೋ ಮೀ ಕಾರ್ತಿಕ್, ಆರ್ಎಕ್ಸ್ 100, ಬೆದುರುಲಂಕಾ 2012 ರಂತಹ ಹಲವು ಚಿತ್ರಗಳಲ್ಲಿ ಕೆಲಸ ಮಾಡಿದ್ದಾರೆ.
ಸದ್ಯ ಈ ಮೂವರ ಹೆಸರು ಕೇಳಿಬರುತ್ತಿದ್ದು, ಯಾರು ವಿಲನ್ ಎಂಬ ಅಧಿಕೃತ ಮಾಹಿತಿಯನ್ನು ಚಿತ್ರತಂಡ ಇನ್ನಷ್ಟೇ ಕೊಡಬೇಕಿದೆ. ಆದ್ರೀಗ ಭಾಯ್ಜಾನ್ ಅಭಿಮಾನಿಗಳು ಸಿಖಂದರ್ ಚಿತ್ರದಲ್ಲಿ ಸಲ್ಮಾನ್ ಖಾನ್ ಜೊತೆ ಯಾರು ಎದುರಾಳಿಯಾಗಿ ಕಾಣಿಸಿಕೊಳ್ಳಲಿದ್ದಾರೆ ಎಂಬುದನ್ನು ತಿಳಿಯಲು ಕುತೂಹಲದಿಂದ ಕಾಯುತ್ತಿದ್ದಾರೆ.
ಇದನ್ನೂ ಓದಿ: ಸಲ್ಮಾನ್ ಖಾನ್ ನಟನೆಯ 'ಸಿಖಂದರ್'ಗೆ ನಾಯಕಿಯಾದ ರಶ್ಮಿಕಾ ಮಂದಣ್ಣ - Rashmika Mandanna
ನಾಡಿಯಾಡ್ವಾಲಾ ಗ್ರ್ಯಾಂಡ್‌ಸನ್ ಎಂಟರ್‌ಟೈನ್‌ಮೆಂಟ್‌ನ ಸಾಜಿದ್ ನಾಡಿಯಾಡ್ವಾಲಾ ಈ ಚಿತ್ರದ ನಿರ್ಮಾಪಕ. 2014ರಲ್ಲಿ ಬಿಡುಗಡೆಯಾದ 'ಕಿಕ್' ನಂತರ ಬರುತ್ತಿರುವ ಸಾಜಿದ್ ಮತ್ತು ಸಲ್ಮಾನ್ ಕಾಂಬಿನೇಶನ್ನ ಸಿನಿಮಾವಿದು. ಸದ್ಯ ಚಿತ್ರ ಪ್ರೀ-ಪ್ರೊಡಕ್ಷನ್ ಹಂತದಲ್ಲಿದ್ದು, ಮುಂದಿನ ತಿಂಗಳು ಚಿತ್ರೀಕರಣ ಆರಂಭವಾಗಲಿದೆ.
ಇದನ್ನೂ ಓದಿ: ಮೆಗಾಸ್ಟಾರ್ ಚಿರಂಜೀವಿಯ 'ವಿಶ್ವಂಭರ'ದಲ್ಲಿ ಚುಟು ಚುಟು ಬೆಡಗಿ ಆಶಿಕಾ ರಂಗನಾಥ್ - Ashika Ranganath In Vishwambhara
ಬಹುಭಾಷೆಗಳಲ್ಲಿ ಸಕ್ರಿಯರಾಗಿರುವ ಕನ್ನಡದ ನ್ಯಾಶನಲ್ ಕ್ರಶ್ ಖ್ಯಾತಿಯ ರಶ್ಮಿಕಾ ಮಂದಣ್ಣ 2022ರಲ್ಲಿ ಗುಡ್ಬೈ ಸಿನಿಮಾ ಮೂಲಕ ಬಾಲಿವುಡ್ ಪ್ರವೇಶಿಸಿದರು. ಬಳಿಕ ಮಿಷನ್ ಮಜ್ನು ಮತ್ತು ಅನಿಮಲ್ ಸಿನಿಮಾಗಳಲ್ಲಿ ಕಾಣಿಸಿಕೊಂಡರು. ಮುಂದೆ ವಿಕ್ಕಿ ಕೌಶಲ್ ಜೊತೆ ಛಾವಾದಲ್ಲಿಯೂ ಪಾತ್ರ ಮಾಡಲಿದ್ದಾರೆ.
