ನವದೆಹಲಿ: ಇಡೀ ದೇಶದಲ್ಲಿಯೇ ಸದ್ದು ಮಾಡಿದ್ದ, 2 ತಿಂಗಳಿಂದ ಸುದೀರ್ಘವಾಗಿ ನಡೆದ ಪಂಚರಾಜ್ಯಗಳಾದ ಉತ್ತರಪ್ರದೇಶ, ಪಂಜಾಬ್, ಉತ್ತರಾಖಂಡ, ಮಣಿಪುರ ಮತ್ತು ಗೋವಾ ವಿಧಾನಸಭಾ ಚುನಾವಣೆಯ ಬಹು ನಿರೀಕ್ಷಿತ ಫಲಿತಾಂಶ ಸಂಜೆ ವೇಳೆಗೆ ಹೊರ ಬೀಳಲಿದೆ. ಎಲ್ಲಾ 5 ರಾಜ್ಯಗಳ ಮತ ಎಣಿಕೆಯು ಬೆಳಗ್ಗೆ 8 ಗಂಟೆಗೆ ಪ್ರಾರಂಭವಾಗಲಿದೆ.
ಈ ಪಂಚರಾಜ್ಯಗಳಲ್ಲಿ 2 ತಿಂಗಳಿಗೂ ಹೆಚ್ಚು ಕಾಲ ಚುನಾವಣಾ ಪ್ರಚಾರ, ಮತದಾನ ನಡೆದಿದೆ. ಉತ್ತರಪ್ರದೇಶ (403 ಸ್ಥಾನಗಳು), ಪಂಜಾಬ್ (117), ಉತ್ತರಾಖಂಡ (70), ಮಣಿಪುರ (60) ಮತ್ತು ಗೋವಾದ(40) ಸ್ಥಾನಗಳಿಗೆ ಒಟ್ಟು 7 ಹಂತಗಳಲ್ಲಿ ಮತದಾನ ನಡೆದಿತ್ತು.
ಫೆಬ್ರವರಿ 10 ರಂದು ಉತ್ತರಪ್ರದೇಶ ವಿಧಾನಸಭೆಗೆ ಮೊದಲ ಹಂತದ ಮತದಾನದಿಂದ ಹಿಡಿದು ಮಾರ್ಚ್ 7 ರಂದು ನಡೆದ ಕೊನೆಯ ಮತ್ತು 7 ನೇ ಹಂತದ ಮತದಾನದವರೆಗೂ ಸುದೀರ್ಘ ಕಾಲ ನಡೆದ ಚುನಾವಣೆ ಇದಾಗಿದೆ. ಇದರ ಜೊತೆಗೆ ಉತ್ತರಾಖಂಡ, ಪಂಜಾಬ್, ಗೋವಾ ವಿಧಾನಸಭೆಗೆ ಫೆಬ್ರವರಿ 14 ರಂದು ಮತದಾನ ನಡೆದರೆ, ಮಣಿಪುರ ವಿಧಾನಸಭೆಗೆ ಫೆಬ್ರವರಿ 27 ಮತ್ತು ಮಾರ್ಚ್ 3 ರಂದು ಎರಡು ಹಂತದಲ್ಲಿ ಮತದಾನ ಜರುಗಿತ್ತು.
ಸಮೀಕ್ಷೆಗಳ ಲೆಕ್ಕಾಚಾರ ಏನು?: ಪಂಚರಾಜ್ಯಗಳ ಮತದಾನ ಮುಕ್ತಾಯದ ಬಳಿಕ ನಡೆದ ಸಮೀಕ್ಷೆಗಳಲ್ಲಿ ಉತ್ತರಪ್ರದೇಶದಲ್ಲಿ ಯೋಗಿ ಆದಿತ್ಯನಾಥ್ ನೇತೃತ್ವದ ಬಿಜೆಪಿ ಸರ್ಕಾರ ದಾಖಲೆಯ ಸ್ಥಾನಗಳಲ್ಲಿ ಗೆಲುವು ಸಾಧಿಸುವ ಮೂಲಕ ಮತ್ತೆ ಅಧಿಕಾರದ ಗದ್ದುಗೆ ಏರಲಿದೆ. ಅಲ್ಲದೇ ಮಣಿಪುರವೂ ಕೇಸರಿ ಪಡೆಯ ಪಾಲಾಗಲಿದೆ ಎಂದಿವೆ. ಪಂಜಾಬ್ನಲ್ಲಿ ಆಮ್ ಆದ್ಮಿ ಪಕ್ಷ ಈ ಬಾರಿ ಅಧಿಕಾರ ನಡೆಸಲಿದೆ, ಉತ್ತರಾಖಂಡ ಮತ್ತು ಗೋವಾದಲ್ಲಿ ಪೈಪೋಟಿ ಉಂಟಾಗುವ ಸಾಧ್ಯತೆ ಇದೆ ಎಂದು ಅಂದಾಜು ಮಾಡಿವೆ.
ಪಂಚರಾಜ್ಯಗಳ 690 ಕ್ಷೇತ್ರಗಳ ಚುನಾವಣಾ ಫಲಿತಾಂಶವನ್ನು ವೀಕ್ಷಿಸಲು ಭಾರತೀಯ ಚುನಾವಣಾ ಆಯೋಗದ (ECI) ವೆಬ್ಸೈಟ್(results.eci.gov.in) ಗೆ ಲಾಗ್ ಇನ್ ಆಗಬಹುದು.
ಓದಿ: ಯುಪಿ ಮತ್ತೆ BJPಗೆ, AAP ಕೈಗೆ ಪಂಜಾಬ್: ಪಂಚರಾಜ್ಯಗಳ ಚುನಾವಣೋತ್ತರ ಸಮೀಕ್ಷೆ ಹೀಗಿದೆ..