ಪವರ್ ಸ್ಟಾರ್ ಪುನೀತ್ ರಾಜ್ಕುಮಾರ್ ಹುಟ್ಟುಹಬ್ಬಕ್ಕೆ ಕರ್ನಾಟಕ ಅಲ್ಲದೇ ವಿಶ್ವದಾದ್ಯಂತ ಭರ್ಜರಿ ಓಪನಿಂಗ್ ಪಡೆದುಕೊಂಡಿರುವ ಕನ್ನಡದ ಹೈವೋಲ್ಟೆಜ್ ಚಿತ್ರ ಕಬ್ಜ. ಬೆಂಗಳೂರಿನ ನರ್ತಕಿ ಚಿತ್ರಮಂದಿರದಿಂದ ಹಿಡಿದು ಮುಂಬೈ, ಹೈದರಾಬಾದ್, ಚೆನ್ನೈ ಸೇರಿದಂತೆ ಎಲ್ಲೆಲ್ಲೂ ಕಬ್ಜ ಚಿತ್ರದ್ದೇ ಹವಾ. ಕನ್ನಡ ಚಿತ್ರರಂಗದ ಸೂಪರ್ ಸ್ಟಾರ್ಗಳಾದ ರಿಯಲ್ ಸ್ಟಾರ್ ಉಪೇಂದ್ರ, ಕಿಚ್ಚ ಸುದೀಪ್ ಹಾಗೂ ಹ್ಯಾಟ್ರಿಕ್ ಹೀರೋ ಶಿವ ರಾಜ್ಕುಮಾರ್ ಅಭಿನಯದ ಕಬ್ಜ ಸಿನಿಮಾಗೆ ಅವರ ಅಭಿಮಾನಿಗಳು ಮಾತ್ರವಲ್ಲದೇ ಸಿನಿ ಪ್ರೇಮಿಗಳು ಫಿದಾ ಆಗಿದ್ದಾರೆ.
ರೌಡಿಸಂ ಎಂಬ ಅಂಡರ್ವರ್ಲ್ಡ್ ಕಥೆಗೆ ಓಂಕಾರ ಹಾಕಿದ ರಿಯಲ್ ಸ್ಟಾರ್ ಉಪೇಂದ್ರ ಅವರೊಂದಿಗೆ ನಿರ್ದೇಶಕ ಆರ್ ಚಂದ್ರು ಹಾಲಿವುಡ್ ಶೈಲಿಯ ಮೇಕಿಂಗ್ ಮಾಡಿ, ಅದರಲ್ಲಿ ಅಂಡರ್ ವರ್ಲ್ಡ್ ಕಥೆಯನ್ನ ಹೇಳಿದ್ದಾರೆ. ಲವ್ ಸ್ಟೋರಿ ಹಾಗೂ ಫ್ಯಾಮಿಲಿ ಸಿನಿಮಾಗಳಿಗೆ ಬ್ರ್ಯಾಂಡ್ ಆಗಿದ್ದ ನಿರ್ದೇಶಕ ಆರ್ ಚಂದ್ರು ಇದೀಗ ಅಂಡರ್ ವರ್ಲ್ಡ್ ಕಥೆಯುಳ್ಳ ಸಿನಿಮಾ ಮಾಡಿ ಸೈ ಎನಿಸಿಕೊಂಡಿದ್ದಾರೆ.
