ಲಂಡನ್: ಕ್ರಿಕೆಟ್ ಕಾಶಿ ಲಾರ್ಡ್ಸ್ ಮೈದಾನದಲ್ಲಿ ನಡೆಯುತ್ತಿರುವ 2ನೇ ಟೆಸ್ಟ್ ಪಂದ್ಯದಲ್ಲಿ ಇಂಗ್ಲೆಂಡ್ ಕ್ರಿಕೆಟಿಗರು ಭಾರತೀಯ ಬ್ಯಾಟ್ಸ್ಮನ್ಗಳನ್ನು ಪದೇ ಪದೇ ಸ್ಲೆಡ್ಜಿಂಗ್ ಮಾಡಿದರೂ, ಅದನ್ನು ಲೆಕ್ಕಿಸದೇ ಬ್ಯಾಟ್ ಮೂಲಕವೇ ಮೊಹಮ್ಮದ್ ಶಮಿ ಹಾಗೂ ಜಸ್ಪ್ರೀತ್ ಬುಮ್ರಾ ತಕ್ಕ ಉತ್ತರ ನೀಡಿದ್ದಾರೆ.
ಭಾನುವಾರ ವಿರಾಟ್ ಕೊಹ್ಲಿಯೊಂದಿಗೆ ವಾಕ್ಸಮರ ನಡೆಸಿದ್ದ ಆಂಗ್ಲರು ಇಂದು ಜಸ್ಪ್ರೀತ್ ಬುಮ್ರಾ ಅವರೊಡನೆ ಪದೇ ಪದೇ ಸ್ಲೆಡ್ಜಿಂಗ್ ಮೂಲಕ ಏಕಾಗ್ರತೆ ಹಾಳು ಮಾಡಲು ಪ್ರಯತ್ನಿಸಿದ್ದಾರೆ. ಆದರೆ ಇದಕ್ಕೆ ಬುಮ್ರಾ ಮಾತಿನ ಮೂಲಕ ಉತ್ತರ ಕೊಟ್ಟರೆ, ಶಮಿ ಸೈಲೆಂಟಾಗಿ ತಮ್ಮ ಬ್ಯಾಟಿಂಗ್ ಮೂಲಕವೇ ಪ್ರತ್ಯುತ್ತರ ನೀಡಿದ್ದಾರೆ.
ಬುಮ್ರಾ ಬ್ಯಾಟಿಂಗ್ಗೆ ಬರುತ್ತಿದ್ದಂತೆಯೇ 91 ಓವರ್ನಲ್ಲಿ ಇಂಗ್ಲೆಂಡ್ ವೇಗಿ ಮಾರ್ಕ್ವುಡ್ ಮೊದಲು ಕಾಲು ಕೆರೆದು ಜಗಳಕ್ಕೆ ಮುಂದಾಗಿದ್ದಾರೆ. ಈ ಸಂದರ್ಭದಲ್ಲಿ ಬುಮ್ರಾ ಅಂಪೈರ್ ಗಮನಕ್ಕೆ ತಂದರು. ಈ ಸಂದರ್ಭದಲ್ಲಿ ಮಧ್ಯ ಪ್ರವೇಶಿಸಿದ ವಿಕೆಟ್ ಕೀಪರ್ ಜೋಸ್ ಬಟ್ಲರ್ ಕೂಡ ಬುಮ್ರಾ ಜೊತೆ ವಾಗ್ವಾದ ನಡೆಸಿದರು.
ನಂತರದ ಎಸೆತವನ್ನು ಬುಮ್ರಾ ಬೌಂಡರಿ ಸಿಡಿಸಿ ತಕ್ಕ ಉತ್ತರ ನೀಡಿದರು. ಈ ಸಂದರ್ಭದಲ್ಲಿ ಭಾರತೀಯ ಚಪ್ಪಾಳೆ ತಟ್ಟಿ ಸಂಭ್ರಮಿಸಿದರು. ಕೊಹ್ಲಿ ಎಂದಿನಂತೆ ಆಕ್ರಮಣಕಾರಿ ರೀತಿ ಕುಣಿದು-ಕುಪ್ಪಳಿಸಿ ಇಬ್ಬರು ಬ್ಯಾಟ್ಸ್ಮನ್ಗಳನ್ನು ಹುರಿದುಂಬಿಸುತ್ತಿದ್ದರು.
ಆದರೆ ಇದು ಇಷ್ಟಕ್ಕೆ ನಿಲ್ಲಲಿಲ್ಲ, 93ನೇ ಓವರ್ನಲ್ಲಿ ಮತ್ತೆ ಬುಮ್ರಾಗೆ ಬೌನ್ಸರ್ ಎಸೆದರು, ಚೆಂಡು ಬುಮ್ರಾ ಹೆಲ್ಮೆಟ್ಗೆ ಬಡಿಯಿತು. ತಕ್ಷಣ ಪಿಸಿಯೋ ಮೈದಾನಕ್ಕೆ ಆಗಮಿಸಿ ಪರಿಶೀಲಿಸಿದರು. ವುಡ್ ನಂತರ ಜೇಮ್ಸ್ ಅ್ಯಂಡರ್ಸನ್ ಕೂಡ ಸ್ಲೆಡ್ಜಿಂಗ್ಗೆ ಯತ್ನಿಸಿದರಾದರೂ ಅದಕ್ಕೆ ಭಾರತೀಯ ಜೋಡಿ ತಕ್ಕ ಉತ್ತರವನ್ನೇ ನೀಡಿದರು.
ಕೊನೆಗೆ ಈ ಜೋಡಿ 9ನೇ ವಿಕೆಟ್ ಜೊತೆಯಾಟದಲ್ಲಿ 88 ರನ್ ಸೇರಿಸಿದರು. ಭಾರತ 298ಕ್ಕೆ8 ವಿಕೆಟ್ ಕಳೆದುಕೊಂಡಿದ್ದ ವೇಳೆ ಡಿಕ್ಲೇರ್ ಘೋಷಿಸಿಕೊಂಡು ಆಂಗ್ಲರಿಗೆ 272 ರನ್ಗಳ ಗುರಿ ನೀಡಿದರು.
ಇದನ್ನು ಓದಿ:ಬುಮ್ರಾ-ಶಮಿ ಭರ್ಜರಿ ಬ್ಯಾಟಿಂಗ್ .. ಆಂಗ್ಲರಿಗೆ 260ರನ್ಗಳ ಗುರಿ ನೀಡಿದ ಭಾರತ
