ಬೆಂಗಳೂರು: ಭಾರತದಲ್ಲಿ ಸದ್ಯದ ಜನಪ್ರಿಯ ಕ್ರೀಡೆ ಅಂದ್ರೆ ಅದು ಕ್ರಿಕೆಟ್. ವಿಶ್ವಕಪ್ನ ಆತಿಥ್ಯ ವಹಿಸಿರುವ ದೇಶದ ತಂಡ ಕೂಡ ಭರ್ಜರಿಯಾಗಿ ಮುನ್ನುಗ್ಗಿ ಸೆಮಿಫೈನಲ್ ತಲುಪಿದೆ. ಕ್ರೀಡಾಂಗಣಗಳು ಕೂಡ ಹೆಚ್ಚೂ ಕಡಿಮೆ ಜನರಿಂದ ಭರ್ತಿಯಾಗುತ್ತಿವೆ. ಅದು ಭಾರತ ತಂಡವೇ ಆಗಿರಲಿ ಅಥವಾ ಬೇರೆ ದೇಶವೇ ಆಗಿದ್ದರೂ, ಸ್ಟೇಡಿಯಂನಲ್ಲಿ ಅಭಿಮಾನಿಗಳಿಗೆ ಕೊರತೆಯಿಲ್ಲ. ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ನ್ಯೂಜಿಲ್ಯಾಂಡ್ ಮತ್ತು ಶ್ರೀಲಂಕಾ ನಡುವಿನ ಪಂದ್ಯ ಇದಕ್ಕೆ ಸಾಕ್ಷಿ.
ಭಾರತ ಇಲ್ಲಿ ಇನ್ನು ಒಂದೂ ವಿಶ್ವಕಪ್ ಪಂದ್ಯ ಆಡಿಲ್ಲ. ಆದರೂ, ಬೇರೆ ತಂಡಗಳಿಗೆ ಜನರು ಭರ್ಜರಿಯಾಗಿ ಬೆಂಬಲ ನೀಡುತ್ತಿದ್ದಾರೆ. ಸಾವಿರಾರು ಸಂಖ್ಯೆಯಲ್ಲಿ ಕ್ರೀಡಾಂಗಣಕ್ಕೆ ಬರುವ ಕ್ರಿಕೆಟ್ ಪ್ರಿಯರು ವಿದೇಶಿ ತಂಡಗಳನ್ನು ಚಿಯರ್ ಮಾಡುತ್ತಾರೆ. ಕಿವೀಸ್ ಮತ್ತು ಲಂಕಾ ಪಂದ್ಯಕ್ಕೂ ಜನರು ಕ್ರೀಡಾಂಗಣದಲ್ಲಿ ಭರ್ತಿಯಾಗಿದ್ದು, ಅದರಲ್ಲಿ ಬ್ಲ್ಯಾಕ್ಕ್ಯಾಪ್ಸ್ ತಂಡಕ್ಕೆ ಸಪೋರ್ಟ್ ಮಾಡುತ್ತಿದ್ದಾರೆ.
ಕಿವೀಸ್ ಗೆಲ್ಲಬೇಕು: ನ್ಯೂಜಿಲೆಂಡ್‌ನ ಬೆಂಬಲಿಗ ರೋಹಿತ್ ಎಂಬುವರು ಈಟಿವಿ ಭಾರತ್ ಜೊತೆ ಮಾತನಾಡಿ, ಕಿವೀಸ್ ತಂಡ ಲಂಕಾ ವಿರುದ್ಧ ಗೆದ್ದು ಸೆಮಿಫೈನಲ್‌ಗೆ ಅರ್ಹತೆ ಪಡೆಯಬೇಕು. ಅಹಮದಾಬಾದ್‌ನಲ್ಲಿ ಭಾರತದ ವಿರುದ್ಧ ಆಡಬೇಕು ಎಂಬುದು ನನ್ನ ಬಯಕೆ. ಅಲ್ಲಿ ಭಾರತವನ್ನು ಸೋಲಿಸಿ ವಿಶ್ವಕಪ್ ಎತ್ತಿ ಹಿಡಿದರೂ ನಾನು ಸಂತೋಷಪಡುವೆ ಎಂದು ಹೇಳಿದರು.
6 ವರ್ಷಗಳ ಕಾಲ ನಾನು ನ್ಯೂಜಿಲ್ಯಾಂಡ್ನಲ್ಲಿ ನೆಲೆಸಿದ್ದೆ. ನ್ಯೂಜಿಲೆಂಡ್ ಉತ್ತಮ ತಂಡವಾಗಿರುವುದರಿಂದ ಟೂರ್ನಿಯಲ್ಲಿ ಅದಕ್ಕೆ ಬೆಂಬಲ ನೀಡುತ್ತಿದ್ದೇನೆ. ಭಾರತದಲ್ಲಿ ಕ್ರೀಡಾ ಸಂಸ್ಕೃತಿಗೇನು ಕಮ್ಮಿ ಇಲ್ಲ ಎಂದು ಇನ್ನೊಬ್ಬ ಅಭಿಮಾನಿ ಸಮೀರ್ ನಾರಾಯಣ್ ಹೇಳಿದರು. ಕಿವೀಸ್ನ ಕೇನ್ ವಿಲಿಯಮ್ಸನ್ ಮತ್ತು ರಚಿನ್ ರವೀಂದ್ರ ಅವರನ್ನು ಇಷ್ಟಪಡುತ್ತೇನೆ. ಹಾಗಾಗಿ ಆ ತಂಡಕ್ಕೆ ನನ್ನ ಬೆಂಬಲವಿದೆ ಎಂದು ಹೇಳಿದರು.
