ಧರ್ಮಶಾಲಾ (ಹಿಮಾಚಲ ಪ್ರದೇಶ): ಪಂಜಾಬ್ ಕಿಂಗ್ಸ್ ವಿರುದ್ಧ ರಾಜಸ್ಥಾನ ರಾಯಲ್ಸ್ ತಂಡ ನಾಲ್ಕು ವಿಕೆಟ್ಗಳ ರೋಚಕ ಜಯ ದಾಖಲಿಸಿದೆ. ಈ ಪಂದ್ಯದ ಸೋಲಿನೊಂದಿಗೆ ಐಪಿಎಲ್ ಟೂರ್ನಿನಿಂದ ಶಿಖರ್ ಧವನ್ ಪಡೆ ಹೊರ ಬಿದ್ದಿದೆ. ಮತ್ತೊಂದೆಡೆ, ನಿರ್ಣಾಯಕ ಪಂದ್ಯದಲ್ಲಿ ರಾಯಸ್ಥಾನ ತಂಡ ಗೆದ್ದು ಐದನೇ ಸ್ಥಾನಕ್ಕೆ ಏರಿದರೂ ಪ್ಲೇ ಆಫ್ ಹಾದಿ ಕಠಿಣವಾಗಿದೆ. ಮುಂದಿನ ಪಂದ್ಯಗಳಲ್ಲಿ ಆರ್ಸಿಬಿ ಹಾಗೂ ಮುಂಬೈ ಇಂಡಿಯನ್ಸ್‌ ತಂಡಗಳ ಫಲಿತಾಂಶ ಮೇಲೆ ರಾಯಲ್ಸ್ ಭವಿಷ್ಯ ನಿಂತಿದೆ.
ಇಲ್ಲಿನ ಧರ್ಮಶಾಲಾ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಸೋತು ಮೊದಲ ಬ್ಯಾಟಿಂಗ್ ಮಾಡಿದ ಪಂಬಾಜ್ ಪಂದ್ಯ 187 ರನ್ಗಳನ್ನು ಪೇರಿಸಿತ್ತು. ಈ ಗುರಿ ಬೆನ್ನಟ್ಟಿದ ರಾಜಸ್ಥಾನ ರಾಯಲ್ಸ್ ತಂಡವು ಇನ್ಸಿಂಗ್ಸ್ನ ಎರಡು ಎಸೆತಗಳು ಬಾಕಿ ಇರುವಾಗಲೇ 189 ರನ್ ಬಾರಿಸಿ ಗೆಲುವಿನ ನಗೆ ಬೀರಿತು. ರಾಜಸ್ಥಾನ ಪರ ಆರಂಭಿಕ ಬ್ಯಾಟರ್ ಜೋಸ್‌ ಬಟ್ಲರ್‌ ಶೂನ್ಯಕ್ಕೆ ಔಟಾದರು. ನಂತರದಲ್ಲಿ ಯಶಸ್ವಿ ಜೈಸ್ವಾಲ್‌ ಮತ್ತು ಕನ್ನಡಿಗ ದೇವದತ್‌ ಪಡಿಕ್ಕಲ್‌ 73 ರನ್ಗಳ ಜೊತೆಯಾಟ ನೀಡಿ ಆಸರೆಯಾದರು.
