ಹೈದರಾಬಾದ್: ಹತ ಪಂಜಾಬಿ ಗಾಯಕ ಸಿಧು ಮೂಸೆವಾಲಗೆ ಇತ್ತೀಚಿಗೆ ಸಹೋದರ ಜನಿಸಿರುವ ಸುದ್ದಿ ಭಾರಿ ಸದ್ದು ಮಾಡಿದೆ. ಒಬ್ಬನೇ ಮಗನನ್ನು ಕಳೆದುಕೊಂಡಿದ್ದ ಪೋಷಕರಾದ ಬಲ್ಕೌರ್ ಸಿಂಗ್ ಮತ್ತು ಚರಣ್ ಸಿಂಗ್ ಇತ್ತೀಚಿಗೆ ತಮ್ಮ ಇಳಿ ವಯಸ್ಸಿನಲ್ಲಿ ಐವಿಎಫ್ ಚಿಕಿತ್ಸೆ ಮೂಲಕ ಎರಡನೇ ಗಂಡು ಮಗವನ್ನು ಸ್ವಾಗತಿಸಿದ್ದರು. ವಿಶೇಷ ಎಂದರೆ, ತಮ್ಮ ಎರಡನೇ ಮಗುವಿಗೂ ಸಿಧು ಮೂಸೆವಾಲನ ಮೂಲ ಹೆಸರಾದ ಶುಭ್ದೀಪ್ ಸಿಂಗ್ ಸಿಧು ಎಂದೇ ಹೆಸರಿಟ್ಟಿದ್ದಾರೆ.
ಇದೀಗ ಬಲ್ಕೌರ್ ಸಿಂಗ್ ತಮ್ಮ ಎರಡನೇ ಮಗು ಜೊತೆಗಿನ ಫೋಟೋ ಹೊಂದಿರುವ ವಿಡಿಯೋ ನ್ಯೂಯಾರ್ಕ್ನ ಟೈಮ್ಸ್ ಸ್ಕ್ವೇರ್ನಲ್ಲಿ ಪ್ರದರ್ಶಿಸಲಾಗಿದೆ. ಈ ವಿಡಿಯೋ ಇದೀಗ ಇಂಟರ್ನೆಟ್ನಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗಿದೆ.
ಟೈಮ್ಸ್ಸ್ಕ್ವೇರ್ನಲ್ಲಿ ಪ್ರದರ್ಶಿತವಾದ ವಿಡಿಯೋದಲ್ಲಿ ಬಲ್ಕೌರ್ ಶುಭದೀಪ್ ಹಿಡಿದುಕೊಂಡಿರುವ ಫೋಟೋ ಹಾಗೂ ಸಿಧುವಿನ ಬಾಲ್ಯದ ಫೋಟೋದ ಜೊತೆಗೆ ಶುಭುದೀಪ್ ಫೋಟೋವನ್ನು ಕಾಣಬಹುದಾಗಿದೆ. ಈ ಟೈಮ್ಸ್ಕ್ವೇರ್ನ ವಿಡಿಯೋ ಹಂಚಿಕೊಂಡಿರುವ ಲುದಿಯಾನ ಲೈವ್ ಎಂಬ ಇನ್ಸ್ಟಾಗ್ರಾಂನಲ್ಲಿ , ಸಿಧು ಮೂಸೆವಾಲಗೆ ಇದೊಂದು ದೊಡ್ಡ ಘಟನೆಯಾಗಿದೆ. ಅವರ ತಂದೆ ನವಜಾತ ಶಿಶುವನ್ನು ಹಿಡಿದಿರುವ ಫೋಟೋ ನ್ಯೂಯಾರ್ಕ್ ಟೈಮ್ಸ್ಕ್ವೇರ್ನಲ್ಲಿ ಹೊಳೆಯುತ್ತಿದೆ ಎಂದು ಅಡಿಬರಹ ಬರೆದಿದ್ದಾರೆ.
