ಲೀಡ್ಸ್: ಭಾರತದ ವಿರುದ್ಧ 3ನೇ ಟೆಸ್ಟ್ ಪಂದ್ಯದಲ್ಲಿ ಅದ್ಭುತ ಬೌಲಿಂಗ್ ಪ್ರದರ್ಶನ ತೋರಿ ಇಂಗ್ಲೆಂಡ್ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ ವೇಗಿ ಒಲ್ಲಿ ರಾಬಿನ್ಸನ್ ಭಾರತ ತಂಡದ ನಾಯಕ ವಿರಾಟ್ ಕೊಹ್ಲಿ ವಿಕೆಟ್ ಪಡೆಯಲು ಮಾಡಿದ್ದ ಯೋಜನೆಯನ್ನು ಬಹಿರಂಗಪಡಿಸಿದ್ದಾರೆ.
2 ವಿಕೆಟ್ ಕಳೆದುಕೊಂಡು 215ರನ್ಗಳಿಸಿದ್ದ ಭಾರತ ತಂಡವನ್ನು ಶನಿವಾರ ಆಂಗ್ಲ ಬೌಲರ್ಗಳು ಕೇವಲ 19.3 ಓವರ್ಗಳಲ್ಲಿ 63 ರನ್ ಬಿಟ್ಟುಕೊಟ್ಟು 8 ವಿಕೆಟ್ ಪಡೆದರು. ಇದರಲ್ಲಿ ರಾಬಿನ್ಸನ್ ಪಾಲು 4 ವಿಕೆಟ್. ಒಟ್ಟಾರೆ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಸೇರಿದಂತೆ 65 ರನ್ ನೀಡಿ 5 ವಿಕೆಟ್ ಪಡೆದರು. ಮೊದಲ ಇನ್ನಿಂಗ್ಸ್ನಲ್ಲೂ 16 ರನ್ ನೀಡಿ 2 ವಿಕೆಟ್ ಪಡೆದಿದ್ದರು. 7 ವಿಕೆಟ್ ಪಡೆದು ವೃತ್ತಿ ಜೀವನದ ನಾಲ್ಕನೇ ಟೆಸ್ಟ್ ಪಂದ್ಯದಲ್ಲಿ ಮೊದಲ ಪಂದ್ಯ ಶ್ರೇಷ್ಠ ಪ್ರಶಸ್ತಿ ಪಡೆದರು.
" ಪ್ರಾಮಾಣಿಕವಾಗಿ ಹೇಳುತ್ತೇನೆ ಇಂಗ್ಲೆಂಡ್ ಪರ ಆಡಿ ನನ್ನ ಮೊದಲ ಗೆಲುವಿನಲ್ಲಿ ಪಂದ್ಯ ಶ್ರೇಷ್ಠ ಪ್ರಶಸ್ತಿ ಪಡೆಯುವುದು ಕನಸಾಗಿತ್ತು. ನಾನು ಇಲ್ಲಿ ಬೌಲಿಂಗ್ ಮಾಡುವುದಕ್ಕೆ ಮತ್ತು ಇಲ್ಲಿನ ಪರಿಸ್ಥಿತಿಯನ್ನು ಚೆನ್ನಾಗಿ ಬಳಸಿಕೊಳ್ಳುವುದಕ್ಕೆ ತುಂಬಾ ಆನಂದಿಸುತ್ತೇನೆ. ಇಲ್ಲಿ 5 ವಿಕೆಟ್ ಪಡೆದಿರುವುದು ನಾನು ಸಂತೋಷವಾಗಿದ್ದೇನೆ" ಎಂದು ರಾಬಿನ್ಸನ್ ಪಂದ್ಯದ ನಂತರ ಹೇಳಿದ್ದಾರೆ.
ಇನ್ನು ಕೊಹ್ಲಿ ವಿಕೆಟ್ ಪಡೆದ ಬಗ್ಗೆ ಕೇಳಿದ್ದಕ್ಕೆ, ಕೊಹ್ಲಿ ವಿಕೆಟ್ ಪಡೆದದ್ದು ತುಂಬಾ ಸಂತೋಷ ತಂದಿದೆ. ಅವರು ಆ ಓವರ್ನಲ್ಲಿ ಎರಡು ಬೌಂಡರಿ ಬಾರಿಸಿದ್ದರು, ಅದಕ್ಕಾಗಿ ಸಿಂಪಲ್ ಪ್ಲಾನ್ ಮಾಡಿದ್ದೆ, ಅದೇನೆಂದರೆ 4ನೇ ಮತ್ತು 5ನೇ ಸ್ಟಂಪ್ನಲ್ಲಿ ಚೆಂಡನ್ನು ಎಸೆದರೆ ಬ್ಯಾಟ್ಗೆ ತಾಗಬಹುದು ಅಂದುಕೊಂಡಿದ್ದೆ, ಕೊಹ್ಲಿ ನಾನಂದುಕೊಂಡದ್ದನ್ನು ಮಾಡಿದರು ಎಂದು ಭಾರತೀಯ ನಾಯಕನ ವಿಕೆಟ್ ಪಡೆಯಲು ಮಾಡಿದ ಯೋಜನೆಯನ್ನು ವಿವರಿಸಿದ್ದಾರೆ.
ಇದನ್ನು ಓದಿ: ರಾಬಿನ್ಸನ್ 5 ವಿಕೆಟ್: ಭಾರತಕ್ಕೆ ಇನ್ನಿಂಗ್ಸ್ ಮತ್ತು 76ರನ್ಗಳ ಸೋಲು, ಸರಣಿ 1-1ರಲ್ಲಿ ಸಮಬಲ