ಕಬ್ಜ ಸಿನಿಮಾ 1960 - 1980ರಲ್ಲಿ ನಡೆಯುವ ಕಥೆ. ಅಮರಾವತಿ ಎಂಬ ನಗರ ಬಲಿಷ್ಠ ಅಂಡರ್ ವರ್ಲ್ಡ್ ಅಧೀನದಲ್ಲಿರುತ್ತೆ. ಬಹದ್ದೂರ್ ಎಂಬ ರಾಜಮನೆತನದವರು ಈ ಅಮರಾವತಿಯಲ್ಲಿ ಅಧಿಕಾರದ ಚುಕ್ಕಾಣಿ ಹಿಡಿಯಬೇಕೆಂದು ತುದಿಗಾಲಲ್ಲಿ ಲೆಕ್ಕಾಚಾರ ಹಾಕ್ತಾ ಇರುತ್ತಾರೆ. ಆದರೆ ಅದು ಸಾಧ್ಯವಾಗಲ್ಲ. ಅಂಡರ್ವರ್ಲ್ಡ್ ಮುಷ್ಠಿಯಲ್ಲಿ ಈ ಅಮರಾವತಿ ಇರುತ್ತದೆ. ಈ ಅಮರಾವತಿಯಲ್ಲಿ ಬಹಳ ಬಲಿಷ್ಠನಾದ ಕಲೀಲ್ ಎಂಬ ಡಾನ್ ಪಾಳೇಗಾರನಾಗಿರುತ್ತಾನೆ. ಪೈಲಟ್ ಆಗಬೇಕು ಅಂದುಕೊಂಡಿದ್ದ ಅರ್ಕೇಶ್ವರ ಅಂದ್ರೆ ಉಪೇಂದ್ರ ಅಮರಾವತಿಗೆ ಏಕೆ ಎಂಟ್ರಿ ಕೊಡ್ತಾರೆ ಅನ್ನೋದು ಕಬ್ಜ ಸಿನಿಮಾ ಕಥೆ.
ರಿಯಲ್ ಸ್ಟಾರ್ ಉಪೇಂದ್ರ ರೆಟ್ರೋ ಲುಕ್ನಲ್ಲಿ ಥೇಟ್ ಬ್ಲ್ಯಾಕ್ ಅಂಡ್ ವೈಟ್ ಕಾಲದ ಡಾನ್ ಆಗಿ ಸಿಲ್ವರ್ ಸ್ಕ್ರೀನ್ ಮೇಲೆ ಅಬ್ಬರಿಸಿದ್ದಾರೆ. ಅಭಿನಯ ಚಕ್ರವರ್ತಿ ಸುದೀಪ್ ಈ ಅರ್ಕೇಶ್ವರನನ್ನು ಬಂಧಿಸುವ ಖಡಕ್ ಭಾರ್ಗವ್ ಬಕ್ಷಿಯಾಗಿ ಮಿಂಚಿದ್ದಾರೆ. ಚಿತ್ರದ ಕ್ಲೈಮ್ಯಾಕ್ಸ್ನಲ್ಲಿ ಕರುನಾಡ ಚಕ್ರವರ್ತಿ ಶಿವ ರಾಜ್ಕುಮಾರ್ ಬಂದೂಕು ಹಿಡಿದು ಬರುವ ದೃಶ್ಯ ಅಭಿಮಾನಿಗಳ ಸಿಳ್ಳೆ ಚಪ್ಪಾಳೆ ಗಿಟ್ಟಿಸಿಕೊಂಡಿದೆ. ಬಾಯಲ್ಲಿ ಸಿಗರೇಟ್ ಹಚ್ಚಿ ನಾನು ಬಂದಿರೋದು ಕಬ್ಜ ಮಾಡೋದಿಕ್ಕೆ ಅನ್ನೋ ಡೈಲಾಗ್ ಕಬ್ಜ 2 ಸಿನಿಮಾಗೆ ಮುನ್ನುಡಿ ಬರೆದಂತಿದೆ.
ಉಪೇಂದ್ರ ಮಡದಿಯಾಗಿ ಶ್ರೀಯಾ ಶರಣ್ ಮಿಂಚಿದ್ದಾರೆ. ಉಳಿದಂತೆ ನವಾಬ್ ಷಾ, ತೆಲುಗಿನ ಬೇಡಿಕೆಯ ನಟರಾದ ಪೊಸನಿ ಕೃಷ್ಣ ಮುರಳಿ, ಮುರಳಿ ಶರ್ಮ, ಕಬೀರ್ ಸಿಂಗ್ ದುಹಾನ್, ಪ್ರಮೋದ್ ಶೆಟ್ಟಿ, ನೀನಾಸಂ ಅಶ್ವಥ್, ಐ ಸಿನಿಮಾ ಖ್ಯಾತಿಯ ಕಾಮರಾಜನ್ ತಮ್ಮ ಪಾತ್ರಗಳಲ್ಲಿ ಗಮನ ಸೆಳೆಯುತ್ತಾರೆ.
