ಮುಂಬೈ: ಮೊದಲ ಬಾರಿಗೆ ಪೋಷಕರು ಆಗುತ್ತಿರುವ ಅರ್ಮನ್ ಜೈನ್ ಮತ್ತು ಅನೀಸ್ಸಾ ಮಲ್ಹೋತ್ರಾ ಅವರ ಬೇಬಿ ಶವರ್ ಫೋಟೋವನ್ನು ನಟಿ ಕರೀನಾ ಕಪೂರ್ ಮತ್ತು ನೀತು ಕಪೂರ್ ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡು ಸಂತಸ ವ್ಯಕ್ತಪಡಿಸಿದ್ದಾರೆ. ತಮ್ಮ ನಾದಿನಿ ಅನಿಸ್ಸಾ ಫೋಟೋವನ್ನು ಇನ್ಸ್ಟಾಗ್ರಾಂ ಸ್ಟೋರಿಯಲ್ಲಿ ಹಂಚಿಕೊಂಡಿರುವ ನಟಿ ಕರೀನಾ ಕಪೂರ್, ತಾಯಿಯಾಗುತ್ತಿರುವ ಸುಂದರಿ ಜೊತೆ ಎಂದು ಬರೆದುಕೊಂಡಿದ್ದಾರೆ. ಇನ್ನು ಈ ಗೋದ್ ಭಾರಯಿ (ಸೀಮಂತ ಶಾಸ್ತ್ರ)ದ ವೇಳೆ ಕರೀನಾ ಕಂದು- ನೇರಳೆ ಬಣ್ಣದ ಸೂಟ್ನಲ್ಲಿ ಕಂಗೊಳಿಸಿದ್ದರು. ಇನ್ನು ತಾಯಿಯಾಗುತ್ತಿರುವ ಅನಿಸ್ಸಾ ಎಂಬ್ರೋಯಡರಿಯ ನೀಲಿ ಬಣ್ಣದ ಸೀರೆಯಲ್ಲಿ ಮಿಂಚಿದ್ದು, ಕೊರಳಲ್ಲಿ ಹೂಮಾಲೆ ಹಾಕಿರುವುದನ್ನು ಕಾಣಬಹುದಾಗಿದೆ.
ಇನ್ನು, ನಟಿ ನೀತು ಕಪೂರ್ ಕೂಡ ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಈ ಸೀಮಂತ ಕಾರ್ಯಕ್ರಮದ ಫೋಟೋಗಳನ್ನು ಹಂಚಿಕೊಂಡಿದ್ದಾರೆ. ಇದರಲ್ಲಿ ಕರೀನಾ ಕಪೂರ್, ಮೊಮ್ಮಗಳು ನಿತಾಶಾ ನಂತ, ಅರ್ಮನ್ ಜೈನ್ ತಾಯಿ ರಿಮಾ ಕಪೂರ್ ಅವರನ್ನು ಕಾಣಬಹುದಾಗಿದೆ. ಇದೇ ವೇಳೆ ಕ್ಯಾಪಶನ್ನಲ್ಲಿ ದೇವರು ಅನಿಸ್ಸಾಗೆ ಒಳಿತು ಮಾಡಲಿ ಎಂದು ಕೂಡ ಬರೆದಿದ್ದಾರೆ. ಅರ್ಮನ್ ಜೈನ್ ಮತ್ತು ಅನಿಸ್ಸಾ ಮಲ್ಹೋತ್ರಾ ಕಳೆದ ಫೆಬ್ರವರಿ 2020ಯಲ್ಲಿ ಮದುವೆಯಾಗಿದ್ದರು. ಈ ಮದುವೆಗೆ ಅನೇಕ ಬಾಲಿವುಡ್ ಮಂದಿ ಕೂಡ ಆಗಮಿಸಿ ನವ ಜೋಡಿಗೆ ಶುಭ ಕೋರಿದ್ದರು. ಇದೀಗ ಈ ಜೋಡಿ ತಮ್ಮ ಮೊದಲ ಮಗುವಿನ ನಿರೀಕ್ಷೆಯಲ್ಲಿದ್ದಾರೆ. ಈ ಸೀಮಂತ ಶಾಸ್ತ್ರ ಕಾರ್ಯಕ್ರಮದಲ್ಲಿ ಕೇವಲ ಆಪ್ತರು ಮತ್ತು ಕುಟುಂಬ ವರ್ಗದವರನ್ನು ಮಾತ್ರ ಆಹ್ವಾನಿಸಲಾಗಿತ್ತು.
