ರಕ್ಷಿತ್ ಶೆಟ್ಟಿ ಹಾಗೂ '777 ಚಾರ್ಲಿ' ಸಿನಿಮಾ ಬಗ್ಗೆ ವಿಶೇಷ ಪರಿಚಯ ಬೇಕೆನಿಸದು. ಕನ್ನಡದ ಅತ್ಯಂತ ಜನಪ್ರಿಯ, ಬೇಡಿಕೆಯ ನಟ ರಕ್ಷಿತ್ ಶೆಟ್ಟಿ ಮನರಂಜನಾ ಕ್ಷೇತ್ರಕ್ಕೆ ಕೊಟ್ಟ ಅದ್ಭುತ ಸಿನಿಮಾ ಇದಾಗಿದೆ. ಈವರೆಗೆ ಹಲವು ಸೂಪರ್ ಹಿಟ್ ಸಿನಿಮಾ ಕೊಟ್ಟರೂ '777 ಚಾರ್ಲಿ'ಗೆ ಭಾರತೀಯ ಚಿತ್ರರಂಗದಲ್ಲೇ ವಿಶೇಷ ಸ್ಥಾನಮಾನವಿದೆ.
ಈ ಯಶಸ್ವಿ ಚಿತ್ರದ ಮೂಲಕ ಜನಪ್ರಿಯವಾಗಿರುವ ಶ್ವಾನ ಚಾರ್ಲಿ ಇದೀಗ 6 ಮುದ್ದು ಮರಿಗಳಿಗೆ ಜನ್ಮ ನೀಡಿದೆ. ರಕ್ಷಿತ್ ಶೆಟ್ಟಿ ತಮ್ಮ ಅಧಿಕೃತ ಇನ್ಸ್ಟಾಗ್ರಾಮ್ನಲ್ಲಿ ಚಾರ್ಲಿ ಮತ್ತು ಮರಿಗಳ ವಿಡಿಯೋ ಹಂಚಿಕೊಂಡಿದ್ದಾರೆ.
ರಕ್ಷಿತ್ ಶೆಟ್ಟಿ ಶೇರ್ ಮಾಡಿರುವ ವಿಡಿಯೋ: ''ಇದು ಸರ್ಪ್ರೈಸ್ ಲೈವ್. ಒಂದು ಸೂಕ್ತ ಕಾರಣ ಇದೆ. ಪ್ಲ್ಯಾನ್ಡ್ ಲೈವ್ ಅಲ್ಲ. 777 ಚಾರ್ಲಿ ತೆರೆಕಂಡು ಎರಡು ವರ್ಷ ಆಗ್ತಾ ಬಂತು. ಈವರೆಗೆ ಚಾರ್ಲಿ ತಾಯಿಯಾದರೆ, ಆಕೆಯ ಪಯಣ ಪರಿಪೂರ್ಣಗುತ್ತದೆ ಎಂದು ಅನಿಸುತ್ತಿತ್ತು. ಇಡೀ ಚಿತ್ರತಂಡಕ್ಕೆ ಈ ಭಾವನೆ ಇತ್ತು. ಈ ಬಗ್ಗೆ ಕಿರಣ್ ರಾಜ್ ಮೊದಲು ಹೇಳಿದ್ದರು. ನಂತರ ನಾನು ಸೇರಿದಂತೆ ಚಿತ್ರತಂಡ, ಚಾರ್ಲಿ ಮರಿಗಳಿಗೆ ಜನ್ಮಕೊಡಬೇಕು. ಆಕೆ ತಾಯಿಯಾಗಬೇಕು ಎಂದುಕೊಳ್ಳುತ್ತಿದ್ದೆವು. ಪ್ರಮೋದ್ಗೆ ಕರೆ ಮಾಡಿ ಚಾರ್ಲಿ ಸ್ಥಿತಿ ಬಗ್ಗೆ ವಿಚಾರಿಸುತ್ತಿದ್ದೆ. ಚಾರ್ಲಿಗೆ ವಯಸ್ಸಾದ ಕಾರಣ ಇನ್ನು ಮರಿಗಳಾಗುವ ಸಾಧ್ಯತೆ ಕಡಿಮೆ ಎಂದು ತಿಳಿಸುತ್ತಿದ್ದರು. ಆದರೆ ಸರ್ಪೈಸಿಂಗ್ಲಿ ಮೇ 9ರಂದು ಚಾರ್ಲಿ 6 ಮುದ್ದು ಮರಿಗಳಿಗೆ ಜನ್ಮ ನೀಡಿದ್ದಾಳೆ. ಹಾಗಾಗಿ ಚಾರ್ಲಿ ಮತ್ತು ಮರಿಗಳನ್ನು ನೋಡಲು ಮೈಸೂರಿಗೆ ಬಂದಿದ್ದೇನೆ'' ಎಂದು ತಿಳಿಸಿದ ನಟ, ಚಾರ್ಲಿ ಮತ್ತು ಮರಿಗಳನ್ನು ತೋರಿಸಿದ್ದಾರೆ.
