ಭಾರತ ಸ್ಟಾರ್ ವೇಗಿ ಜಸ್ಪ್ರೀತ್ ಬುಮ್ರಾ ಟೀಂ ಇಂಡಿಯಾದ ಜರ್ಸಿ ತೊಟ್ಟು ಕಣಕ್ಕಿಳಿಯದೇ ಸುಮಾರು 8 ತಿಂಗಳುಗಳೇ ಕಳೆಯಿತು. ಮಹತ್ವದ ಪಂದ್ಯಗಳಿಂದ ದೂರ ಉಳಿದಿದ್ದು ಇನ್ನೂ ಚೇತರಿಸಿಕೊಂಡಿಲ್ಲವೇ ಎಂಬುದು ಎಲ್ಲರ ಪ್ರಶ್ನೆ. ಐಪಿಎಲ್ ವೇಳೆ ತಂಡದೊಂದಿಗೆ ಕಾಣಿಸಿಕೊಂಡಿದ್ದ ಬುಮ್ರಾ ಫಿಟ್ನೆಸ್ ಬಗ್ಗೆ ಪ್ರಶ್ನೆಗಳಿವೆ.
ಭಾರತಕ್ಕೆ ಆಸ್ಟ್ರೇಲಿಯಾ ತಂಡ ಸೆಪ್ಟೆಂಬರ್ನಲ್ಲಿ ಪ್ರವಾಸ ಕೈಗೊಂಡಿದ್ದಾಗ ಬುಮ್ರಾ ಟಿ20 ಪಂದ್ಯದಲ್ಲಿ ಕಾಣಿಸಿಕೊಂಡದ್ದೇ ಕೊನೆ. ಅದಕ್ಕೂ ಮುನ್ನವೇ ಗಾಯದಿಂದಾಗಿ ತಂಡದಿಂದ ಜಸ್ಪ್ರೀತ್ ಬುಮ್ರಾ ಹೊರಗುಳಿದಿದ್ದರು. 2022ರ ಏಷ್ಯಾಕಪ್ನಲ್ಲೂ ಅವರು ಕಾಣಿಸಿಕೊಂಡಿರಲಿಲ್ಲ. ಈಗ ವೆಸ್ಟ್ ಇಂಡೀಸ್ ಪ್ರವಾಸಕ್ಕೆ ಆಯ್ಕೆ ಆಗುತ್ತಾರಾ ಅಥವಾ ನೇರವಾಗಿ ಹೈಬ್ರಿಡ್ ಮಾದರಿಯ ಏಷ್ಯಾ ಕಪ್ಗೆ ಆಯ್ಕೆ ಆಗುತ್ತಾರಾ ಎಂಬುದನ್ನು ಕಾದುನೋಡಬೇಕು.
ಬುಮ್ರಾ ಅವರ ಫಿಟ್ನೆಸ್ ಬಗ್ಗೆ ಬಿಸಿಸಿಐ ಯಾವುದೇ ಮಾಹಿತಿ ಹಂಚಿಕೊಂಡಿಲ್ಲ. ಹಾಗೆಯೇ ಅವರು ಇತರೆ ಎಲ್ಲಿಯೂ ತಂಡದಲ್ಲಿ ಗುರುತಿಸಿಕೊಂಡಿಲ್ಲ. 2023ರ ಐಪಿಎಲ್, ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ನ್ನು ಮಿಸ್ ಮಾಡಿಕೊಂಡಿದ್ದಾರೆ. ಹೀಗಿರುವಾಗ ನೇರ ಏಷ್ಯಾ ಕಪ್ಗೆ ಬೂಮ್ರಾ ಅವರನ್ನು ಇಳಿಸುವ ಮುನ್ನ ವೆಸ್ಟ್ ಇಂಡೀಸ್ ಪ್ರವಾಸದಲ್ಲಿ ಕಾಣಿಸಿಕೊಳ್ಳಬಹುದು ಎನ್ನಲಾಗುತ್ತಿದೆ.
ಬಾರ್ಡರ್- ಗವಾಸ್ಕರ್ ಟ್ರೋಫಿಯಲ್ಲಿ ಅಯ್ಯರ್ಗೆ ಗಾಯ: ಆಸ್ಟ್ರೇಲಿಯಾ ಭಾರತದ ನಡುವಿನ ಟೆಸ್ಟ್ ಸರಣಿಯ ಎರಡನೇ ಪಂದ್ಯದ ವೇಳೆ ಜಿಮ್ನಲ್ಲಿ ಕಸರತ್ತು ಮಾಡುವಾಗ ಅಯ್ಯರ್ ಗಾಯಕ್ಕೆ ತುತ್ತಾದರು. ನಂತರ ಅವರು ಇಂಗ್ಲೆಂಡ್ನಲ್ಲಿ ಶಸ್ತ್ರಚಿಕಿತ್ಸೆಗೆ ಒಳಗಾಗಿ ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿಯಲ್ಲೂ ಅಭ್ಯಾಸಕ್ಕೆ ಮರಳಿದ್ದರು.
