ದುಬೈ: ಭಾರತದ ಸ್ಟಾರ್ ಟೆನ್ನಿಸ್ ಆಟಗಾರ್ತಿ ಸಾನಿಯಾ ಮಿರ್ಜಾ ದುಬೈ ಓಪನ್ನ ಮಹಿಳೆಯರ ಡಬಲ್ಸ್ ವಿಭಾಗದ ಎರಡನೇ ಸುತ್ತಿನ ಪಂದ್ಯದಲ್ಲಿ ಸೋತು ಹೊರಬಿದ್ದಿದ್ದಾರೆ.
ಫ್ರಾನ್ಸ್ನ ಕ್ಯಾರೋಲಿನ್ ಗ್ರಾಸಿಯಾ ಜೊತೆಗೂಡಿ ದುಬೈ ಓಪನ್ನಲ್ಲಿ ಕಣಕ್ಕಿಳಿದಿದ್ದ ಸಾನಿಯಾ ಮಿರ್ಜಾ 6-2, 6-4 ನೇರ ಸೆಟ್ಗಳ ಅಂತರದಲ್ಲಿ 5ನೇ ಶ್ರೇಯಾಂಕದ ಚೀನ್-ಜೆಕ್ ಜೋಡಿಯಾದ ಸೈಸೈ ಝೆಂಗ್-ಬಾರ್ಬೊರಾ ಕ್ರೆಸಿಕೋವಾ ವಿರುದ್ಧ ಸೋಲು ಕಂಡರು.
ಇದಕ್ಕೂ ಮುನ್ನ ಮಂಗಳವಾರ ನಡೆದಿದ್ದ ಮೊದಲ ಸುತ್ತಿನ ಪಂದ್ಯದಲ್ಲಿ ಸಾನಿಯಾ - ಗ್ರಾಸಿಯಾ ಮೊದಲ ಸುತ್ತಿನ ಪಂದ್ಯದಲ್ಲಿ 6-4, 4-6, 10-8 ರಷ್ಯಾದ ಅಲ್ಲಾ ಕುದ್ರಿಯವತ್ಸೇವ ಹಾಗೂ ಸ್ಲೊವೇನಿಯಾದ ಕ್ಯಾತರಿನಾ ಸ್ರೆಬೋತ್ನಿಕ್ ವಿರುದ್ಧ ಗೆಲುವು ಸಾಧಿಸಿದ್ದರು.
ತಾಯಿಯಾದ 2 ವರ್ಷಗಳ ನಂತರ ಟೆನಿಸ್ ಜಗತ್ತಿಗೆ ಮರಳಿದ್ದ ಸಾನಿಯಾ ಮಿರ್ಜಾ ಅವರು ಹೋಬರ್ಟ್ ಇಂಟರ್ನ್ಯಾಷನಲ್ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡಿದ್ದರು. ನಂತರ ಜನವರಿಯಲ್ಲಿ ನಡೆದಿದ್ದ ಆಸ್ಟ್ರೇಲಿಯನ್ ಓಪನ್ ಮೊದಲ ಸುತ್ತಿನ ಪಂದ್ಯದಲ್ಲೇ ಕಣಕಾಲು ನೋವಿಗೆ ತುತ್ತಾಗಿ ಪಂದ್ಯದಿಂದ ಅರ್ಧದಲ್ಲೇ ನಿವೃತ್ತಿ ಪಡೆದಿದ್ದರು. ಇದೀಗ ಗಾಯದಿಂದ ಸಂಪೂರ್ಣ ಚೇತರಿಸಿಕೊಂಡು ದುಬೈ ಓಪನ್ನಲ್ಲಿ ಕಣಕ್ಕಿಳಿದರೂ ಉತ್ತಮ ಪ್ರದರ್ಶನ ತೋರುವಲ್ಲಿ ವಿಫಲರಾಗಿದ್ದಾರೆ.