ಈ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ. ಕ್ಯೂಟ್ ಎಂದೆಲ್ಲಾ ಕಾಮೆಂಟ್ಗಳು ಹರಿದುಬರುತ್ತಿದೆ. ಸಿನಿಪ್ರಿಯರು ರಕ್ಷಿತ್ ಶೆಟ್ಟಿ ಅವರ ಮುಂದಿನ ಚಿತ್ರಗಳ ಅಪ್ಡೇಟ್ಸ್ ಕೇಳುತ್ತಿದ್ದಾರೆ. 2 ವರ್ಷಕ್ಕೆ ಒಂದು ಮೂವಿ ಕೊಟ್ರೆ ಕನ್ನಡ ಇಂಡಸ್ಟ್ರಿ ಕಥೆ ಏನು ಎಂದು ನೆಟ್ಟಿಗರೋರ್ವರು ಪ್ರಶ್ನಿಸಿದ್ದಾರೆ. ಜೊತೆಗೆ, ಹೆಚ್ಚೆಚ್ಚು ಸಿನಿಮಾ ಮಾಡುವಂತೆಯೂ ಕೇಳಿಕೊಂಡಿದ್ದಾರೆ.
ಇದನ್ನೂ ಓದಿ: ಕೇನ್ಸ್ ಫೆಸ್ಟಿವಲ್ಗೆ ತೆರಳಿದ ಕಿಯಾರಾ: ಏರ್ಪೋರ್ಟ್ನಲ್ಲೇ ಅದ್ಭುತ ನೋಟ, ವಿಡಿಯೋ - Kiara Advani
2022ರ ಜೂನ್ 10ರಂದು'777 ಚಾರ್ಲಿ' ತೆರೆಕಂಡು, ನಿರೀಕ್ಷೆಗೂ ಮೀರಿ ಅಭೂತಪೂರ್ವ ಯಶಸ್ಸು ಕಂಡಿತ್ತು. ಕಥಾಹಂದರ, ಶೈಲಿಗೆ ಮೆಚ್ಚುಗೆ ವ್ಯಕ್ತವಾಯಿತು. ಸಿನಿಮಾ ವಿಮರ್ಷಕರು, ಪ್ರೇಕ್ಷಕರಿಂದ ಅಪಾರ ಮೆಚ್ಚುಗೆ ಗಳಿಸಿತು. ಚಿತ್ರದಲ್ಲಿ ಶ್ವಾನ 'ಚಾರ್ಲಿ' ಎಂಬ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿತ್ತು. ಮುಖ್ಯಭೂಮಿಕೆಯಲ್ಲಿ ರಕ್ಷಿತ್ ಶೆಟ್ಟಿ, ಜೊತೆಗೆ ಸಂಗೀತಾ ಶೃಂಗೇರಿ, ರಾಜ್ ಬಿ ಶೆಟ್ಟಿ, ಡ್ಯಾನಿಶ್ ಸೇಟ್ ಸೇರಿ ಹಲವರು ನಟಿಸಿದ್ದರು.
ಇದನ್ನೂ ಓದಿ: ಐಶ್ವರ್ಯಾ ರೈ ಕೈಗೆ ಗಾಯ: ಮಗಳೊಂದಿಗೆ ಏರ್ಪೋರ್ಟ್ನಲ್ಲಿ ಕಾಣಿಸಿಕೊಂಡ ಚೆಲುವೆ - Aishwarya Rai Injured
