ಗೋವಾದಲ್ಲಿ ನಡೆಯುತ್ತಿರುವ ಪ್ರತಿಷ್ಠಿತ 54ನೇ ವರ್ಷದ ಇಂಟರ್​ನ್ಯಾಷನಲ್​ ಫಿಲ್ಮ್​ ಫೆಸ್ಟಿವಲ್​ ಆಫ್​ ಇಂಡಿಯಾ 2023ಕ್ಕೆ ಸೋಮವಾರ ಚಾಲನೆ ಸಿಕ್ಕಿದೆ. ಈ ಸಿನಿಮೋತ್ಸವದಲ್ಲಿ ಭಾರತೀಯ ಚಿತ್ರರಂಗಕ್ಕೆ ನೀಡಿದ ಕೊಡುಗೆಗಾಗಿ ಬಾಲಿವುಡ್​ ನಟಿ ಮಾಧುರಿ ದೀಕ್ಷಿತ್ ಅವರಿಗೆ 'ವಿಶೇಷ ಮನ್ನಣೆ ಪ್ರಶಸ್ತಿ'ಯನ್ನು ನೀಡಿ ಗೌರವಿಸಲಾಯಿತು. ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಖಾತೆ ಸಚಿವ ಅನುರಾಗ್​ ಠಾಕೂರ್​ ಪ್ರಶಸ್ತಿ ಪ್ರದಾನ ಮಾಡಿದರು. ಕೇಂದ್ರ ವಾರ್ತಾ ಮತ್ತು ಪ್ರಸಾರ ಖಾತೆ ಸಚಿವ ಡಾ.ಎಲ್.ಮುರುಗನ್​, ಗೋವಾ ಮುಖ್ಯಮಂತ್ರಿ ಪ್ರಮೋದ್​ ಸಾವಂತ್​ ಉಪಸ್ಥಿತರಿದ್ದರು.

ಪ್ರಶಸ್ತಿ ಸ್ವೀಕರಿಸಿದ ಬಳಿಕ ಸಂತಸ ವ್ಯಕ್ತಪಡಿಸಿದ ಮಾಧುರಿ ದೀಕ್ಷಿತ್​, "ಈ ಪ್ರಶಸ್ತಿಯನ್ನು ಅತ್ಯಂತ ಗೌರವದಿಂದ ಸ್ವೀಕರಿಸುತ್ತೇನೆ. ಇಂತಹ ಪ್ರಶಸ್ತಿಗಳು ಯಾವಾಗಲೂ ನಮ್ಮನ್ನು ಪ್ರೋತ್ಸಾಹಿಸುತ್ತವೆ. ಇನ್ನಷ್ಟು ಉತ್ತಮ ಹಾಗೂ ಒಳ್ಳೆಯ ಕೆಲಸ ಮಾಡಲು ಸ್ಫೂರ್ತಿ ನೀಡುತ್ತವೆ" ಎಂದು ಹೇಳಿದರು.

ಅನುರಾಗ್​ ಠಾಕೂರ್​ ಶ್ಲಾಘನೆ: ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಖಾತೆ ಸಚಿವ ಅನುರಾಗ್​ ಠಾಕೂರ್ ಅವರು ಮಾಧುರಿ ದೀಕ್ಷಿತ್​ ಅವರ ನಟನಾ ಕೌಶಲ್ಯ ಮತ್ತು ಚಿತ್ರರಂಗಕ್ಕೆ ನೀಡಿದ ಕೊಡುಗೆಯನ್ನು ಶ್ಲಾಘಿಸಿದರು. "ಮಾಧುರಿ ದೀಕ್ಷಿತ್​ ಯುಗಯುಗಾಂತರಕ್ಕೂ ಒಂದು ಐಕಾನ್​. ನಾಲ್ಕು ದಶಕಗಳಿಂದ ತಮ್ಮ ಅದ್ಭುತ ಮತ್ತು ಅಪ್ರತಿಮ ಪ್ರತಿಭೆಯೊಂದಿಗೆ ಪರದೆಯನ್ನು ಅಲಂಕರಿಸಿದ್ದಾರೆ. ನಿಶಾದಿಂದ ಹಿಡಿದು ಮನಮೋಹಕ ಚಂದ್ರಮುಖಿಯವರೆಗೆ, ಬೇಗಂ ಪಾರಾದಿಂದ ರಜ್ಜೋವರೆಗೆ, ಅವರ ಬಹುಮುಖ ಪ್ರತಿಭೆಗೆ ಯಾವುದೇ ಮಿತಿಯಿಲ್ಲ" ಎಂದು ತಿಳಿಸಿದರು.

"ಇಂತಹ ಅಮೋಘ ನಟಿ ಮಾಧುರಿ ದೀಕ್ಷಿತ್​ ಅವರಿಗೆ 54ನೇ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ ಭಾರತೀಯ ಸಿನಿಮಾ ರಂಗಕ್ಕೆ ನೀಡಿದ ಕೊಡುಗೆಗಾಗಿ ವಿಶೇಷ ಮನ್ನಣೆ ಪ್ರಶಸ್ತಿಯನ್ನು ನೀಡುವಾಗ ನಮಗೆ ಹೆಮ್ಮೆಯಾಗಿದೆ. ಅಸಾಧಾರಣ ಪ್ರಯಾಣದ ಆಚರಣೆ, ಶಾಶ್ವತ ಪರಂಪರೆಗೆ ಗೌರವ" ಎಂದು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

