ಭಾರತೀಯ ಚಿತ್ರರಂಗದಲ್ಲಿ ಸಖತ್ ಹೆಸರು ಸಂಪಾದಿಸಿದ್ದ ನಟಿ ದಿ.ಶ್ರೀದೇವಿ ಹಾಗೂ ನಿರ್ಮಾಪಕ ಬೋನಿ ಕಪೂರ್ ದಂಪತಿಯ ಹಿರಿಪುತ್ರಿ ಜಾಹ್ನವಿ ಕಪೂರ್ ಅವರಿಗಿಂದು ಜನ್ಮದಿನದ ಸಂಭ್ರಮ. 27ನೇ ವಸಂತಕ್ಕೆ ಕಾಲಿಟ್ಟಿರುವ ಬಾಲಿವುಡ್ ಬೆಡಗಿಗೆ ಎಲ್ಲೆಡೆಯಿಂದ ಶುಭಾಶಯಗಳ ಸಂದೇಶಗಳು ಹರಿದುಬರುತ್ತಿವೆ. ಸಾಲು ಸಾಲು ಸಿನಿಮಾಗಳಲ್ಲಿ ಈ ಚೆಂದುಳ್ಳಿ ಚೆಲುವೆ ಬ್ಯುಸಿಯಾಗಿದ್ದು, ಇವರ ನಟನೆಯ ಬಹುನಿರೀಕ್ಷಿತ ಚಿತ್ರವೊಂದರ ಅಧಿಕೃತ ಮಾಹಿತಿ ಇದೀಗ ಬಹಿರಂಗಗೊಂಡಿದೆ.
'ಆರ್ಆರ್ಆರ್' ಸಿನಿಮಾದಲ್ಲಿ ಜೂನಿಯರ್ ಎನ್ಟಿಆರ್ ಮತ್ತು ರಾಮ್ಚರಣ್ ಅಮೋಘ ಅಭಿನಯ ವಿಶ್ವ ಮಟ್ಟದಲ್ಲಿ ಜನಪ್ರಿಯತೆ ಗಳಿಸಿದೆ. ಜೂನಿಯರ್ ಎನ್ಟಿಆರ್ ಜೊತೆ 'ದೇವರ' ಸಿನಿಮಾದಲ್ಲಿ ನಟಿಸುವ ಮೂಲಕ ಜಾಹ್ನವಿ ಕಪೂರ್ ತೆಲುಗು ಪ್ರೇಕ್ಷಕರನ್ನು ರಂಜಿಸಲು ಸಜ್ಜಾಗಿದ್ದಾರೆ. ಅಷ್ಟೇ ಅಲ್ಲ, ರಾಮ್ಚರಣ್ ಜೊತೆಗಿನ ಸಿನಿಮಾ ಕೂಡ ಅಫೀಶಿಯಲ್ ಆಗಿ ಅನೌನ್ಸ್ ಆಗಿದ್ದು, ಸಿನಿಪ್ರಿಯರು ಮತ್ತಷ್ಟು ಉತ್ಸುಕರಾಗಿದ್ದಾರೆ.
ತೆಲುಗು ಚಿತ್ರವೊಂದರಲ್ಲಿ ರಾಮ್ ಚರಣ್ ಜೊತೆ ಜಾಹ್ನವಿ ಕಪೂರ್ ಅಭಿನಯಿಸಲಿದ್ದಾರೆ ಎಂಬುದು ಈ ಹಿಂದೆ ಕೇವಲ ಊಹಾಪೋಹದ ವಿಷಯವಾಗಿತ್ತು. ಆದ್ರೀಗ ಚಿತ್ರತಂಡದಿಂದ ಅಧಿಕೃತ ಘೋಷಣೆ ಹೊರಬಿದ್ದಿದೆ. ಜಾಹ್ನವಿ ಜನ್ಮದಿನದ ಹಿನ್ನೆಲೆಯಲ್ಲಿ 'ಆರ್‌ಸಿ 16' ತಂಡ ನಾಯಕನಟಿಯನ್ನು ಚಿತ್ರಕ್ಕೆ ಬರಮಾಡಿಕೊಳ್ಳುವ ಪೋಸ್ಟ್ ಮೂಲಕ ಕಪೂರ್ಗೆ ಬರ್ತ್ಡೇ ಗಿಫ್ಟ್ ಕೊಟ್ಟಿದೆ.