ದೇವದತ್‌ ಪಡಿಕ್ಕಲ್‌ 30 ಎಸೆತಗಳಲ್ಲಿ 5 ಬೌಂಡರಿ, 3 ಸಿಕ್ಸರ್‌ಗಳ ಸಮೇತ 51 ರನ್ ಬಾರಿಸಿ ಮಿಂಚಿದರು. ಸಂಜು ಸಮ್ಸನ್ ಕೇವಲ 2 ರನ್ಗೆ ವಿಕೆಟ್ ವಿಕೆಟ್ ಒಪ್ಪಿಸಿದರು. ಮತ್ತೊಂದೆಡೆ, ಯಶಸ್ವಿ ಜೈಸ್ವಾಲ್‌ 36 ಎಸೆತಗಳಲ್ಲಿ 8 ಬೌಂಡರಿಗಳೊಂದಿಗೆ 50 ರನ್ ಬಾರಿಸಿ ಗಮನ ಸೆಳೆದರು. ರಿಯಾನ್‌ ಪರಾಗ್‌ 12 ಎಸೆತದಲ್ಲಿ 2 ಸಿಕ್ಸರ್ 1 ಬೌಂಡರಿಯೊಂದಿಗೆ 20 ರನ್ಗಳ ಕಾಣಿಕೆ ನೀಡಿದರು. ಇನ್ನಿಂಗ್ಸ್‌ನ ಕೊನೆಯಲ್ಲಿ ಶ್ರಿಮೋನ್‌ ಹೆಟ್ಮೆಯರ್‌ 28 ಎಸೆತಗಳಲ್ಲಿ 4 ಬೌಂಡರಿ, 3 ಸಿಕ್ಸರ್ ಸಮೇತ 46 ರನ್ ಸಿಡಿಸಿ ತಂಡದ ಗೆಲುವನ್ನು ಸುಲಭ ಮಾಡಿದರು. ಕೊನೆಗೆ ಧ್ರುವ ಜುರೆಲ್ ಅಜೇಯ 18 ಮತ್ತು ಟ್ರೆಂಟ್ ಬೌಲ್ಟ್ 1 ರನ್ ಗಳಿಸಿ ತಂದವನ್ನು ಗೆಲುವಿನ ದಡ ಸೇರಿಸಿದರು.
ಇದಕ್ಕೂ ಮುನ್ನ ಸ್ಯಾಮ್ ಕರನ್, ಜಿತೇಶ್ ಶರ್ಮಾ ಮತ್ತು ಶಾರುಖ್ ಖಾನ್ ಭರ್ಜರಿ ಬ್ಯಾಟಿಂಗ್ ಬಲದಿಂದ ಪಂಜಾಬ್ ಕಿಂಗ್ಸ್ ನಿಗದಿತ ಓವರ್ಗಳಲ್ಲಿ ಐದು ವಿಕೆಟ್ ನಷ್ಟಕ್ಕೆ 187 ರನ್ಗಳನ್ನು ಕಲೆ ಹಾಕಿತ್ತು. ಮೊದಲ ಹತ್ತು ಓವರ್ಗಳಲ್ಲಿ ರಾಜಸ್ಥಾನ ಬೌಲರ್ಗಳು ಹಿಡಿತ ಸಾಧಿಸಿದರು. ಇದರಿಂದ ಪಂಜಾಬ್ ತಂದ ಆರಂಭದಲ್ಲೇ ಸಂಕಷ್ಟಕ್ಕೆ ಒಳಗಾಯಿತು. ಕಳೆದ ಪಂದ್ಯದಲ್ಲಿ ಶತಕ ಬಾರಿಸಿದ್ದ ಪ್ರಭಾಸಿಮ್ರಾನ್ ಸಿಂಗ್ ಕೇವಲ 2 ರನ್ಗೆ ವಿಕೆಟ್ ಒಪ್ಪಿಸಿದರು. ನಂತರ ಬಂದ ಅಥರ್ವ ಟೈಡೆ 19 ರನ್ ಗಳಿಸಿದ ನಿರ್ಗಮಿಸಿದರು.
ಇವರ ಬೆನ್ನಲ್ಲೇ ನಾಯಕ ಶಿಖರ್ ಧವನ್ ಕೂಡ ಕೇವಲ 17 ರನ್ ಬಾರಿಸಿ ಪೆವಿಲಿಯನ್ ಹಾದಿ ಹಿಡಿದರು. ಲಿಯಾಮ್ ಲಿವಿಂಗ್‌ಸ್ಟೋನ್ ಸಹ 9 ರನ್ಗೆ ಔಟಾದರು. ಇದರಿಂದ ತಂಡದ ಮೊತ್ತ 50 ರನ್ ಆಗುವಷ್ಟರಲ್ಲಿ ಪಂಜಾಬ್ ಪ್ರಮುಖ ನಾಲ್ಕು ವಿಕೆಟ್ ಕಳೆದುಕೊಂಡು ಆಘಾತ ಅನುಭವಿಸಿತ್ತು. ಆದರೆ, ನಂತರದಲ್ಲಿ ತಂಡಕ್ಕೆ ಮಧ್ಯಮ ಕ್ರಮಾಂಕದ ಬ್ಯಾಟರ್ಗಳಾದ ಸ್ಯಾಮ್ ಕರನ್, ಜಿತೇಶ್ ಶರ್ಮಾ ಮತ್ತು ಶಾರುಖ್ ಖಾನ್ ಆಸರೆಯಾದರು.