IFFI 2023: ನವೆಂಬರ್​ 20ರಿಂದ ಗೋವಾದಲ್ಲಿ ಬಹುನಿರೀಕ್ಷಿತ ಭಾರತೀಯ ಅಂತರರಾಷ್ಟ್ರೀಯ ಸಿನಿಮೋತ್ಸವ ಆರಂಭವಾಗಿದೆ. ಎಂಟು ದಿನಗಳ ಕಾಲ ನಡೆಯುವ ಈ ಅದ್ಧೂರಿ ಕಾರ್ಯಕ್ರಮದಲ್ಲಿ ಬಾಲಿವುಡ್​ ನಟ, ನಿರ್ದೇಶಕರು ಮತ್ತು ಗಾಯಕರು ಭಾಗಿಯಾಗಲಿದ್ದು, ತಮ್ಮ ಕಲಾ ಪ್ರದರ್ಶನವನ್ನು ಕೂಡ ನೀಡಲಿದ್ದಾರೆ. 'ಪಠಾಣ್​​' ಚಿತ್ರದ 'ಜೂಮೆ ಜೋ ಪಠಾಣ್'​ ಹಾಡಿನ ಪ್ರದರ್ಶನ ಕೂಡ ನಡೆಯಲಿದೆ. ಪುಷ್ಪ ಚಿತ್ರದ 'ಸಾಮಿ ಸಾಮಿ' ಮತ್ತು ಆಸ್ಕರ್​ ವಿಜೇತ 'ನಾಟು ನಾಟು' ಹಾಡು ಕೂಡ ನೆರೆದವರನ್ನು ಮೋಡಿ ಮಾಡಲಿದೆ.

ನಟಿ ಶ್ರೀಯಾ ಶರಣ್​ 'ಹೂ ಅಂಟಾವಾ' ಮತ್ತು 'ರಾಕಿ ಔರ್​ ರಾಣಿ' ಚಿತ್ರದ 'ಜುಮಕಾ' ಹಾಡಿಗೆ ನಡು ಬಳುಕಿಸಲಿದ್ದಾರೆ. ನಟಿ ಮಾಧುರಿ ದೀಕ್ಷಿತ್​​ ತಮ್ಮದೇ ಜನಪ್ರಿಯ ಹಾಡುಗಳಾದ 'ಮಾರು ಡಾಲಾ', 'ಡೋಲಾ ರೆ ಡೋಲ್'​ ಮತ್ತು 'ಅಜಾ ನಚ್​ ಲೆ' ಹಾಡಿಗೆ ನೃತ್ಯ ಮಾಡಲಿದ್ದಾರೆ. ಪಂಕಜ್​ ತ್ರಿಪಾಠಿ ಕೂಡ ಪ್ರದರ್ಶನ ಮಾಡಲು ಸಜ್ಜಾಗಿದ್ದಾರೆ. ನಿರ್ದೇಶಕ ವಿರ್ಫ್​ ಸರ್ಕಾರಿ ನಿರ್ದೇಶನದ ತಮ್ಮ ಚಿತ್ರ 'ಕಡಕ್​ ಸಿಂಗ್'​ನ ಪರಿಚಯ ಮಾಡಲಿದ್ದು, ಕವನ ವಾಚಿಸಲಿದ್ದಾರೆ. ಗಾಯಕಿ ಶ್ರೇಯಾ ಘೋಷಲ್​ ಮತ್ತು ಶಾಂತನು ಮೊಯಿತ್ರ ಕೂಡ ಜೊತೆಯಾಗಲಿದ್ದಾರೆ.

ಇವರ ಹೊರತಾಗಿ ನಟ ಶಾಹೀದ್​​ ಕಪೂರ್​, ಹಿನ್ನೆಲೆ ಗಾಯಕ ಸುಖ್ವಿಂದರ್​ ಸಿಂಗ್​​ ಕೂಡ ಕಾರ್ಯಕ್ರಮ ಗಮನಿಸಲಿದ್ದಾರೆ. ಶಾಹೀದ್​​ ತಮ್ಮ ಹಿಟ್​​ ಚಿತ್ರಗಳಾದ 'ಜಬ್​ ವಿ ಮೆಟ್'​​, 'ನಗಡ ನಗಡ', 'ಕಮಿನೆ' ಮತ್ತು 'ಧನ್​ ತೆ ನಾ' ಚಿತ್ರದ ಹಾಡಿಗೆ ಪ್ರದರ್ಶನ ನೀಡಲಿದ್ದಾರೆ. ಇತ್ತ ಸುಖ್ವಿಂದರ್​ ಸಿಂಗ್​ ದೇಶ ಭಕ್ತಿ ಗೀತೆ 'ಹೇ ವತನ್​ ಹೇ ವತನ್'​ ಹಾಡಿನ ಮೂಲಕ ಮೋಡಿ ಮಾಡಲಿದ್ದಾರೆ. ನಟಿ ಸಾರಾ ಆಲಿಖಾನ್​ ಕೂಡ ಮನರಂಜಿಸಲಿದ್ದು, ನಟ ಸನ್ನಿ ಡಿಯೋಲ್​ ಕೂಡ ಇದೇ ಮೊದಲ ಬಾರಿಗೆ ಕಾರ್ಯಕ್ರಮಕ್ಕೆ ಹಾಜರಾಗಲಿದ್ದಾರೆ.

ಇದನ್ನೂ ಓದಿ: 54th IFFI: ಗೋವಾದಲ್ಲಿ ನಡೆಯಲಿರುವ ಪ್ರತಿಷ್ಠಿತ ಚಲನಚಿತ್ರೋತ್ಸವದ ಮಾಹಿತಿ ನಿಮಗಾಗಿ