ತಾತ್ಕಾಲಿಕ ಶೀರ್ಷಿಕೆ 'ಆರ್‌ಸಿ 16' ಹಿಂದಿರುವ ಮೈತ್ರಿ ಮೂವಿ ಮೇಕರ್ಸ್ ಮತ್ತು ವೃದ್ಧಿ ಸಿನಿಮಾಸ್ ಇಂದು ಸೋಷಿಯಲ್ ಮೀಡಿಯಾದಲ್ಲಿ ಜಾಹ್ನವಿ ಕಪೂರ್ಗೆ ವಿಶೇಷವಾಗಿ ಶುಭ ಕೋರಿದೆ. ಈ ಮೂಲಕ ರಾಮ್ ಚರಣ್ ಜೊತೆ ಜಾಹ್ನವಿ ನಟಿಸುವುದು ಪಕ್ಕಾ ಆಗಿದೆ. ಆರ್ಆರ್ಆರ್ ಮೂಲಕ ಜಾಗತಿಕ ಮಟ್ಟದಲ್ಲಿ ಹೆಸರುವ ಮಾಡಿರುವ ರಾಮ್ ಚರಣ್ ಅವರ ಮುಂದಿನ ಪ್ರಾಜೆಕ್ಟ್ಗಳ ಮೇಲೆ ಅಭಿಮಾನಿಗಳ ನಿರೀಕ್ಷೆ ಬೆಟ್ಟದಷ್ಟಿದೆ. ಇನ್ನು, ಸಮಂತಾ ರುತ್ ಪ್ರಭು ಅವರನ್ನು ಪ್ರಮುಖ ಪಾತ್ರವೊಂದಕ್ಕೆ ಸಂಪರ್ಕಿಸಲಾಗಿದೆ ಎಂಬ ಊಹಾಪೋಹಗಳೂ ಇವೆ. ಮುಂದಿನ ದಿನಗಳಲ್ಲಿ ಈ ಬಗ್ಗೆಯೂ ಅಧಿಕೃತ ಮಾಹಿತಿ ಹೊರಬೀಳಬಹುದು.
ಇದನ್ನೂ ಓದಿ: 'ಹಾಡೇ ಹಿಂಗೈತೆ, ಸಿನಿಮಾ ಹೆಂಗಿರಬಹುದು?': ಉಪ್ಪಿಯ 'UI' ಟ್ರೋಲ್ ಸಾಂಗ್ಗೆ ಹುಬ್ಬೇರಿಸಿದ ಫ್ಯಾನ್ಸ್
ಸೂಪರ್ ಹಿಟ್ 'ಉಪ್ಪೇನಾ' ಸಿನಿಮಾಗೆ ಹೆಸರುವಾಸಿಯಾಗಿರುವ ಬುಚ್ಚಿ ಬಾಬು ಸನಾ ನಿರ್ದೇಶನದ ಆರ್‌ಸಿ 16 ಸಿನಿಮಾವನ್ನು ಮೈತ್ರಿ ಮೂವೀ ಮೇಕರ್ಸ್ ಪ್ರಸ್ತುತಪಡಿಸುತ್ತಿದೆ. ವೆಂಕಟ ಸತೀಶ್ ಕಿಲಾರು ನಿರ್ಮಾಣದ ಚೊಚ್ಚಲ ಚಿತ್ರವಿದು. ವೃದ್ಧಿ ಸಿನಿಮಾಸ್ ಮತ್ತು ಸುಕುಮಾರ್ ರೈಟಿಂಗ್ಸ್ ಕೂಡ ಈ ಚಿತ್ರದ ಹಿಂದಿರುವ ಪ್ರೊಡಕ್ಷನ್ ಬ್ಯಾನರ್ಗಳು. ಎ.ಆರ್.ರೆಹಮಾನ್ ಸಂಗೀತವಿರಲಿದೆ.
ಇದನ್ನೂ ಓದಿ: ಹೃತಿಕ್ ರೋಷನ್ ನಟನೆಯ 'ವಾರ್ 2'ನಲ್ಲಿ ಜೂ. ಎನ್ಟಿಆರ್ ಪಾತ್ರವೇನು?
ಜೂನಿಯರ್ ಎನ್ಟಿಆರ್ ಅಭಿನಯದ 'ದೇವರ' ಚಿತ್ರದಲ್ಲೂ ಜಾಹ್ನವಿ ನಾಯಕಿ ಪಾತ್ರ ನಿರ್ವಹಿಸುತ್ತಿದ್ದಾರೆ. 'ಆರ್‌ಸಿ 16' ತೆಲುಗಿನ ಎರಡನೇ ಚಿತ್ರ. ಕೊರಟಾಲ ಶಿವ ನಿರ್ದೇಶನದ ದೇವರ ಭಾಗ 1 ಅಕ್ಟೋಬರ್ 10ರಂದು ಬಿಡುಗಡೆಯಾಗಲಿದೆ. ಜಾಹ್ನವಿ ನಟನೆಯ 'ಉಲಜ್ಹ್' ಮತ್ತು 'ಮಿಸ್ಟರ್ ಆ್ಯಂಡ್ ಮಿಸಸ್ ಮಾಹಿ' ಚಿತ್ರಗಳ ಶೂಟಿಂಗ್‌ ಪೂರ್ಣಗೊಂಡಿದೆ.
