जहरीली शराब का सेवन से 4 लोखूं की मौत: हरिद्वार का पथरी थाना क्षेत्र का फूलगढ़ शिवगढ़ गौं मा जहरीली शराब पींण से चार लोखूं की मौत ह्वे गी. प्रशासन न चार लोखूं की मौतै पुष्टि करेली. घटना का बाद से ही पुलिस-प्रशासन मा हड़कंप मच्यूं च. ई घटना का बाद मामला मा एसओ पथरी थाना थै सस्पेंड करे गी. पुलिस न ये मामला मा द्वी लोखूं थै हिरासत मा लियेली. सीएम धामी न ये पूरा मामलै जांच का आदेश दियेन. सीएम धामी न बोली ये मामला मा दोषियूं का खिलाफ सख्त कार्रवाई किये जाली.
धारचूला का खोतीला मा बादल फटी: भारत-नेपाल बॉर्डर पर नेपालै ओर दार्चुला मा ब्याली देर रात बादल फटी. ज्या से भारी तबाही ह्वे. ई घटना मा कई मकान ध्वस्त ह्वे गीन. कई लोग लापता बथये जांणा छन. पिथौरागढ़ का धारचूला का खोतीला मा भी बादल फटण से दुकानूं थै भारी नुकसान ह्ववे. यख 2 लोखूं की मौत ह्वे गी, 11 लोग लापता छन. मौका पर राहत और बचाव कार्य जारी च. सीएम धामी भी लगातार यखा हालातूं पर नजर रखणा छन.
केदारघाटी मा भी आफतै बरखा: रुद्रप्रयाग जनपदै केदारघाटी मा भी बरखा का कारण तबाही मची च. केदारघाटी का ऊखीमठ क्षेत्र मा ब्याली रात मूसलाधार बरखा का कारण नदी नाला उफान पर ऐ गीन. ज्या का कारण ऊखीमठ कुंड और मिनी स्विटजलरैंड चोपता थै जोड़न वालू मोटरमार्ग कई स्थानूं पर धंस गी. बरखा का कारण होंया लैंडस्लाइड का कारण कई जगहों पर केदारनाथ हाईवे मा भी मलबा ए गी. ज्या कारण यात्रियूं और स्थानीय लोखूं थै बड़ी परेशानी होंणी छन.
हायर एजुकेशन मा ये सत्र मा ही लागू होली एनईपी-2020: उत्तराखंड हायर एजुकेशन मा ये सत्र से ही नई शिक्षा नीति लागू किये जाली. या कु शुभारंभ कन्नौ केंद्रीय शिक्षा मंत्री धर्मेंद्र प्रधान ये मौना उत्तराखंड आला. उच्च शिक्षा मंत्री धन सिंह रावत न बथै केन्द्रीय शिक्षा मंत्री न हायर एजुकेशन मा नई शिक्षा नीति लागू कन्नौ अनुमति दियेली. या कु थै वु बतौर मुख्य अतिथि देहरादून आला. धन सिंह रावत न बोली शिक्षा उत्तराखंड देश कु पैलू राज्य च, जख विद्यालयी शिक्षा मा नई शिक्षा नीति लागू करे गी, अब ये थै उच्च शिक्षा मा भी लागू किये जालू.
PCS प्री परीक्षा का 22 और उम्मीदवार क्वालिफाई घोषित: उत्तराखंड लोक सेवा आयोग न पीसीएस प्री परीक्षा का 22 और उम्मीदवारुं थै क्वालिफाई घोषित करेली. अब यू उम्मीदवार भी मुख्य परीक्षा मा शामिल ह्ववे सकला. आयोग का सचिव जीएस रावतै ओर से जारी सूचना का मुताबिक, हाईकोर्ट मा दायर विभिन्न याचिकाऊं पर अयां आदेश का क्रम मा 22 उम्मीदवारुं थै पीसीएसै मुख्य परीक्षा थै क्वालिफाई घोषित करे गी. यू सबी उम्मीदवार दस सितंबर बटी 19 सितंबर का बीच मुख्य परीक्षा थै अपणु शुल्क जमा करै सकदन.
