ವಡೋದರಾ: ನಮ್ಮ ದೇಶದಲ್ಲಿ ಅತ್ಯಂತ ದುಬಾರಿ ಮತ್ತು ಐಷಾರಾಮಿ ಮನೆ ಇದೆ ಅಂತಾದರೆ ಅದು ಮುಖೇಶ್ ಅಂಬಾನಿಯ ಆಂಟೆಲಿಯಾ. ಆದರೆ ಇದಕ್ಕಿಂತಲೂ ಎಷ್ಟೋ ಪಟ್ಟು ದೊಡ್ಡದಾದ ಖಾಸಗಿ ನಿವಾಸವೊಂದು ಇದೆ. ಅದರ ಬಗ್ಗೆ ನಿಮಗೆನಾದರೂ ತಿಳಿದಿದೆಯೇ?. ತಿಳಿದಿಲ್ಲ ಅಂದರೆ ನಾವು ಹೇಳುತ್ತೇವೆ ಕೇಳಿ. ಅದರ ಹೆಸರು ಲಕ್ಷ್ಮಿ ವಿಲಾಸ ಅರಮನೆ.
ನೂರಾರು ಎಕರೆ ಪ್ರದೇಶದಲ್ಲಿ ಹರಡಿರುವ ವಿಶ್ವದ ಅತ್ಯಂತ ಐಷಾರಾಮಿ ಕಟ್ಟಡವಿದು. ಈ ಅರಮನೆಯು ಬ್ರಿಟಿಷ್ ರಾಜಮನೆತನದ ನಿವಾಸವಾದ ಬಕಿಂಗ್ಹ್ಯಾಮ್ ಅರಮನೆಗಿಂತ ನಾಲ್ಕು ಪಟ್ಟು ದೊಡ್ಡದು ಅಂದರೆ ನಾವು - ನೀವೆಲ್ಲ ನಂಬಲೇಬೇಕು. ಲಕ್ಷ್ಮಿ ವಿಲಾಸ ಅರಮನೆಯನ್ನು ನೋಡಲು ಎರಡು ಕಣ್ಣುಗಳು ಸಾಲದು, ನೀವು ಎಂತಹ ದೊಡ್ಡದಾದ ನಿಲುಕದ ಕನಸು ಕಾಣ್ತಿರೋ ಅದಕ್ಕಿಂತ ಮಿಗಿಲು ಈ ಅರಮನೆ. ಈ ಅರಮನೆಯು ಯಾವ ರಾಜ್ಯದಲ್ಲಿದೆ? ಅದರ ವೈಶಿಷ್ಟ್ಯಗಳೇನು? ಎಂಬುದನ್ನು ನೋಡುವುದಾರೆ,
ಲಕ್ಷ್ಮಿ ವಿಲಾಸ ಅರಮನೆ, ನಮ್ಮ ದೇಶದ ಅತ್ಯಂತ ಐಷಾರಾಮಿ ಮತ್ತು ಬೆಲೆಬಾಳುವ ಅರಮನೆ ಆಗಿದೆ. ಅಂದ ಹಾಗೆ ವೈಭೋಗದ ಪ್ಯಾಲೇಸ್ ಇರುವುದು ಗುಜರಾತ್‌ನ ವಡೋದರಾ ನಗರದಲ್ಲಿ. ಈ ಅರಮನೆಯನ್ನು 1890 ರಲ್ಲಿ ಮರಾಠ ಗಾಯಕ್ವಾಡ್ ವಂಶಸ್ಥರು ನಿರ್ಮಿಸಿದ್ದಾರೆ. ಮೇಜರ್ ಚಾರ್ಲ್ಸ್ ಮಾಂಟ್ ಎಂಬುವವರು ಅರಮನೆಯ ನಿರ್ಮಾಣಕ್ಕೆ ಮುಖ್ಯ ವಾಸ್ತುಶಿಲ್ಪಿಯಾಗಿ ಕೆಲಸ ಮಾಡಿದರು. ಈ ಭವ್ಯವಾದ ಅರಮನೆಯನ್ನು ಇಂಡೋ-ಸಾರ್ಸೆನಿಕ್ ಶೈಲಿಯಲ್ಲಿ ನಿರ್ಮಾಣ ಮಾಡಲಾಗಿದೆ. ಸುಮಾರು 500 ಎಕರೆ ಪ್ರದೇಶದಲ್ಲಿ ಹರಡಿರುವ ಈ ಅರಮನೆಯು ಬೆರಗುಗೊಳಿಸುವ ಸಭಾಂಗಣಗಳು, ಉದ್ಯಾನಗಳು ಮತ್ತು ಕಾರಂಜಿಗಳನ್ನು ಹೊಂದಿದೆ. ಅಲ್ಲದೇ ಈ ಅರಮನೆಯು 176 ಐಷಾರಾಮಿ ಕೊಠಡಿಗಳನ್ನು ಹೊಂದಿದೆ ಎಂಬುದು ಈ ಅರಮನೆಯ ಭವ್ಯತೆಗೆ ಸಾಕ್ಷಿ. ಆ ಅವಧಿಯಲ್ಲಿಯೇ ಸಯಾಜಿರಾವ್ ಗಾಯಕವಾಡ್-III ಲಕ್ಷ್ಮೀ ವಿಲಾಸವನ್ನು ನಿರ್ಮಿಸಲು ಸುಮಾರು 27 ಲಕ್ಷ ರೂಪಾಯಿಗಳನ್ನು ಖರ್ಚು ಮಾಡಿದ್ದರು. ಆಗ ಇದು ಅತ್ಯಂತ ದೊಡ್ಡ ಮೊತ್ತವಾಗಿತ್ತು ಎಂಬುದು ನಿಮ್ಮೆಲ್ಲರಿಗೂ ತಿಳಿದಿರಲಿ.