ಮೈದಾನದ ಹೊರಗೆ ವಿರಾಟ್, ಕೊಹ್ಲಿ: ಮೈದಾನದೊಳಗೆ ಲಂಕಾ- ಕಿವೀಸ್ ಪಂದ್ಯವಾಡುತ್ತಿದ್ದರೆ, ಹೊರಗೆ ಭಾರತ ತಂಡದ ನಾಯಕ ರೋಹಿತ್ ಶರ್ಮಾ ಮತ್ತು ಬ್ಯಾಟಿಂಗ್ ಕಿಂಗ್ ವಿರಾಟ್ ಕೊಹ್ಲಿಯ ಟೀಶರ್ಟ್ಗಳು ರಾರಾಜಿಸುತ್ತಿದ್ದವು. ಪ್ರತಿ ಟೀಶರ್ಟ್ಗೆ 250 ರೂಪಾಯಿ ಬೆಲೆ ಇದ್ದು, ಭರ್ಜರಿಯಾಗಿ ಬಿಕರಿ ಕಾಣುತ್ತಿವೆ. ಅಭಿಮಾನಿಗಳು ಉತ್ಸಾಹದಿಂದಲೇ ಖರೀದಿ ಮಾಡುತ್ತಿದ್ದಾರೆ ಎಂದು ಮಾರಾಟಗಾರರೊಬ್ಬರು ತಿಳಿಸಿದರು.
ಇದರ ಜೊತೆಗೆ ಕರ್ನಾಟಕದ ಅಭಿಮಾನಿಗಳು ನ್ಯೂಜಿಲೆಂಡ್ ತಂಡದ ಟಿ-ಶರ್ಟ್ ಧರಿಸಿರುವುದು ಕಂಡು ಬಂದಿತು. ಭಾರತೀಯ ಅದರಲ್ಲೂ ಬೆಂಗಳೂರು ಮೂಲದ ಆಲ್ರೌಂಡರ್ ರಚಿನ್ ರವೀಂದ್ರ ಬೌಲಿಂಗ್ ಮಾಡಲು ಬಂದಾಗ ಅಭಿಮಾನಿಗಳು ರಚಿನ್ ರಚಿನ್ ಎಂದು ಕೂಗಿದರು.
ಸೆಮಿಫೈನಲ್ ಪ್ರವೇಶಿಸಲು ನ್ಯೂಜಿಲೆಂಡ್ ಈ ಪಂದ್ಯದಲ್ಲಿ ಗೆಲ್ಲಲೇಬೇಕಿದೆ. ಮಾಡು ಇಲ್ಲವೇ ಮಡಿ ಪಂದ್ಯದಲ್ಲಿ ತಂಡ ಉತ್ತಮವಾಗಿ ಆಟವಾಡುತ್ತಿದೆ. ಈಗಾಗಲೇ ಭಾರತ, ದಕ್ಷಿಣ ಆಫ್ರಿಕಾ, ಆಸ್ಟ್ರೇಲಿಯಾ ತಂಡಗಳು ಸೆಮೀಸ್ ತಲುಪಿದ್ದು ನಾಲ್ಕನೇ ಸ್ಥಾನಕ್ಕಾಗಿ ಪೈಪೋಟಿ ನಡೆಯುತ್ತಿದೆ. ಉತ್ತಮ ರನ್ರೇಟ್ನಿಂದ ಕಿವೀಸ್ ಗೆದ್ದಲ್ಲಿ ರೇಸ್ನಲ್ಲಿರುವ ಪಾಕಿಸ್ತಾನ ಮತ್ತು ಅಫ್ಘಾನಿಸ್ತಾನ ಟೂರ್ನಿಯಿಂದ ಹೊರ ಬೀಳಲಿವೆ.
ಭಾನುವಾರ ಭಾರತದ ಪಂದ್ಯ: ಆತಿಥೇಯ ಭಾರತ ತಂಡ ಬೆಂಗಳೂರಿನಲ್ಲಿ ತನ್ನ ಕೊನೆಯ ಲೀಗ್ ಪಂದ್ಯವನ್ನು ನವೆಂಬರ್ 12 ರಂದು (ಭಾನುವಾರ) ಕ್ರಿಕೆಟ್ ಶಿಶು ನೆದರ್ಲ್ಯಾಂಡ್ಸ್ ವಿರುದ್ಧ ಆಡಲಿದೆ. ಮೊದಲ ತಂಡವಾಗಿ ಸೆಮೀಸ್ ಸೇರಿರುವ ಭಾರತಕ್ಕಿದು ಔಪಚಾರಿಕ ಪಂದ್ಯವಾಗಿರಲಿದೆ.
ಇದನ್ನೂ ಓದಿ: ಬೆಂಗಳೂರಿನಲ್ಲಿಂದು ವಿಶ್ವಕಪ್ ಸೆಮಿ ಫೈನಲ್‌ಗೆ ಕಿವೀಸ್, ಚಾಂಪಿಯನ್ಸ್ ಟ್ರೋಫಿ ಅರ್ಹತೆಗೆ ಲಂಕಾ ಬಿಗ್ ಫೈಟ್
