ಮುದ್ದೇಬಿಹಾಳ (ವಿಜಯಪುರ): ಒಂದು ವರ್ಷ ಹನ್ನೊಂದು ತಿಂಗಳ ಮಗುವೊಂದು ತನ್ನಲ್ಲಿರುವ ಅಸಾಮಾನ್ಯ ಬುದ್ಧಿಶಕ್ತಿಯಿಂದ ಇಂಡಿಯಾ ಬುಕ್ ಆಫ್ ರೆಕಾರ್ಡ್ ಸೇರಿದೆ. ಈ ಮೂಲಕ ವಿಜಯಪುರ ಜಿಲ್ಲೆಯ ಕೀರ್ತಿಯನ್ನು ಆ ಮಗು ಹೆಚ್ಚಿಸಿದೆ. ಮೂಲತಃ ನಿಡಗುಂದಿ ತಾಲೂಕಿನ ಇಟಗಿ ಗ್ರಾಮದವರಾದ ಚಂದ್ರು ಹಾಗೂ ಶಿಲ್ಪಾ ಗಣಾಚಾರಿ ದಂಪತಿಯ ಪುತ್ರ ಗಗನದೀಪ್ ಗಣಾಚಾರಿ ಈ ಸಾಧನೆ ಮಾಡಿದ್ದಾರೆ.
ತಂದೆ ಮುದ್ದೇಬಿಹಾಳ ಪಟ್ಟಣದ ಅಹಲ್ಯಾದೇವಿ ಹೋಳ್ಕರ ಪತ್ತಿನ ಸಹಕಾರಿ ಸಂಘದಲ್ಲಿ ಅಕೌಂಟೆಂಟ್ ಆಗಿ ಕೆಲಸ ಮಾಡುತ್ತಿದ್ದಾರೆ. ಗಗನ್‍ದೀಪ್‍ಗೆ ಹಲವು ಕಲೆಗಳು ಕರಗತವಾಗಿವೆ. ಆತನ ಜ್ಞಾನಶಕ್ತಿಯನ್ನು ಕಂಡು ಸ್ವತಃ ತಾಯಿಯೇ ಬೆರಗಾಗಿದ್ದು, ಅದನ್ನು ವಿಡಿಯೋ ಮಾಡಿ ಇಂಡಿಯಾ ಬುಕ್ ಆಫ್ ರೆಕಾರ್ಡ್ ಸಂಸ್ಥೆಗೆ ಕಳಿಸಿದ್ದರು. ಅಲ್ಲಿಂದ ಬಾಲಕನ ಅಸಾಮಾನ್ಯ ಕಲೆಗೆ ಇಂಡಿಯಾ ಬುಕ್ ಆಫ್ ರೆಕಾರ್ಡ್ ಸಂಸ್ಥೆಯ ಡಾ.ಬಿಷಪ್‍ರಾಯ್ ಚೌಧರಿ ಪ್ರಶಂಸನಾಪತ್ರ ಕಳುಹಿಸಿದ್ದಾರೆ.
ಗಗನ್‍ದೀಪ ಮಾಡುವುದೇನು: ಆಂಗ್ಲಭಾಷೆಯ ವರ್ಣಮಾಲೆ ಹೇಳುವುದು, ದೇಹದ 22 ಅಂಗಗಳನ್ನು ಗುರುತಿಸುವುದು, ಒಂಬತ್ತು ಬಗೆಯ ಒಳಾಂಗಣ,10 ಬಗೆಯ ಹೊರಾಂಗಣ ಕ್ರೀಡೆಗಳನ್ನು ಗುರುತಿಸುವುದು, ಐದು ಆಕಾರಗಳನ್ನು ಗುರುತಿಸುವಿಕೆ, 10 ಉದ್ಯೋಗಗಳನ್ನು ಗುರುತಿಸುವಿಕೆ, ಐದು ಆರ್ಗನ್ಸ್, 35 ಸಾಮಾನ್ಯ ಸಂಗತಿಗಳು, 35 ಪ್ರಾಣಿಗಳು, ಐದು ಪಕ್ಷಿಗಳು, ಏಳು ಕೀಟಗಳು, 11 ವಿವಿಧ ಬಗೆಯ ವಾಹನಗಳು, ಎಂಟು ಹಣ್ಣುಗಳು, ಆರು ವಿವಿಧ ತರಕಾರಿಗಳು,13 ಆಹಾರದ ಹೆಸರುಗಳು, ಸಸಿಯ ನಾಲ್ಕು ಭಾಗಗಳು,11 ವಿವಿಧ ಪ್ರಾಣಿಗಳ ಶಬ್ದಗಳನ್ನು ಗುರುತಿಸುವುದಲ್ಲದೇ ಅವುಗಳ ಹೆಸರು ಹೇಳುತ್ತಾನೆ.
ಇದನ್ನೂ ಓದಿ: ವಿಜಯಪುರ: ಅದ್ಧೂರಿಯಾಗಿ ನೆರವೇರಿದ ಗೊಲ್ಲಾಳೇಶ್ವರ ಮಹಾರಥೋತ್ಸವ