ಕಣ್ಣುಗಳೇ ನಿಮ್ಮನ್ನು ನಂಬದಂತೆ ಮಾಡುತ್ತವೆ. ಲಕ್ಷ್ಮಿ ವಿಲಾಸ ಅರಮನೆಯಲ್ಲಿರುವ ದರ್ಬಾರ್ ಹಾಲ್‌ನ ವಿಸ್ತೀರ್ಣವೇ 5000 ಚದರ ಅಡಿ ಇದೆ. ಇಲ್ಲಿ ಫಂಕ್ಷನ್ ಹಾಲ್‌ಗಳು, ಮೋತಿ ಭಾಗ್ ಅರಮನೆ, ಮಹಾರಾಜ ಫತೇ ಸಿಂಗ್ ಮ್ಯೂಸಿಯಂನಂತಹ ಇತರ ಕಟ್ಟಡಗಳನ್ನು ಹೊಂದಿದ್ದು ನೋಡುಗರನ್ನು ಇನ್ನಿಲ್ಲದಂತೆ ಆಕರ್ಷಿಸುತ್ತದೆ. ಆ ಸಮಯದಲ್ಲಿ ಈ ಅರಮನೆಯು ವಿಶ್ವದ ಅತಿದೊಡ್ಡ ಖಾಸಗಿ ವಸತಿ ಕಟ್ಟಡವೆಂದು ಖ್ಯಾತಿ ಪಡೆದಿತ್ತು. ಕಟ್ಟಡ ನಿರ್ಮಾಣವಾದಾಗ ಎಲ್ಲ ಸೌಲಭ್ಯಗಳನ್ನು ಒದಗಿಸಲು ಲಿಫ್ಟ್‌ಗಳನ್ನು ಅಳವಡಿಸಲಾಗಿತ್ತು. ಕಟ್ಟಡದ ಒಳಗೆ ಯುರೋಪಿಯನ್ ಶೈಲಿಯಲ್ಲಿ ಅನೇಕ ರೀತಿಯ ಅಲಂಕಾರಗಳನ್ನು ಮಾಡಲಾಗಿದೆ. 1930 ರಲ್ಲಿ, ಆಗಿನ ಮಹಾರಾಜ ಪ್ರತಾಪ್ ಸಿಂಗ್ ಯುರೋಪಿಯನ್ ಅತಿಥಿಗಳಿಗಾಗಿ ಲಕ್ಷ್ಮಿ ವಿಲಾಸ್ ಅರಮನೆಯ ಎದುರು ಗಾಲ್ಫ್ ಕೋರ್ಸ್ ಕೂಡಾ ನಿರ್ಮಾಣ ಮಾಡಿದ್ದರು.
ಕಿಟಕಿಗಳೇ ಇದರ ಜೀವಾಳ: ಈ ಅರಮನೆಯಲ್ಲಿರುವ ಮಹಾರಾಜ ಫತೇ ಸಿಂಗ್ ವಸ್ತುಸಂಗ್ರಹಾಲಯವು ರಾಜಾ ರವಿವರ್ಮನ ಅನೇಕ ಅಪರೂಪದ ವರ್ಣಚಿತ್ರಗಳನ್ನು ಹೊಂದಿದೆ. ಅಲ್ಲದೇ ಈ ಅರಮನೆಯು ಪ್ರಪಂಚದ ಯಾವುದೇ ಅರಮನೆಗಿಂತ ಹೆಚ್ಚು ಬಣ್ಣದ ಗಾಜಿನ ಕಿಟಕಿಗಳನ್ನು ಹೊಂದಿದೆ. ಇವುಗಳಲ್ಲಿ ಹೆಚ್ಚಿನ ಗಾಜಿನ ಕಿಟಕಿಗಳನ್ನು ಬೆಲ್ಜಿಯಂನಿಂದ ತರಲಾಗಿದೆ. ಪ್ರಸ್ತುತ, ಈ ಲಕ್ಷ್ಮಿ ವಿಲಾಸ್ ಅರಮನೆಯನ್ನು ಬರೋಡಾದ ಗಾಯಕ್ವಾಡ್ ರಾಜಮನೆತನದ ವಂಶಸ್ಥರಾದ HRH ಸಮರ್ಜಿತ್ ಗಾಯಕ್ವಾಡ್ ಮತ್ತು ರಾಧಿಕರಾಜೆ ನಿರ್ವಹಿಸುತ್ತಿದ್ದಾರೆ. ಈ ರಾಜ ಪ್ರಸಾದವನ್ನು ನಿರ್ಮಿಸಲು ಸುಮಾರು ಹನ್ನೆರಡು ವರ್ಷಗಳು ಬೇಕಾಯಿತು. ಪ್ರಸ್ತುತ ಈ ಸುಂದರ ಅರಮನೆಯ ಮೌಲ್ಯ ಸುಮಾರು 24,000 ಕೋಟಿ ರೂ. ಎಂದು ಅಂದಾಜಿಸಲಾಗಿದೆ.
ಇದನ್ನು ಓದಿ: ಮೊದಲ ಬಾರಿಗೆ ಮೊಬೈಲ್ ನೆಟ್ವರ್ಕ್ಗೆ ಸಿಕ್ಕ ಹಿಮಾಚಲದ ಹಳ್ಳಿ; ಗ್ರಾಮಸ್ಥರಿಗೆ ಪ್ರಧಾನಿ ಮೋದಿ ಕರೆ! - Lahaul Spiti