ಇದನ್ನೂ ಓದಿ: ಪುನೀತ್ ಬರ್ತ್‌ಡೇ ದಿನವೇ 'ಕಬ್ಜ' ರಿಲೀಸ್; ಅಭಿಮಾನಿಗಳ ಸಂಭ್ರಮ- ವಿಡಿಯೋ
ಕಬ್ಜ ಸಿನಿಮಾದ ಮೇಜರ್ ಹೈಲೆಟ್ಸ್ ಅಂದ್ರೆ ಕಲಾ ನಿರ್ದೇಶಕ ಶಿವಕುಮಾರ್ ಹಾಕಿರುವ ಅದ್ಧೂರಿ ಸೆಟ್ಗಳು. ಈ ಸೆಟ್ಗಳನ್ನು ಹಾಲಿವುಡ್ ಸಿನಿಮಾದಂತೆ ತೋರಿಸಿದ್ದಾರೆ ಕ್ಯಾಮರಾ ಮ್ಯಾನ್ ಎ.ಜೆ ಶೆಟ್ಟಿ. ಮಹೇಶ್ ಸಂಕಲನ, ಜಾನಿ ಮಾಸ್ಟರ್ ನೃತ್ಯ ನಿರ್ದೇಶನ, ರವಿವರ್ಮ, ವಿಕ್ರಂಮೋರ್ ಚೇತನ್ ಅವರ ಸಾಹಸ ಕಬ್ಜ ಸಿನಿಮಾದ ಸ್ಟ್ರೈಂಥ್. ಸಂಗೀತ ನಿರ್ದೇಶಕ ರವಿ ಬಸ್ರೂರ್ ಹಿನ್ನೆಲೆ ಸಂಗೀತ ಹೆಚ್ಚಿದ್ದು, ನವಾಮಿ ಹಾಗೂ ಕಬ್ಜ ಕಬ್ಜ ಟೈಟಲ್ ಟ್ರ್ಯಾಕ್ ಚುಮು ಚುಮು ಚಳಿ ಸಾಂಗ್ ಸಿನಿ ಪ್ರೇಕ್ಷಕರನ್ನು ರಂಜಿಸುತ್ತವೆ.
ಇದನ್ನೂ ಓದಿ: ಸ್ವರಾ ಭಾಸ್ಕರ್ - ಫಹಾದ್ ಅಹ್ಮದ್ ಆರತಕ್ಷತೆ: ರಾಹುಲ್ ಗಾಂಧಿ, ಜಯಾ ಬಚ್ಚನ್ ಸೇರಿದಂತೆ ಗಣ್ಯರು ಭಾಗಿ
ಶ್ರೀ ಸಿದ್ಧೇಶ್ವರ ಎಂಟರ್ಪ್ರೈಸಸ್ನಡಿ ಆರ್ ಚಂದ್ರು ನಿರ್ಮಾಣದ ಜೊತೆಗೆ ನಿರ್ದೇಶನ ಮಾಡಿರೋ ಈ ಕಬ್ಜ ಸಿನಿಮಾ ಮೊದಲ ದಿನ ಉತ್ತಮ ಪ್ರತಿಕ್ರಿಯೆ ಪಡೆದುಕೊಂಡಿದ್ದು, ಯಶಸ್ವಿಯಾಗುವ ಲಕ್ಷಣಗಳಿವೆ. ಸಿನಿಮಾ ನೋಡಿದ ಪ್ರೇಕ್ಷಕರು ಕಬ್ಜ 2 ಸಿನಿಮಾ ಅದಷ್ಟು ಬೇಗ ಮಾಡಿ ಅಂತಾ ಹೇಳುತ್ತಿರೋದು ನಿರ್ದೇಶಕ ಆರ್ ಚಂದ್ರು ಅವರಿಗೆ ಹೆಮ್ಮೆ ಅನಿಸುತ್ತಿದೆ.