4 ವಿಕೆಟ್ ಪತನದ ನಂತರ ಸ್ಯಾಮ್ ಕರನ್ ಮತ್ತು ಜಿತೇಶ್ ಶರ್ಮಾ ಅರ್ಧಶತಕದ ಜೊತೆಯಾಟ ನೀಡಿದರು. ಈ ಜೊತೆಯಾಟದ ನೆರವಿನಿಂದ ತಂಡ 100 ರನ್ನ ಗಡಿ ದಾಟಿತು. 28 ಬಾಲ್ನಲ್ಲಿ 3 ಸಿಕ್ಸರ್ ಮತ್ತು 3 ಬೌಂಡರಿ ಸಮೇತ 44 ರನ್ ಗಳಿಸಿದ್ದ ಜಿತೇಶ್ ವಿಕೆಟ್ ಕೊಟ್ಟರು. ಜಿತೇಶ್ ಶರ್ಮಾ ನಂತರ ಬಂದ ಶಾರುಖ್ ಖಾನ್ ಅವರು ಸ್ಯಾಮ್ ಕರನ್ಗೆ ಜೊತೆಯಾದರು. ಈ ಜೋಡಿಯೂ ಮತ್ತೆ ಅರ್ಧಶತಕದ ಜೊತೆಯಾಟ ನೀಡಿತು. ಇದರಿಂದ ತಂಡ 150 ರನ್ ಕ್ರಾಸ್ ಮಾಡಿತು.
ಕೊನೆಯ ಎರಡು ಓವರ್ನಲ್ಲಿ ಈ ಜೋಡಿ 46 ರನ್ ಕಲೆ ಹಾಕಿತು. ಅನುಭವಿ ಚಹಾಲ್ ಅವರ 19ನೇ ಓವರ್ನಲ್ಲಿ 28 ರನ್ ಗಳಿಸಿದರು. 20ನೇ ಓವರ್ನಲ್ಲಿ ಬೋಲ್ಟ್ಗೆ 18 ರನ್ ಚಚ್ಚಿದರು. ಸ್ಯಾಮ್ ಕರನ್ 31 ಬಾಲ್ಗೆ 2 ಸಿಕ್ಸರ್ ಮತ್ತು 4 ಬೌಂಡರಿಗಳೊಂದಿಗೆ 49 ರನ್ ಗಳಿಸಿ ಅಜೇಯರಾಗಿ ಉಳಿದರು. 23 ಬಾಲ್ ಎದುರಿಸಿದ ಶರುಖ್ ನಾಲ್ಕು ಬೌಂಡರಿ, 2 ಸಿಕ್ಸರ್ ಸಮೇತ ಅಜೇಯ 41 ರನ್ ಬಾರಿಸಿದರು. ರಾಜಸ್ಥಾನ ಪರ ನವದೀಪ್ ಶೈನಿ 3 ವಿಕೆಟ್, ಝಂಪಾ ಮತ್ತು ಟ್ರೆಂಟ್ ಬೌಲ್ಟ್ ತಲಾ ಒಂದು ವಿಕೆಟ್ ಗಳಿಸಿದ್ದರು.
ಇದನ್ನೂ ಓದಿ: ಟಿ-20 ಅತಿ ಹೆಚ್ಚು ಶತಕಗಳ ಸರದಾರ ಕೊಹ್ಲಿ: ಆರ್ಸಿಬಿ - ಎಸ್ಆರ್ಹೆಚ್ ಪಂದ್ಯದಲ್ಲಿ ನಿರ್ಮಾಣವಾದ ದಾಖಲೆಗಳಿವು..