ಅಯ್ಯರ್ ಗಾಯಗೊಂಡ ಕಾರಣ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ನಲ್ಲಿ ಮಧ್ಯಮ ಕ್ರಮಾಂಕಕ್ಕೆ ಅನುಭವಿ ಅಜಿಂಕ್ಯ ರಹಾನೆಯನ್ನು ಆಡಿಸಲಾಗಿತ್ತು. 2023ರ ಇಂಡಿಯನ್ ಪ್ರೀಮಿಯರ್ ಲೀಗ್ನಲ್ಲಿ ಅವರು ಆಡಲಾಗದ ಕಾರಣ ಕೆಕೆಆರ್ನ ನಾಯಕತ್ವವನ್ನು ನಿತೀಶ್ ರಾಣಾಗೆ ನೀಡಲಾಗಿತ್ತು. ಬಾರ್ಡರ್- ಗವಾಸ್ಕರ್ ಟ್ರೋಫಿಯಲ್ಲಿ ಅಯ್ಯರ್ ಜಾಗದಲ್ಲಿ ಸೂರ್ಯ ಕುಮಾರ್ ಯಾದವ್ ಟೆಸ್ಟ್ಗೆ ಪದಾರ್ಪಣೆ ಮಾಡಿದ್ದರು.
ಅಪಘಾತಕ್ಕೊಳಗಾದ ಪಂತ್ ಮುಂದಿನ ವರ್ಷ ಮರಳುವ ನಿರೀಕ್ಷೆ: ವಿಕೆಟ್ ಕೀಪರ್ ಕಮ್ ಹೊಡಿಬಡಿ ಆಟಗಾರ ಪಂತ್ ಮುಂದಿನ ವರ್ಷದ ವೇಳೆ ಸಂಪೂರ್ಣ ಫೀಟ್ ಆಗಿ ತಂಡಕ್ಕೆ ಸೇರುವ ಸಾಧ್ಯತೆ ಇದೆ. ಗಾಯದಿಂದ ಸಂಪೂರ್ಣ ಗುಣಮುಖರಾಗಿರುವ ಅವರು ಎನ್ಸಿಎಯಲ್ಲಿ ಫಿಟ್ಆಗುತ್ತಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ಆಗಾಗ ಫೋಟೋ ಮತ್ತು ವಿಡಿಯೋಗಳನ್ನು ಹರಿಬಿಟ್ಟು ತಯಾರಾಗುತ್ತಿರುವ ಬಗ್ಗೆ ಅಪ್ಡೇಟ್ ನೀಡುತ್ತಿರುತ್ತಾರೆ.
ಐಪಿಎಲ್ನಲ್ಲಿ ಗಾಯಗೊಂಡ ರಾಹುಲ್: ಮೇ 1ರಂದು ಆರ್ಸಿಬಿ ಮತ್ತು ಲಕ್ನೋ ಪಂದ್ಯದಲ್ಲಿ ಕೆ.ಎಲ್. ರಾಹುಲ್ ಗಾಯಕ್ಕೆ ತುತ್ತಾಗಿ ನಂತರ ಶಸ್ತ್ರಚಿಕಿತ್ಸೆ ಮಾಡಿಸಿಕೊಂಡು ಈಗ ಎನ್ಸಿಎಯಲ್ಲಿದ್ದಾರೆ. ಆದಷ್ಟೂ ಬೇಗ ರಾಹುಲ್ ಫಿಟ್ ಆಗಿಲಿದ್ದು, ಏಷ್ಯಾಕಪ್ ವೇಳೆಗೆ ತಂಡ ಸೇರುವ ನಿರೀಕ್ಷೆಯೂ ಇದೆ.
ಇದನ್ನೂ ಓದಿ: Asia Cup 2023: ಆಗಸ್ಟ್ 31ರಿಂದ ಹೈಬ್ರಿಡ್ ಮಾದರಿ ಏಷ್ಯಾ ಕಪ್ ಕ್ರಿಕೆಟ್ ಟೂರ್ನಿ; ಪಾಕ್ನಲ್ಲಿ 4, ಲಂಕಾದಲ್ಲಿ 9 ಪಂದ್ಯ