ಸಿಧು ಮೂಸೆವಾಲ ಸಾವನ್ನಪ್ಪಿದ ಎರಡು ವರ್ಷದ ಬಳಿಕ ಬಲ್ಕೌರ್ ಮತ್ತು ಚರಣ್ ಎರಡನೇ ಮಗುವಿನ ಪೋಷಕರಾಗಿದ್ದಾರೆ. ಲೆಜೆಂಡ್ಗಳಿಗೆ ಎಂದಿಗೂ ಸಾವಿಲ್ಲ ಎಂಬ ಬರಹದೊಂದಿಗೆ ಎರಡನೇ ಮಗುವಿನ ಚಿತ್ರಣವನ್ನು ಬಲ್ಕೌರ್ ಹಂಚಿಕೊಂಡಿದ್ದರು. ಜೊತೆಗೆ ಆಸ್ಪತ್ರೆಯ ಸಿಬ್ಬಂದಿ ಮಗುವಿನ ಜನನ ಸಂದರ್ಭದಲ್ಲಿ ತೋರಿದ ಕಾಳಜಿ ಕುರಿತು ಅವರಿಗೆ ಕೃತಜ್ಞತೆಯನ್ನು ಸಲ್ಲಿಸುವ ಫೋಟೋವನ್ನು ಕೂಡ ಅಪ್ಲೋಡ್ ಮಾಡಿದ್ದರು. ಮಗುವಿನ ಈ ಆಗಮನದ ಖುಷಿಯನ್ನು ಕೇಕ್ ಕತ್ತರಿಸುವ ಮೂಲಕ ಹಂಚಿಕೊಂಡಿದ್ದರು.
58ನೇ ವಯಸ್ಸಿನಲ್ಲಿ ಐವಿಎಫ್ ಚಿಕಿತ್ಸೆ ಮೂಲಕ ಮಗು ಪಡೆದ ಕುರಿತು ವಿವರಣೆ ನೀಡುವಂತೆ ಕುಟುಂಬಕ್ಕೆ ಪ್ರಶ್ನಿಸಿ ಪಂಜಾಬ್ ಸರ್ಕಾರ ನೋಟಿಸ್ ಜಾರಿ ಮಾಡಿತು. ಈ ನೋಟಿಸ್ ಕುರಿತು ಪ್ರತಿಕ್ರಿಯಿಸಿದ ಬಲ್ಕೌರ್ ಸಿಂಗ್, ಮಗುವಿನ ಕುರಿತು ಅಗತ್ಯವಾದ ಎಲ್ಲ ನ್ಯಾಯಯುತ ದಾಖಲೆಗಳನ್ನು ಸರ್ಕಾರಕ್ಕೆ ಸಲ್ಲಿಸಲು ಸಿದ್ಧ ಎಂದು ತಿಳಿಸಿದ್ದರು.
ಸಿಧು ಮೂಸೆವಾಲ 2022ರ ಚುನಾವಣೆಯಲ್ಲಿ ಕಾಂಗ್ರೆಸ್ನಿಂದ ಸ್ಪರ್ಧಿಸಿ ಸೋಲು ಕಂಡಿದ್ದರು. ಅದೇ ವರ್ಷ ಮೇ 29ರಂದು ಮಾನ್ಸಾದ ಜವಾಹರ್ಕೆ ಗ್ರಾಮದಲ್ಲಿ ದುಷ್ಕರ್ಮಿಗಳ ಗುಂಡೇಟಿನಿಂದ ಗಂಭೀರವಾಗಿ ಗಾಯಗೊಂಡು ಸಾವನ್ನಪ್ಪಿದ್ದರು.
ಇದನ್ನೂ ಓದಿ: 58ನೇ ವಯಸ್ಸಿಗೆ ಐವಿಎಫ್ ಚಿಕಿತ್ಸೆ ಪಡೆದ ಸಿಧು ಮೂಸೆವಾಲ ತಾಯಿ; ಪಂಜಾಬ್ ಸರ್ಕಾರಕ್ಕೆ ಕೇಂದ್ರದಿಂದ ನೋಟಿಸ್
