ಬಾಲಿವುಡ್ ನಟಿ ಆಲಿಯಾ ಭಟ್ ಮತ್ತು ನಟ ರಣಬೀರ್ ಕಪೂರ್ ಜೋಡಿಯಾಗಿ ನಟಿಸಿರುವ ಬಹು ನಿರೀಕ್ಷಿತ ಬ್ರಹ್ಮಾಸ್ತ್ರ ಸಿನಿಮಾ ಸೆಪ್ಟೆಂಬರ್ 9ರಂದು ಬಿಡುಗಡೆ ಆಗಲಿದೆ. ಈ ನಿಟ್ಟಿನಲ್ಲಿ ಇಂದು ಚೆನ್ನೈನಲ್ಲಿ ಬ್ರಹ್ಮಾಸ್ತ್ರ ಸಿನಿಮಾ ಪ್ರಚಾರ ಕಾರ್ಯಕ್ರಮ ನಡೆಯಿತು. ರಣ್ಬೀರ್ ಕಪೂರ್, ನಿರ್ದೇಶಕ ಎಸ್ ಎಸ್ ರಾಜಮೌಳಿ ಮತ್ತು ನಟ ನಾಗಾರ್ಜುನ ಮಾಧ್ಯಮಗಳ ಮುಂದೆ ಉಪಸ್ಥಿತರಿದ್ದರು. ಕಾರ್ಯಕ್ರಮದಲ್ಲಿ ತಮ್ಮ ಕಾಮೆಂಟ್ವೊಂದರ ಸಲುವಾಗಿ ರಣಬೀರ್ ಕಪೂರ್ ಅಭಿಮಾನಿಗಳಲ್ಲಿ ಕ್ಷಮೆ ಯಾಚಿಸಿದರು.
ಏ.14, 2022ರಂದು ಮುಂಬೈನ ಬಾಂದ್ರಾದಲ್ಲಿರುವ ರಣ್ಬೀರ್ ಕಪೂರ್ ನಿವಾಸದಲ್ಲಿ ಈ ಜೋಡಿ ದಾಂಪತ್ಯ ಜೀವನಕ್ಕೆ ಕಾಲಿರಿಸಿದ್ದಾರೆ. ಜೂನ್ 27 ರಂದು ಈ ದಂಪತಿ ತಾವು ಶೀಘ್ರದಲ್ಲೇ ಪೋಷಕರಾಗುತ್ತಿದ್ದೇವೆ ಎಂದು ಘೋಷಿಸಿ ಅಭಿಮಾನಿಗಳಿಗೆ ಸಿಹಿ ಸುದ್ದಿಯನ್ನು ಸಹ ನೀಡಿದ್ದರು.
ಆದರೆ ಇತ್ತೀಚೆಗೆ ಗರ್ಭಾವಸ್ಥೆಯಲ್ಲಿರುವ ಆಲಿಯಾ ಭಟ್ ತೂಕ ಹೆಚ್ಚಿಕೊಳ್ಳುತ್ತಿರುವ ಬಗ್ಗೆ ರಣ್ಬೀರ್ ಕಪೂರ್ ಹೇಳಿಕೆ ನೀಡಿದ್ದರು. ಈ ಹೇಳಿಕೆಯನ್ನು ಕೆಲವರು ಜೋಕ್ ಆಗಿ ಸ್ವೀಕರಿಸಿದ್ದರೆ ಮತ್ತೆ ಹಲವರಿಗೆ ಹಿಡಿಸಿಲ್ಲ. ರಣ್ಬೀರ್ ಕಪೂರ್ ಹೇಳಿಕೆಯನ್ನು ಸಾಕಷ್ಟು ನೆಟಿಜೆನ್ಗಳು ವಿರೋಧಿಸಿದ್ದರು. ಈ ಬಗ್ಗೆ ಇಂದಿನ ಕಾರ್ಯಕ್ರಮದಲ್ಲಿ ನಟ ರಣಬೀರ್ ಕಪೂರ್ ಪ್ರತಿಕ್ರಿಯೆ ನೀಡಿದ್ದಾರೆ.
ನಾನು ನನ್ನ ಪತ್ನಿಯನ್ನು ತುಂಬಾ ಇಷ್ಟ ಪಡುತ್ತೇನೆಂದು ಮಾತು ಶುರು ಮಾಡಿದ ರಣ್ಬೀರ್ ಕಪೂರ್, ನಾನು ಯಾರ ಮನಸ್ಸನ್ನಾದರು ನೋಯಿಸಿದ್ದರೆ, ಯಾರನ್ನಾದರೂ ಪ್ರಚೋದಿಸಿದ್ದರೆ, ನಾನು ನಿಜವಾಗಿಯೂ ಕ್ಷಮೆಯಾಚಿಸಲು ಬಯಸುತ್ತೇನೆ. ನೋಯಿಸುವುದು ನನ್ನ ಉದ್ದೇಶವಲ್ಲ. ಯಾರೇ ಪ್ರಚೋದನೆಗೊಳಗಾಗಿದ್ದರೂ ಅಥವಾ ಮನನೊಂದಿದ್ದರೂ ಕ್ಷಮಿಸಿ ಎಂದು ರಣ್ಬೀರ್ ಕ್ಷಮೆಯಾಚಿಸಿದರು. ಮಾತು ಮುಂದುವರಿಸಿದ ನಟ, ನಾನು ಈ ಬಗ್ಗೆ ಆಲಿಯಾ ಅವರಲ್ಲಿ ಮಾತನಾಡಿದೆ. ಆಲಿಯಾ ಪರವಾಗಿಲ್ಲ ಎಂದು ಹೇಳಿ ನಕ್ಕರು. ನಾನು ಕೆಟ್ಟ ಹಾಸ್ಯಪ್ರಜ್ಞೆಯನ್ನು ಹೊಂದಿದ್ದೇನೆ. ಕೆಲವೊಮ್ಮೆ ಹೀಗೆ ಆಗುತ್ತದೆ. ನನ್ನನ್ನು ಕ್ಷಮಿಸಿ ಎಂದು ಕೇಳಿಕೊಂಡರು.
ಇದನ್ನೂ ಓದಿ: ಚೆನ್ನೈನಲ್ಲಿ ಬ್ರಹ್ಮಾಸ್ತ್ರ ಸಿನಿಮಾ ಪ್ರಚಾರ - ದಕ್ಷಿಣ ಭಾರತದ ಆಹಾರ ಸವಿದ ರಣ್ಬೀರ್ ಕಪೂರ್
ಇತ್ತೀಚೆಗೆ ಯೂಟ್ಯೂಬ್ ಲೈವ್ ಸೆಷನ್ನಲ್ಲಿ, ನೀವ್ಯಾಕೆ ಒಟ್ಟಿಗೆ ಸಿನಿಮಾ ಪ್ರಚಾರಕ್ಕೆ ಮುಂದಾಗುತ್ತಿಲ್ಲ ಎಂದು ಕೇಳಿದ ಪ್ರಶ್ನೆಗೆ ರಣ್ಬೀರ್ ಕಪೂರ್ ಆಲಿಯಾ ಭಟ್ ಬೇಬಿ ಬಂಪ್ ತೋರಿಸಿದ್ದರು. ಇದು ಟೀಕೆಗೆ ಒಳಗಾಗಿತ್ತು.
