ಕೋಲ್ಕತ್ತಾ: ಲೆಜೆಂಡ್ಸ್ ಲೀಗ್ ಕ್ರಿಕೆಟ್ನ ಮೊದಲ ಪಂದ್ಯದಲ್ಲಿ ವರ್ಲ್ಡ್ ಜೈಂಟ್ಸ್ ವಿರುದ್ಧ ಇಂಡಿಯಾ ಮಹಾರಾಜಾಸ್ 6 ವಿಕೆಟ್ಗಳ ಭರ್ಜರಿ ಗೆಲುವು ದಾಖಲು ಮಾಡಿದೆ. ತಂಡದ ಪರ ಯೂಸುಫ್ ಪಠಾಣ್, ಪಂಕಜ್ ಸಿಂಗ್ ಅದ್ಭುತ ಪ್ರದರ್ಶನ ನೀಡಿದ್ದು, ತಂಡದ ಗೆಲುವಿನಲ್ಲಿ ಮಹತ್ವದ ಪಾತ್ರ ನಿರ್ವಹಿಸಿದರು.
ಕೋಲ್ಕತ್ತಾದ ಈಡನ್ ಗಾರ್ಡನ್ ಮೈದಾನದಲ್ಲಿ ವಿಶೇಷ ಚಾರಿಟಿ ಪಂದ್ಯ ಆಯೋಜನೆ ಮಾಡಲಾಗಿತ್ತು. ಈ ಪಂದ್ಯದಲ್ಲಿ ಸ್ಫೋಟಕ ಅರ್ಧಶತಕ ಸಿಡಿಸಿದ ಯೂಸುಫ್ ತಂಡಕ್ಕೆ ಗೆಲುವಿನ ಉಡುಗೊರೆ ನೀಡಿದರು. ಮೊದಲು ಬ್ಯಾಟಿಂಗ್ ಮಾಡಿದ್ದ ವರ್ಲ್ಡ್ ಜೈಂಟ್ಸ್ ತಂಡ ನಿಗದಿತ 20 ಓವರ್ಗಳಲ್ಲಿ 8 ವಿಕೆಟ್ನಷ್ಟಕ್ಕೆ 170ರನ್ಗಳಿಕೆ ಮಾಡಿತು. ಮಹಾರಾಜಾಸ್ ಪರ ಬೌಲಿಂಗ್ನಲ್ಲಿ ಮಿಂಚಿದ ಪಂಕಜ್ ಸಿಂಗ್ 5 ವಿಕೆಟ್ ಪಡೆದು ಗಮನ ಸೆಳೆದರು.
ಇದನ್ನೂ ಓದಿ: ಲೆಜೆಂಡ್ಸ್ ಕ್ರಿಕೆಟ್ ಲೀಗ್: ಗಂಗೂಲಿ ಭಾರತ ತಂಡದ ನಾಯಕ, ಪಂದ್ಯ ಎಲ್ಲಿ? ಯಾವಾಗ?
171ರನ್ಗಳ ಸವಾಲಿನ ಗುರಿ ಬೆನ್ನತ್ತಿದ ಮಹಾರಾಜಾಸ್ ಕೇವಲ 50ರನ್ಗಳಿಕೆ ಮಾಡುವಷ್ಟರಲ್ಲಿ ಪ್ರಮುಖ 3 ವಿಕೆಟ್ ಕಳೆದುಕೊಂಡಿತು. ಈ ವೇಳೆ ಒಂದಾದ ಯೂಸುಫ್ ಹಾಗೂ ತನ್ಮಯ್ ಶ್ರೀವಾಸ್ತವ್ ತಂಡಕ್ಕೆ 103ರನ್ಗಳ ಜೊತೆಯಾಟವಾಡಿದರು. ಮಧ್ಯಮ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಿದ ಯೂಸುಪ್ ಕೇವಲ 35 ಎಸೆತಗಳಲ್ಲಿ 2 ಸಿಕ್ಸರ್, ಐದು ಬೌಂಡರಿ ಸಮೇತ 50ರನ್ಗಳಿಸಿದರು. ಹೀಗಾಗಿ ತಂಡ 18.4 ಓವರ್ಗಳಲ್ಲಿ ಗೆಲುವಿನ ದಡ ಸೇರಿಸಿದರು.
ನಿನ್ನೆ ಪಂದ್ಯದಲ್ಲಿ ಮಹಾರಾಜಾಸ್ ತಂಡವನ್ನ ವಿರೇಂದ್ರ ಸೆಹ್ವಾಗ್ ಮುನ್ನಡೆಸಿದರೆ, ವರ್ಲ್ಡ್ ಜೈಂಟ್ಸ್ ತಂಡದ ನಾಯಕತ್ವ ಜವಾಬ್ದಾರಿ ಜಾಕ್ ಕಾಲೀಸ್ ಹೊತ್ತುಕೊಂಡಿದ್ದರು. ಎರಡು ತಂಡಗಳಲ್ಲಿ ದಿಗ್ಗಜ ಆಟಗಾರರಾದ ಶೇನ್ ವ್ಯಾಟ್ಸನ್, ಸೇಲ್ ಸ್ಟೇನ್, ಮುತ್ತಯ್ಯ ಮುರಳೀಧರನ್, ಮೊಹಮ್ಮದ್ ಕೈಫ್, ಸ್ಟುವರ್ಟ್ ಬಿನ್ನಿ, ಪಾರ್ಥಿವ್ ಪಟೇಲ್, ಎಸ್ ಬದ್ರಿನಾಥ್ ಸೇರಿದಂತೆ ಅನೇಕರು ಇದ್ದರು.
