ದೋಹಾ: ಕ್ರೊಯೇಷಿಯಾವನ್ನು ಮಣಿಸಿ ಫೈನಲ್ ತಲುಪಿರುವ ಅರ್ಜೆಂಟೀನಾ ವಿರುದ್ಧ ಫೈನಲ್ನಲ್ಲಿ ಸೆಣಸಾಡಲು ಇಂದಿನ 2ನೇ ಸೆಮಿಫೈನಲ್ ಪಂದ್ಯದಲ್ಲಿ ಫ್ರಾನ್ಸ್ ಮತ್ತು ಮೊರಾಕ್ಕೊ ಕಾದಾಡಲಿವೆ. ಸತತ ಎರಡನೇ ಪ್ರಶಸ್ತಿ ಮೇಲೆ ಕಣ್ಣಿಟ್ಟಿರುವ ಫ್ರಾನ್ಸ್, ಮೊದಲ ಬಾರಿಗೆ ಫೈನಲ್ ಪ್ರವೇಶಿಸಲು ಹಾತೊರೆಯುತ್ತಿರುವ ಮೊರಾಕ್ಕೊ ಮಧ್ಯೆ ಅದೃಷ್ಟ ಯಾರ ಪರವಾಗಿದೆ ಎಂಬುದು ಮಧ್ಯರಾತ್ರಿ ಗೊತ್ತಾಗಲಿದೆ.
2018ರ ವಿಶ್ವಕಪ್ ಜಯಿಸಿರುವ ಫ್ರಾನ್ಸ್ ಮತ್ತೊಂದು ಫಿಫಾ ಪ್ರಶಸ್ತಿ ಜಯಿಸಲು ತಯಾರಿ ನಡೆಸಿದ್ದರೆ, ಮೊದಲ ಬಾರಿಗೆ ಸೆಮಿಫೈನಲ್‌ಗೆ ಬಂದಿರುವ ದಕ್ಷಿಣ ಆಫ್ರಿಕಾದ ಮೊದಲ ರಾಷ್ಟ್ರ ಮೊರಾಕ್ಕೊ ಫೈನಲ್ಗೆ ಲಗ್ಗೆ ಇಟ್ಟು ಇತಿಹಾಸ ನಿರ್ಮಿಸುವ ತುದಿಗಾಲಲ್ಲಿದೆ.
ಫ್ರಾನ್ಸ್ ಇದುವರೆಗೆ ಒಟ್ಟು 3 ಬಾರಿ ಫೈನಲ್ ತಲುಪಿದ್ದು, ಈ ಪೈಕಿ ಎರಡು ಬಾರಿ ಪ್ರಶಸ್ತಿ ಗೆದ್ದಿದೆ. 2022ರ ಫಿಫಾ ವಿಶ್ವಕಪ್ ಗೆದ್ದರೆ ಬ್ರೆಜಿಲ್ ದಾಖಲೆ ಸರಿಗಟ್ಟಲಿದೆ. ಬ್ರೆಜಿಲ್ ಈ ಹಿಂದೆ 1958 ಮತ್ತು 1962 ರಲ್ಲಿ ಸತತ ಎರಡು ಬಾರಿ ಫುಟ್ಬಾಲ್ನ ಅತ್ಯುನ್ನತ ಪ್ರಶಸ್ತಿ ಜಯಿಸಿದೆ.
ಫ್ರಾನ್ಸ್ಗೆ ಸೆಮೀಸ್ ಕಂಟಕ: ಫ್ರಾನ್ಸ್ ಇದುವರೆಗೂ ಮೂರು ಬಾರಿ ಸೆಮೀಸ್ನಲ್ಲಿ ಸೋಲು ಕಂಡಿದೆ. 1958, 1982, 1986 ರಲ್ಲಿ ಸೆಮಿಫೈನಲ್ ಬಂದು ಸೋಲು ಕಂಡಿತ್ತು. ಮೂರು ಫೈನಲ್ ಆಡಿದ್ದು ಎರಡು (1998, 2018) ಬಾರಿ ಪ್ರಶಸ್ತಿ ಜಯಿಸಿದೆ. ಯುವತಾರೆ ಕೀಲಿಯಸ್ ಎಂಬಾಪೆ, ಓಲಿವಿಯರ್ ಗಿರೌಡ್ ವಿಶ್ವಕಪ್ನಲ್ಲಿ ಅತ್ಯತ್ತಮ ಪ್ರದರ್ಶನ ನೀಡಿದ್ದು, ಗಿರೌಡ್ ಗೋಲ್ಡನ್ ಬೂಟ್‌ಗಾಗಿ ಪ್ರಬಲ ಸ್ಪರ್ಧಿಯಾಗಿದ್ದಾರೆ.
