ಶಿಮ್ಲಾ(ಹಿಮಾಚಲ ಪ್ರದೇಶ): ಹಿಮಾಚಲ ಪ್ರದೇಶ ವಿಧಾನಸಭಾ ಚುನಾವಣೆಯಲ್ಲಿ ಜಿದ್ದಾಜಿದ್ದಿನ ಪೈಪೋಟಿ ಏರ್ಪಟ್ಟಿದೆ. ಮತ ಎಣಿಕೆಯ ಆರಂಭದಲ್ಲಿ ಬಿಜೆಪಿಯು ಗೆಲುವಿನತ್ತ ಮುಖ ಮಾಡುವುದರಲ್ಲಿತ್ತು. ಅದಕ್ಕೆಂದೇ ಸಾಕಷ್ಟು ತಯಾರಿಗಳನ್ನು ಮಾಡಿಕೊಂಡಿತ್ತು. ಆದರೆ ಇದೀಗ ಬಿಜೆಪಿ ಬಂಡಾಯಗಾರರೇ ಇದನ್ನು ಹಾಳು ಮಾಡುತ್ತಿರುವುದು ಸ್ಪಷ್ಟವಾಗಿ ಗೋಚರಿಸುತ್ತಿದೆ.
ಈ ಬಾರಿ ಟಿಕೆಟ್ ಸಿಗದ ಬಿಜೆಪಿಯ ಹಲವು ನಾಯಕರುಗಳು ಬಂಡಾಯದ ಬಾವುಟ ಹಾರಿಸಿ ಸ್ವತಂತ್ರರಾಗಿ ಕಣಕ್ಕಿಳಿದಿದ್ದಾರೆ. ಮತ ಎಣಿಕೆಯ ಆರಂಭದಿಂದಲೂ ಪ್ರಮುಖವಾಗಿ 8 ಜನ ನಾಯಕರು ಬಿಜೆಪಿಯ ಗೆಲುವಿನ ಆಟಕ್ಕೆ ಬ್ರೇಕ್ ಹಾಕಿದ್ದಾರೆ.
ಇವರಲ್ಲಿ ಪ್ರಮುಖ ನಾಯಕರುಗಳೆಂದರೆ ಹಮೀರ್ ಜಿಲ್ಲೆಯ ಬಾರ್ಸರ್ ಕ್ಷೇತ್ರದಿಂದ ಸಂಜೀವ್ ಶರ್ಮಾ, ಕುಲು ಜಿಲ್ಲೆಯ ಬಂಜಾರ್ ಕ್ಷೇತ್ರದಿಂದ ಹಿತೇಶ್ವರ್ ಸಿಂಗ್, ಕಿನ್ನೌರ್ನಿಂದ ತೇಜ್ವಂತ್ ನೇಗಿ, ಸೋಲನ್ನ ನಲಗಢ್ ಕ್ಷೇತ್ರದಿಂದ ಕೆ.ಎಲ್ ಠಾಕೂರ್, ಕುಲು ಕ್ಷೇತ್ರದಿಂದ ರಾಮ್ ಸಿಂಗ್ ಸೇರಿದಂತೆ ಕಾಂಗ್ರಾ ಜಿಲ್ಲೆಯ ಧರ್ಮಶಾಲಾ ಕ್ಷೇತ್ರದಿಂದ ವಿಪಿನ್ ನೆಹ್ರಿಯಾ, ಕಂಗ್ರಾದಿಂದ ಕುಲ್ಬಾಶ್ ಚೌಧರಿ ಮತ್ತು ಫತೇಪುರ್ ಕ್ಷೇತ್ರದಿಂದ ಪರ್ಮಾರ್ ಬಿಜೆಪಿ ವಿರುದ್ಧ ಮೇಲು ಸಾಧಿಸುತ್ತಿದ್ದಾರೆ.
ಕಾಂಗ್ರೆಸ್ ಮತ್ತು ಬಿಜೆಪಿಯಲ್ಲಿ ಬಂಡಾಯವೆದ್ದವರು ತಮ್ಮ ಪಕ್ಷದ ವಿರುದ್ಧವೇ ಬಾವುಟ ಹಾರಿಸಿ ಚುನಾವಣಾ ಕಣಕ್ಕೆ ಇಳಿದಿದ್ದಾರೆ. ಒಟ್ಟು ಬಂಡಾಯಗಾರರ ಪೈಕಿ 21 ಮಂದಿ ಬಿಜೆಪಿಗರು ಮತ್ತು 7 ಮಂದಿ ಕಾಂಗ್ರೆಸ್ಸಿಗರಿದ್ದಾರೆ.
ಇದನ್ನೂ ಓದಿ: ಹಿಮಾಚಲ ಪ್ರದೇಶದಲ್ಲಿ ಕಮಲಕ್ಕೆ ಹಿನ್ನಡೆ: ಬಿಜೆಪಿಗೆ 2 ಸ್ಥಾನಗಳಲ್ಲಿ ಜಯ, ಸಿಎಂ ಠಾಕೂರ್ಗೆ ಗೆಲುವು