पीएम मोदी का जन्मदिन बटी शुरू होलू भाजपा कु सेवा पखवाड़ा: 17 सितंबरौ पीएम मोदी कु जन्मदिन च. पीएम मोदी का ये दिन थै खास बणौणौ भाजपा कार्यकर्ताऊं न तैयारी शुरू करेन. पीएम मोदी का जन्मदिन बटी 2 अक्टूबर तक भाजपा कार्यकर्ता सेवा पखवाड़ा मनाला. इस दौरान प्रदेश मा कई तरह का कार्यक्रम आयोजित किये जाला. भाजपा संगठन न यां कु थै बूथ स्तर तक सेवा व अन्य कार्यक्रम तय कर्यां छन. यां मा ‘रक्तदान महादान‘, निःशुल्क स्वास्थ्य परीक्षण शिविर, कोविड बूस्टर डोज लगौण जन कार्य शामिल छन.
फिर खुलली कर्मकार कल्याण बोर्डै फाइल: धामी सरकार एक बार फिर से कर्मकार कल्याण बोर्डै फाइल खोन्न वाली च. अबरी बोर्ड मा खरीद मामलै दोबारा जांच किये जाली. मामला मा राज्य सरकार 2017 से 2022 तकै सभी खरीदूं की ऑडिट करौणै तैयारी कन्नी च. ये दौरान हरक सिंह रावत ये विभाग की मंत्री छा. जानकारी का अनुसार ईं जांच से पूर्व कैबिनेट मंत्री हरक सिंह रावतै घेराबंदी की तैयारी किये जांणी च
उत्तराखंड सरकार न बढ़ै खेल पुरस्कारुं की धनराशि: उत्तराखंड का खिलाड़ियूं थै खुशखबरी च. सरकार न विभिन्न खेलूं मा मेडल जीतण वाला खिलाड़ियूं थै मिन्न वाली पुरस्कार राशि बढ़ेयेली. शासन न या कुं थै आदेश भी करेली. यां का मुताबिक ओलंपिक मा स्वर्ण पदक जीतण पर पुरस्कार का रूप मा द्वी करोड़ और ओलंपिक मा प्रतिभाग कन्न वाला खिलाड़ी थै 50 लाखै धनराशि दिये जाली. विश्व चैंपियनशिप, एशियन खेल, राष्ट्रमंडल खेल, एशियन चैंपियनशिप, कॉमनवेल्थ चैंपियनशिप, राष्ट्रीय खेलूं मा पदक विजेता खिलाड़ियूं की पुरस्कार राशि थै भी बढ़ये गी.
21 सितंबर बटी देहरादून मा क्रिकेट कु महाकुंभ: 21 सितंबर बटी देहरादून का राजीव गांधी इंटरनेशनल स्टेडियम मा Road Safety World Series 2022 का मैच खेले जाला. ईं सीरीज मा भाग लेणौ दुनियाभर का दिग्गज खिलाड़ी देहरादून पौंछला. Road Safety World Series का 6 मैच देहरादून का राजीव गांधी इंटरनेशनल स्टेडियम मा खेले जाला. 21 सितंबरौ पैलू मैच इंडिया लीजेंड्स और बांग्लादेश लीजेंड्स का बीच होलू.
उत्तराखंड मा कोरोना का मामला: उत्तराखंड मां धीरे-धीरे कोरोना का मामलौ मा कमी औंणी च. सरकार और स्वास्थ्य विभाग यां कु थै लेकी लगातार प्रयास कन्ना छन. आज प्रदेश मा कोरोना का 29 नया मामला समणि ऐनी, ज्या का बाद प्रदेश मा कोरोना संक्रमितू की संख्या 103,695 ह्वे गी, जबकि यां से मन्न वालौ की संख्या 325 च.