ಕೈಲಿಯನ್ ಎಂಬಪ್ಪೆ ಈ ವಿಶ್ವಕಪ್ನಲ್ಲಿ ಎರಡು ಅದ್ಭುತ ಗೋಲುಗಳನ್ನು ಬಾರಿಸಿದ್ದು, ಈವರೆಗೂ 9 ಗೋಲು ದಾಖಲಿಸಿದ್ದಾರೆ. ಇದು ದಿಗ್ಗಜ ಆಟಗಾರ ಪೀಲೆ ಅವರ 7 ಗೋಲುಗಳ ದಾಖಲೆಯನ್ನು ಮುರಿದಿದ್ದಾರೆ. ವಿಶ್ವಶ್ರೇಷ್ಠ ಫುಟ್ಬಾಲಿಗ ಕ್ರಿಶ್ಚಿಯಾನೊ ರೊನಾಲ್ಡೊ ಅವರು ತಮ್ಮ ವೃತ್ತಿಜೀವನದಲ್ಲಿ ಮಾಡಿದ ಸಾಧನೆಯನ್ನು ಎಂಬಾಪ್ಪೆ ಕೇವಲ 24 ನೇ ವಯಸ್ಸಿನಲ್ಲಿಯೇ ಸಾಧಿಸಿದ್ದಾರೆ.
ಮೊರಾಕ್ಕೊಗೆ ದಾಖಲೆ ಸೃಷ್ಟಿಸುವ ತವಕ: ಇದೇ ಮೊದಲ ಬಾರಿಗೆ ಸೆಮಿಫೈನಲ್ ತಲುಪಿರುವ ದಕ್ಷಿಣ ಆಫ್ರಿಕಾ ತಂಡವಾದ ಮೊರಾಕ್ಕೊ ಫೈನಲ್ ತಲುಪುವ ಧಾವಂತದಲ್ಲಿದೆ. ಕ್ವಾರ್ಟರ್ ಫೈನಲ್ನಲ್ಲಿ ವಿಶ್ವದ ಬಲಿಷ್ಠ ಪೋರ್ಚುಗಲ್ ತಂಡವನ್ನು ಮಣಿಸಿ ಸೆಮೀಸ್ಗೇರಿದೆ. ಇದೇ ಉತ್ಸಾಹದಲ್ಲಿ ಫ್ರಾನ್ಸ್ ತಂಡವನ್ನು ಮೀರಿಸಿ ಫೈನಲ್ ಕನಸು ಕಾಣುತ್ತಿದೆ.
ಅತ್ಯುತ್ತಮ ಪ್ರದರ್ಶನ ನೀಡುತ್ತಿರುವ ಮೊರಾಕ್ಕೊ ಆಟಗಾರರನ್ನು ತಡೆಯುವುದು ಸ್ವಲ್ಪ ಕಷ್ಟವೇ ಎಂದು ಫ್ರಾನ್ಸ್ ಕೋಚ್ ಒಪ್ಪಿಕೊಂಡಿದ್ದಾರೆ. ಮೊರಾಕ್ಕೊದ ಗೋಲ್ಕೀಪರ್ ಸಾಹಸದಿಂದ ಈವರೆಗೂ ತಂಡ ಒಂದೇ ಒಂದು ಗೊಲು ಬಿಟ್ಟುಕೊಟ್ಟಿಲ್ಲ. ಒಂದು ಗೋಲು ದಾಖಲಾಗಿದ್ದರೂ ಅದು ತಂಡದ ಆಟಗಾರನ ತಪ್ಪಿನಿಂದಲೇ ಸ್ವತಃ ಗೋಲು ಬಿಟ್ಟುಕೊಟ್ಟಿತ್ತು.
ಓದಿ: ಫಿಫಾ ವಿಶ್ವಕಪ್: ಕ್ರೊವೇಷಿಯಾ ಸೋಲಿಸಿ ಫೈನಲ್ ತಲುಪಿದ ಅರ್ಜೆಂಟೀನಾ, ಅಂತಿಮ ಕದನಕ್ಕೆ ರೆಡಿ