ಯಾರಿದು ಅರ್ಮನ್: ಅರ್ಮನ್ ಬಾಲಿವುಡ್ನ ಕಪೂರ್ ಕುಟುಂಬದ ಕುಡಿಯಾಗಿದ್ದು, ರೀಮಾ ಜೈನ್ ಅವರ ಮಗ. ಈ ರೀಮಾ ಜೈನ್ ರಂದೀರ್, ರಿಶಿ ಮತ್ತು ರಜೀವ್ ಕಪೂರ್ ಸಹೋದರಿಯಾಗಿದ್ದಾರೆ. ಪಂಜಾಬಿ ಮೂಲದ ಅನಿಸ್ಸಾ ಜೊತೆ ಅರ್ಮಾನ್ 2014ರಿಂದ ಡೇಟಿಂಗ್ ನಡೆಸುತ್ತಿದ್ದು, 2020ರಲ್ಲಿ ಮದುವೆಯಾಗಿದ್ದರು. ಈ ಮದುವೆಯಲ್ಲಿ ಬಾಲಿವುಡ್ನ ಕಪೂರ್ ಕುಟುಂಬ ಸಂಪೂರ್ಣವಾಗಿ ತೊಡಗಿಕೊಂಡಿತು. ಇದರ ಜೊತೆ ರಣಬೀರ್ ಕಪೂರ್ನನ್ನು ಮದುವೆಯಾಗುವ ಮೊದಲೇ ಆಲಿಯಾ ಭಟ್ ಕೂಡ ಈ ಮದುವೆಗೆ ಹಾಜರಾಗಿ, ಸಂಗೀತ್ನಲ್ಲಿ ಮಿಂಚಿದ್ದರು.
ಸದ್ಯ ಎರಡು ಗಂಡು ಮಕ್ಕಳ ತಾಯಿಯಾಗಿರುವ ಕರೀನಾ ಕಪೂರ್ ದಿ ಕ್ರೂ ಚಿತ್ರದಲ್ಲಿ ಬಣ್ಣ ಹಚ್ಚಿದ್ದಾರೆ. ಈ ಚಿತ್ರದಲ್ಲಿ ನಟಿ ಟಬು, ಕೃತಿ ಸನೋನ್ಮ ದಿಲ್ಜಿತ್ ದೊಸಂಜ್ ಸೇರಿದಂತೆ ಅನೇಕ ತಾರಾ ಬಳಗವಿದೆ. ಈ ಚಿತ್ರವನ್ನು ವೀರೆ ದಿ ವೆಡ್ಡಿಂಗ್ ಚಿತ್ರ ನಿರ್ಮಾಣ ಮಾಡಿದ್ದ ಏಕ್ತಾ ಕಪೂರ್ ಮತ್ತು ರಿಯಾ ಕಪೂರ್ ನಿರ್ಮಾಣ ಮಾಡುತ್ತಿದ್ದಾರೆ. ದಿ ಕ್ರೂ ಹೊರತಾಗಿ ನಟಿ ಕರೀನಾ, ಸಂಜಯ್ ಘೋಷ್ ನಿರ್ದೇಶನದ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಈ ಚಿತ್ರ ದಿ ಡಿವೋಷನಲ್ ಆಫ್ ಸಸ್ಪೆಕ್ಟ್ ಎಕ್ಸ್ ಪುಸ್ತಕದ ಆಧಾರದ ಮೇಲೆ ನಿರ್ಮಾಣವಾಗುತ್ತಿದೆ. ನೀತು ಕಪೂರ್ ಕೂಡ ಇತ್ತೀಚೆಗಷ್ಟೆ ಎ ಲೆಟರ್ ಟು ಮಿ. ಖನ್ನಾ ಚಿತ್ರದ ಶೂಟಿಂಗ್ ಮುಗಿಸಿದ್ದಾರೆ.
ಇದನ್ನೂ ಓದಿ: 'ಹೆವಿ ವರ್ಕೌಟ್ ಬೇಡ...': ಸಮಂತಾಗೆ 'ದಿ ಫ್ಯಾಮಿಲಿಮ್ಯಾನ್‌' ಮನೋಜ್ ಬಾಜಪೇಯಿ ಸಲಹೆ
